Phatani Basa Toera Kubalikisa Paradizu Yauzimu
“Ndinadzapasa mbiri mbuto yakuikhira miyendo yanga.”—IZA. 60:13, Tradução do Novo Mundo.
NYIMBO: 102, 75
MUNAKWANISA KUFOKOTOZA?
Ndi cipi cifuno cikulu ca alambiri andimomwene a Yahova?
Ndi ‘paradizu’ ipi idaona mpostolo Paulu m’masomphenya?
Tinakwanisa tani kubalikisa paradizu yauzimu?
1, 2. M’Malemba Acihebere, fala yakuti “mbuto yakuikhira miyendo” isabvekanji?
YAHOVA Mulungu alonga: ‘Kudzulu ndi mpando wanga wa umambo, dziko yapantsi ndi mbuto yakuikhira miyendo yanga.’ (Iza. 66:1) Thangwi ya “mbuto yakuikhira miyendo” yace, iye alongambo: “Ndinadzapasa mbiri mbuto yakuikhira miyendo yanga.” (Iza. 60:13, NM) Kodi iye asacita tani pyenepi? Nakuti tisakhala pa “mbuto yakuikhira miyendo” ya Mulungu, pyenepi pisabvekanji kwa ife?
2 Mbwenye fala yakuti “mbuto yakuikhira miyendo” isaphatisirwambo m’Malemba Acihebere toera kulonga pya templo yakale mu Israele. (1 Pya dziko. 28:2, NM; Sal. 132:7) Templo ineyi ikhali ninga tsinde ya ulambiri wandimomwene. Na thangwi ineyi, iyo ikhali yakubalika kakamwe pamaso pa Yahova, pontho ikhaphatisirwa toera kupasa mbiri Yahova pa dziko yapantsi.
3. Ninji templo ikulu yauzimu ya Mulungu, na yatoma lini?
3 Kodi lero ndi ipi tsinde ya ulambiri wandimomwene? Nee ndi templo yakumangwa ninga nyumba, mbwenye ndi templo yauzimu yakuti isapasa kakamwe mbiri Yahova kupiringana nyumba zonsene. Anewa ndi masasanyiro a Mulungu akuti asatawirisa anthu kukhala axamwali ace na kumulambira. Masasanyiro anewa asakwanisika kubulukira mu ntsembe ya ciomboli ca Yezu Kristu. Iwo atoma pidabatizwa Yezu mu caka 29 N.W. mbadzodzwa ninga Nyantsembe Wankulu wa templo ikulu yauzimu ya Yahova.—Aheb. 9:11, 12.
4, 5. (a) Kodi lemba ya Masalmo 99 isafokotoza tani cifuno cikulu ca alambiri a Yahova? (b) Ndi mbvundzo upi wakuti m’bodzi na m’bodzi asafunika kuucita?
4 Nakuti tisapasa ntengo masasanyiro a templo yauzimu, ife tisasimba Yahova kubulukira mu kudziwisa dzinace na kunkuza thangwi ya masasanyiro ace a ntsisi a ntsembe ya ciomboli. Mphyakutsandzayisa kudziwa kuti Akristu andimomwene akupiringana mamiliyau masere ali aphinga lero m’basa yakusimba Yahova. Mwakusiyana na anthu a mauphemberi anango ananyerezera mwakuphonyeka kuti anadzasimba Mulungu angaenda kudzulu, Mboni za Yahova zonsene zisadziwa kuti zisafunika kusimba Mulungu lero pantsi pano.
5 Munjira ineyi, ife tisatowezera citsandzo ca atumiki akukhulupirika a Mulungu adalembwa pa Masalmo 99:1-3, 5. (Lerini.) Nyamasalmo unoyu alonga kuti Mose, Aroni na Samwele aphedzera kakamwe masasanyiro a ulambiri wandimomwene mu ntsiku zawo. (Sal. 99:6, 7) Lero, mbadzati kuenda katumikira ninga anyantsembe pabodzi na Yezu kudzulu, Akristu akudzodzwa asatumikira mwakukhulupirika mu templo yauzimu pa dziko yapantsi. Pikwi na pikwi pya “mabira anango” asaaphedza mwakukhulupirika. (Jwau 10:16) Maseze ali na pidikhiro pyakusiyana, Akristu akudzodzwa na mabira anango asalambira Yahova mu templo yauzimu ya Mulungu. Mbwenye mphyadidi kubvundzika tekhene: ‘Kodi ndisaphedzera mwakukwana masasanyiro a Yahova a ulambiri wakucena?’
KUDZINDIKIRA ALE ANATUMIKIRA PA TEMPLO YAUZIMU YA MULUNGU
6, 7. Ndi nyatwa ipi idaoneka pakati pa Akristu akutoma, pontho ninji pidacitika mbacidzati kufika caka 1919?
6 Cifupi na pyaka dzana pidamala kukhazikiswa mpingo Wacikristu, upanduki udalongwa mwanyapantsi ukhadatoma kuoneka. (Mach. 20:28-30; 2 Ates. 2:3, 4) Buluka penepo, pyadzakhala pyakunentsa kudzindikira kuti mbani mwandimomwene akhatumikira Mulungu mu templo yace yauzimu. Basi ene pakupita madzana a pyaka ukhadafika ndzidzi toera Yahova apangize pakweca ale anantumikira, iye acita pyenepi kubulukira mwa Yezu Kristu adamala kwene kukhazikiswa ninga Mambo.
7 Mu caka 1919, ale adasankhulwa na Yahova toera kutumikira mu templo yace yauzimu apangizika pakweca. Iwo akhadacita macinjo toera ulambiri wawo ukhale wakutawirika kwa Yahova. (Iza. 4:2, 3; Mal. 3:1-4) Pikhadaona mpostolo Paulu m’masomphenya mu pyaka madzana nduli pyatoma kukwanirisika.
8, 9. Fokotozani makhundu matatu a ‘paradizu’ idaona Paulu m’masomphenya.
8 Masomphenya a Paulu alembwa pa 2 Akorinto 12:1-4. (Lerini.) M’masomphenya anewa Yahova ampangiza pinthu pyakuti mbapidacitika ntsogolo. Pidakwatwa Paulu mbaenda ku “thambo yacitatu,” ndi ‘paradizu’ ipi idaona iye? Cakutoma isabveka paradizu yandimomwene yakuti mwakukhonda dembuka inadzaoneka pa dziko yapantsi. (Luka 23:43) Caciwiri isabveka paradizu yauzimu mu dziko ipswa. Cacitatu isabveka makhaliro akudzumatirisa a kudzulu ‘mu paradizu ya Mulungu.’—Apokalipse 2:7.
9 Mphapo thangwi yanji Paulu alonga kuti ‘abva mafala akukhonda longeka, akuti munthu akhondeswa kualonga’? Thangwi nee ukhali ndzidzi toera kufokotoza unyomonyomo wa pinthu pyakudzumisa pidaona iye m’masomphenya. Mbwenye lero mphyakuthema kulonga pya nkhombo zinaoneka pakati pa atumiki a Mulungu!
10. Thangwi yanji fala yakuti “paradizu yauzimu” na “templo yauzimu” nee isabveka cinthu cibodzi cene?
10 Fala yakuti ‘paradizu yauzimu’ isacita khundu ya mafala akuti asaphatisirwa mu gulu yathu. Iyo isafokotoza makhaliro athu akupambulika anatiphedza toera kukhala mwantendere na Mulungu na abale athu. Templo yauzimu ndi masasanyiro a Mulungu a ulambiri wandimomwene. Natenepa, ‘paradizu yauzimu’ na ‘templo yauzimu’ ndi pinthu pyakusiyana. Paradizu yauzimu isaphatisirwa toera kupangiza pakweca anthu akutawirika kwa Mulungu anatumikira mu templo yace yauzimu lero.—Mal. 3:18.
11. Ndi mwai upi uli na ife lero mu paradizu yauzimu?
11 Mphyakutsandzayisa kudziwa kuti kutomera mu caka 1919, Yahova asatawirisa kuti anthu akusowa ungwiro aphate na iye m’basa yakuthimizira, kuwangisa na kubalikisa paradizu yauzimu pa dziko yapantsi! Kodi imwe musacita khundu m’basa ineyi yadidi kakamwe? Musapasa ntengo mwai wakuphata basa na Yahova toera kumpasa mbiri pa dziko yapantsi?
YAHOVA AKUBALIKISA KAKAMWE GULU YACE
12. Ndi cinyindiro cipi ciri na ife tonsene thangwi ya kukwanirisika kwa lemba ya Izaiya 60:17? (Onani cithundzithundzi cakutoma.)
12 Basa yadidi kakamwe yakuthambaruka kwa khundu yapantsi ya gulu ya Yahova yalongwa mwanyapantsi pa Izaiya 60:17. (Lerini.) Ale akuti ndi aphale na atsikana peno ale akuti ndi apswa mu undimomwene asaleri thangwi ya pipangizo pya kucinja kweneku peno asabva kubulukira kwa anango. Mbwenye abale na alongo adatamba pyenepi ali na mwai ukulu kakamwe! Mwakukhonda penula, atumiki anewa akukhulupirika ali na cinyindiro cakuti mukuphatisira Mambo wace wakukhazikiswa, Yahova akutsogolera gulu Yace! Ife tonsene tiri na cinyindiro cakukwana ninga cawo. Kubva mafala awo akubulukira muntima pinadzawangisa cikhulupiro canu na cinyindiro canu kwa Yahova.
13. Mwakubverana na Masalmo 48:12-14, tisafunika kucitanji?
13 Mwakukhonda tsalakana ndzidzi uli na ife mu undimomwene, tonsene tisafunika kupanga anango pya gulu ya Yahova. Kuoneka kwa paradizu yauzimu pakati pa dziko yakuipa na yakusowa ufuni ndi cirengo mu ntsiku zino! Mwakukomerwa, tisafunika kudziwisa “ubalwi wa kutsogolo” pya mabasa akudzumisa a gulu ya Yahova peno “Sioni” na undimomwene wa paradizu yauzimu.—Lerini Masalmo 48:12-14.
14, 15. Ndi macinjo api adacitwa mu pyaka 1970, pontho asaphindulisa tani gulu?
14 Mu pyaka pizinji, abale na alongo akugwesera aona macinjo mangasi adacitika mu gulu akuti athimizira kubalika kwa khundu yapantsi ya gulu ya Yahova. Iwo asakumbuka mu ndzidzi wakuti mipingo ikhali na ntumiki wa mpingo mbuto mwa nsoka wa akulu a mpingo, madziko akhali na ntumiki wa filiali, mbuto mwa komiti ya filiali, pa ndzidzi ukhaperekwa pitsogolero na presidente da Sociedade Torre de Vigia mbuto mwakukhala na Mathubo Akutonga a Mboni za Yahova. Maseze abale anewa akhaphedzerwa na abale anango akukhulupirika, mbwenye munthu m’bodzi ndiye akhatonga kuti pinthu pisafunika kukhala tani pa mpingo, pa filiali na ku ofesi ikulu ya Mboni za Yahova. Mu pyaka 1970 macinjo acitwa toera basa yakutsogolera icitwe na nsoka wa akulu a mpingo mbuto mwa kucitwa na munthu m’bodzi.
15 Kodi macinjo anewa abweresa maphindu? Inde! Thangwi yanji? Thangwi acitwa mwakubverana na midida ya Bhibhlya. Mbuto mwakukhala na munthu m’bodzi basi toera kutonga kuti pinthu pisafunika kucitwa tani, gulu isaphindula na makhaliro adidi a akulu a mpingo onsene peno ‘miyoni mwa anthu’ akuti asakhazikiswa na Yahova toera kuphindulisa gulu.—Aef. 4:8; Mis. 24:6.
16, 17. Ndi macinjo api adacitwa cincino akuti akudzumatirisani, pontho thangwi yanji?
16 Nyerezeranimbo macinjo adacitwa cincino, ninga maonekero, mphangwa na njira yakugawira mabukhu athu. Tisakomerwa kakamwe kugawira mabukhu akutundusa akuti ali na mphangwa zakuphindulisa mu utumiki! Pontho tingaphatisira tekinolojiya yacincino ninga website jw.org toera kumwaza undimomwene, tisapangiza cifuno ca Yahova toera kupereka citsogolero cakufunika kuna anthu a mbuto zonsene.
17 Tisaperekambo takhuta na macinjo adacitwa toera kukhala na ndzidzi wakucita Kulambira kwa Banja namaulo peno pfundziro ya munthu paekha. Pontho tisapereka takhuta na macinjo adacitwa pa maprogramu athu a misonkhano ya cisa na ya gawo. Kazinji kene tisalonga kuti misonkhano ineyi isakhala yadidi kakamwe pyaka pyonsene! Na tisatsandzaya kakamwe na kuthimizirika kwa cipfundziso cinatambira ife m’maxikola athu mazinji Acikristu. Macinjo anewa onsene asapangiza pakweca kuti Yahova akutsogolera gulu yace na akupitiriza kubalikisa kakamwe paradizu yauzimu!
TINAPHEDZERA TANI KUBALIKA KWA PARADIZU YAUZIMU
18, 19. Tinaphedzera tani kubalika kwa paradizu yauzimu?
18 Ndi mwai kutawiriswa na Yahova toera kuphedzera kubalikiswa kwa paradizu yathu yauzimu. Tisacita pyenepi mu kumwaza mphangwa zadidi za Umambo mwaphinga na kucita anyakupfundza azinji. Ndzidzi onsene unaphedza ife munthu mpaka kubatizwa, tikuphata basa toera kuthimizira paradizu yathu yauzimu.—Iza. 26:15; 54:2.
19 Tinakwanisambo kuthimizira kubalika kwa paradizu yathu yauzimu mu kusasanyira makhaliro athu ene Acikristu. Munjira ineyi, tinacitisa kuti paradizu ineyi ikhale yakutundusa kakamwe kwa anthu akunja. Kusiyapo kukhala na cidziwiso ca Bhibhlya, makhaliro athu akucena na antendere ndiwo anatoma kutundusa anthu toera kupita mu gulu yathu, mbakwanisa kudziwa Yahova na Yezu.
20. Mwakubverana na lemba ya Misangani 14:35, tisafunika kukhala na cifuno cipi?
20 Yahova na Yezu asatsandzaya kakamwe angaona paradizu yathu yauzimu yakubalika lero! Kutsandzaya kunakhala na ife lero pa kuphedzera kubalika kweneku ndi cipangizo ca kutsandzaya kunafuna kudzakhala na ife ntsogolo pakuphata basa toera kucitisa dziko yapantsi kukhala paradizu. Tikumbukeni ndzidzi onsene lemba ya Misangani 14:35, inalonga kuti: ‘Ntumiki wa ndzeru anafuniwa na mambo.’ Ndzidzi onsene tendeni ticite pinthu mwandzeru munaphata ife basa mwaphinga toera kuphedzera kubalika kwa paradizu yauzimu!