MUSAKUMBUKA?

Kodi mwaleri mwacidikhodikho misolo ya cincino ya Ncenjezi? Khala mwaileri, onani khala munakwanisa kutawira mibvundzo inatowerera:

Kodi Akristu Asafunika Kuphembera Kuna Yezu Kristu?

Nkhabe. Yezu atipfundzisa toera kuphembera kuna Yahova, pontho iye akhazikisa citsandzo mu kuphembera kuna Babace. (Mat. 6:6-9; Jwau 11:41; 16:23) Munjira ibodzi ene, atowereri ace akutoma akhaphembera kuna Mulungu, tayu kuna Yezu. (Mach. 4:24, 30; Akol. 1:3)​—1/1, tsamba 14.

Tinakhunganyika tani cikumbuso ca kufa kwa Yezu pacaka?

Njira ibodzi yakukhunganyika ndi kuleri ndandanda ya malemba a Bhibhlya analonga pya cikumbuso. Tinakwanisambo kuwangisira toera kuthimizira utumiki wathu mu ndzidzi unoyu. Pontho, tinakwanisa kucita phembero na kunyerezera mwacidikhodikho pya cidikhiro cathu cidapaswa ife na Mulungu.​—15/1, matsamba 14-16.

Ninji pidacitika kuna anyankaidi awiri a ku Ejito adalonga ndoto zawo zakudzudzumisa kuna Zuze?

Zuze apanga nyakupereka pyakumwa wa Farao kuti mbadadzapaswa cidzo cace cakale. Mbwenye ndoto ya nyakuphika mikate ikhabveka kuti iye mbadaphiwa na kumanikiwa pamuti na Farao. Mafokotozero mawiri ene akwanirisika. (Gen. 40:1-22)​—1/2, matsamba 12-14.

Ndi muoni upi wakutsandzayisa udatambira abale a ku Japau?

Iwo atambira bukhu ya Evanjelyu ya Mateo idabuluswa m’Bhibhlya ya Tradução do Novo Mundo. Bukhu ineyi ikugawirwa mu utumiki, pontho isatawirwa kakamwe na anthu azinji akuti nee asadziwa mwadidi Bhibhlya.​—15/2, tsamba 3.

Ndi makhaliro api a pyaka dzana yakutoma adaphedzera kumwazwa kwa mphangwa zadidi?

Upfuliki udaperekwa na Pax Romana ukhabveka kusoweka kwa uviya-viya. Anyakupfundza mbadakwanisa kucita ulendo mu miseu yadidi. Cilongero ca Cigrego cikaphatisirwa kakamwe, pyenepi pyacitisa kuti mphangwa zadidi zimwazirwembo kwa Ayuda akuti akhadamwazika m’madziko onsene akhatongwa na Roma. Anyakupfundza mbadaphatisira ntemo Waciroma toera kutsidzikiza mphangwa zadidi.​—15/2, matsamba 20-23.

Thangwi yanji Akristu andimomwene nee asacita phwando ya Paskwa?

Yezu apanga atowereri ace toera kukumbukira kufa kwace, tayu kulamuswa kwace. (Luka 22:19, 20)​—1/3, tsamba 8.

Thangwi yanji mabukhu athu cincino nee asalonga kazinji kene mafala a ciphiphiriso na cinaphiphiriswa?

Bhibhlya isalonga kuti anthu anango akhala ninga ciphiphiriso ca cinthu cikulu cantsogolo. Citsandzo cibodzi ca pyenepi cisagumanika pa Agalata 4:21-31. Mbwenye Bhibhlya ingakhonda kufokotoza, mphyadidi kukhonda kunyerezera kuti ciripo cinaphiphiriswa. Ngakhale tenepo, tinakwanisa kupfundza bulukira kwa anthu na pyakucitika pinalongwa m’Bhibhlya. (Arom. 15:4)​—15/3, matsamba 17-18.

Thangwi yanji phindi ya papiro idagumaniwa pakhuku mu Ejito ndi yakufunika kakamwe?

Mu pyaka dzana pidapita, yagumaniwa phindi ya papiro yakuti ikhali na makhundu anango a Evanjelyu ya Jwau. Panango iyo yalembwa pakupita makhumi a pyaka Jwau mbadamala kale kulemba bukhu yace. Mphangwa zace zisapangiza malemba ali na ife lero, pyenepi pisapangiza kuti Bhibhlya ndi yakunyindirika.​—1/4, matsamba 10-11.

Thangwi yanji kubulusa m’mpingo nyakudawa wakukhonda tcinyuka ndi masasanyiro aufuni?

Bhibhlya isalonga kuti kubulusa munthu m’mpingo ndi masasanyiro adidi akuti anakwanisa kubweresa maphindu. (1 Akor. 5:11-13) Masasanyiro anewa asapasa mbiri dzina ya Yahova, kutsidzikiza makhaliro akucena a mpingo na anakwanisa kucitisa nyakudawa kutcinyuka.​—15/4, matsamba 29-30.