Tipaseni Ntengo Mbuto Yathu Ya Ulambiri

“Kuifuna kwanga nyumba yanu ndi ninga moto unandilalisa.”​—JWAU 2:17, Mphangwa Zadidi.

NYIMBO: 127, 118

MUNATAWIRA TANI?

Tinapangiza tani cilemedzo cakuthema ku misonkhano yacikristu?

Atumiki a Yahova asaphedzera tani kumangwa kwa nyumba za Umambo?

Thangwi yanji mphyakufunika ndzidzi onsene kucenesa na kusasanyira papswa Nyumba zathu za Umambo?

1, 2. (a) Ndi mbuto zipi zikhaphatisira atumiki a kale toera kulambira Yahova? (b) Kodi Yezu apibva tani thangwi ya templo ya Mulungu mu Yerusalemu? (c) Ndi cipi cifuniro ca nsolo uno?

KUTOMERA kale, atumiki a Mulungu ali na mbuto zawo za kucititira ulambiri wakucena. Abhele panango aphatisira guwa toera kupereka ntsembe kuna Mulungu. (Gen. 4:3, 4) Nowa, Abrahamu, Izaki, Yakobe na Mose onsene amanga guwa. (Gen. 8:20; 12:7; 26:25; 35:1; Eks. 17:15) Mu kutsogolerwa na Yahova Aisraele amanga tabernakulu. (Eks. 25:8) Mukupita kwa ndzidzi, iwo amanga templo toera kulambira Yahova. (1 Am. 8:27, 29) Pidabuluka iwo mu ubitcu ku Bhabhilonya, ndzidzi onsene Ayuda akhasonkhana mu sinagoga. (Marko 6:2; Jwau 18:20; Mach. 15:21) Akristu akutoma akhasonkhana mu nyumba za piwalo pya mpingo. (Mach. 12:12; 1 Akor. 16:19) Lero, mbumba ya Yahova isasonkhana mu Nyumba za Umambo zakukwana pikwi pizinji toera kupfundziswa na kulambira.

² Yezu akhapasa ntengo na akhafuna kakamwe templo ya Yahova mu Yerusalemu, pyakuti pyacitisa mulembi wa Evanjelyu kulemba mafala aciprofesiya: “Kuifuna kwanga nyumba yanu ndi ninga moto unandilalisa.” (Sal. 69:9; Jwau 2:17, MZ) Nyumba ya Umambo nee si ‘nyumba ya Yahova’ ninga mukhacemerwa templo mu Yerusalemu. (2 Pya dziko. 5:13; 33:4) Ngakhale tenepo, Bhibhlya iri na midida yakuti tinalemedza tani, pontho tinaphatisira tani mbuto yathu yakulambira. Cifuniro ca nsolo uno ndi kudinga midida ineyi pontho kuti tinaiphatisira tani munjira inaona ife Nyumba za Umambo, pyakupereka pyathu na inatsalakanwa tani.a

KUPANGIZA CILEMEDZO KU ULAMBIRI WAKUCENA

3-5. Ndi cipi cifuniro ca Nyumba ya Umambo, mphapo tisafunika kuona tani misonkhano inacitwa mwenemu?

³ Nyumba ya Umambo ndi mbuto yakuthema inasonkhana anthu toera kulambira Yahova. Misonkhano inacita ife masumana onsene mu Nyumba ya Umambo ndi masasanyiro anacita Yahova toera kutidyesa mwauzimu. Ndi mwenemu munatambira ife ciwangiso cauzimu na citsogolero kubulukira mu gulu ya Yahova. Yahova na Mwanace ndiwo anaticemera toera kugumanika pa misonkhano ineyi. Natenepa, nee tisafunika kuduwala kuti ncemerero unoyu toera kudya pa ‘meza ya Yahova’ ndi wakufunika kakamwe.​—1 Akor. 10:21.

⁴ Yahova asatipanga pakweca kuti tisafunika kugumanika pa misonkhano toera kumulambira na kuwangisana unango na ndzace. (Lerini Ahebere 10:24, 25.) Kodi mbatidapangiza cilemedzo kuna Yahova khala tisadjomba misonkhano Yacikristu mwakusowa mathangwi? Mwandimomwene tisapangiza kuti tisapereka takhuta kuna Yahova thangwi ya masasanyiro anewa tingakhunganyika na kutawira pa misonkhano.​—Sal. 22:22.

⁵ Macitiro athu pa misonkhano na kutsalakana kwathu Nyumba ya Umambo pisafunika kupangiza cilemedzo cakuthema kuna Yahova. Tisafuna kuti macitiro athu apase mbiri dzina ya Mulungu yakuti kazinji kene isalembwa pa cidzindikiro ca Nyumba ya Umambo.​—Landanisani na 1 Amambo 8:17.

6. Kodi anango alonganji thangwi ya Nyumba zathu za Umambo na anthu anasonkhana mwenemu? (Onani cithundzithundzi cakutoma.)

⁶ Cilemedzo cinapangiza ife pa Nyumba za Umambo kazinji kene cisaoniwa na anthu akuti nee ndi Mboni za Yahova. Mwacitsandzo, mamuna unango ku Turkiya alonga: “Unyai na kutsalakanwa kwa pinthu pa Nyumba ya Umambo kwandidzumatirisa kakamwe. Anthu akhadabvala mwadidi, akhamwetulira mbandimwanyika mwaufuni. Pyenepi pyandikhuya kakamwe.” Mamuna unoyu atoma kusonkhana mwakukhonda phonya, mbabatizwa mwakukhonda dembuka. Mu nzinda unango ku Indoneziya, mpingo ubodzi wacemera akulu a utongi na anyakuendekana toera kuona Nyumba ipswa ya Umambo. Muimiriri wa nzinda agumanika. Iye adzumatirwa kakamwe na kubalika kwa nyumba, makhaliro ayo na maluwa adidi. Iye alonga: “Unyai pa nyumba ino usapangiza cikhulupiro canu candimomwene.”

7, 8. Tinapangiza tani kuti tisalemedza Yahova mu ndzidzi unagumanika ife pa Nyumba ya Umambo?

⁷ Yahova ndiye asaticemera toera kugumanika pa misonkhano. Natenepa, mabvaliro athu na makhunganyikiro athu asafunika kupangiza cilemedzo kwa iye. Cilemedzo cisaphemba kucita pinthu mwakulinganira. Anango asanentseka kakamwe na macitiro a anango pa kugumanika pa misonkhano ya mpingo, anango asapangizambo macitiro akukhonda thema kakamwe pa Nyumba ya Umambo. Yahova asafuna kuti atumiki ace na alendo akhale akusudzuka pa misonkhano. Mu ndzidzi ubodzi ene, ale anagumanika pa misonkhano nee asafunika kudzudzumisa misonkhano thangwi yakubvala munjira yakukhonda thema, kutumiza mphangwa mu ntokodzi, kucedza mu ndzidzi wa misonkhano, kudya, kumwa peno kucita cinthu cinango. Anyakubala asafunika kupfundzisa anawo toera kudziwa kuti mu Nyumba ya Umambo nee ndi mbuto toera kuthamanga-thamanga peno kusendzeka.—Koel. 3:1.

⁸ Pidaona iye anthu akhagulisa pinthu mu templo ya Mulungu, Yezu aipirwa mbathamangisa ale akhacita malonda mwenemu. (Jwau 2:13-17) Munjira ibodzi ene, Nyumba zathu za Umambo ndi mbuto toera kulambira Yahova na kupfundziswa mwauzimu. Natenepa, nkhabe funika kutsalakana pya malonda athu mu ndzidzi unagumanika ife pa misonkhano.—Landanisani na Nehemiya 13:7, 8.

TISAPHEDZERA KUMANGWA KWA NYUMBA ZA UMAMBO

9, 10. (a) Kodi atumiki a Yahova asacitanji toera kumanga Nyumba za Umambo, mphapo pyenepi pisabweresa maphindu api? (b) Ndi masasanyiro api aufuni asacitwa toera kuphedza mipingo idasowa kobiri toera kumanga Nyumba ya Umambo?

⁹ Atumiki a Yahova pa dziko yonsene asaphata basa mwaphinga toera kumanga Nyumba za Umambo. Abale na alongo akuperekeka asacita mabasa ninga a kulemba pithundzithundzi pya nyumba, kumanga na kusasanyira papswa Nyumba za Umambo. Pyenepi pisabweresa maphindu api? Kubulukira pa ntsiku 1 ya Bingu ya caka 1999, zamangwa Nyumba za Umambo zakupiringana 28.000 pa dziko yonsene. Pyenepi pisapangiza kuti mu pyaka 15 pidapita, mu medya, Nyumba za Umambo zixanu zikhamangwa ntsiku zonsene pacaka.

¹⁰ Masasanyiro akucitwa toera kumanga Nyumba za Umambo m’mbuto zinafunika izo. Masasanyiro anewa aufuni asacitwa mwakubverana na n’dida wa Bhibhlya unalonga kuti ale ana pizinji anakwanisa kuphedza ale adasowa. (Lerini 2 Akorinto 8:13-15.) Ninga maphindu, Nyumba za Umambo zakubalika zikumangwa m’mipingo yakuti nee mbidakwanisa kuona kobiri toera kumanga Nyumba ya Umambo.

11. Ninji pinalonga abale anango thangwi ya Nyumba yawo ipswa ya Umambo? Mphapo mafala anewa asakukhuyani tani?

¹¹ Abale a mpingo unango ku Costa Rica adaphindula na masasanyiro anewa alemba: “Tingalimira kutsogolo kwa Nyumba ya Umambo, tisaona ninga tikulota! Mphyakunentsa kutawira. Nyumba yathu ya Umambo yakubalika yamangwa mu ntsiku zisere basi! Pyenepi pyakwanisika na nkhombo za Yahova, masasanyiro a gulu yace, na ciphedzo ca abale athu akufunika. Mwandimomwene, mbuto iyi yakulambira ndi muoni wakufunika udatipasa Yahova. Tiri akutsandzaya kakamwe thangwi ya pyenepi.” Tisakomerwa kakamwe kubva abale na alongo mbakapereka takhuta kuna Yahova thangwi ya pinthu pidaacitira iye. Pisaoneka pakweca kuti Yahova asapasa nkhombo basa yakumanga Nyumba za Umambo, thangwi mwakukhonda dembuka, anthu azinji kakamwe asatoma kugumanika pa misonkhano toera kupfundza pya Yahova.​—Sal. 127:1.

12. Munakwanisa tani kuphedzera mabasa akumanga Nyumba za Umambo?

¹² Abale na alongo asakomerwa kakamwe kucita khundu m’basa yakumanga Nyumba za Umambo. Khala tinakwanisa kuenda kamanga peno nkhabe, tonsene tinakwanisa kuphedzera mabasa anewa kubulukira mu pyakupereka pyathu. Phinga thangwi ya ulambiri wakucena yakulumiza atumiki akale toera kuphedzera mabasa auzimu, pyenepi pisacitwambo lero toera kupasa mbiri Yahova.​—Eks. 25:2; 2 Akor. 9:7.

KUCENESA NYUMBA YA UMAMBO

13, 14. Ndi midida ipi ya Bhibhlya inatiphedza toera kupitiriza kucenesa Nyumba ya Umambo na kuitsalakana mwadidi?

¹³ Nyumba ya Umambo ingamala kumangwa, isafunika kupitiriza kuceneswa na kuisasanyira mwadidi toera ipangize makhaliro a Mulungu analambira ife. (Lerini 1 Akorinto 14:33, 40.) Bhibhlya isalandanisa kucena mwauzimu na kucena kwa kumanungo. (Apok. 19:8) Natenepa, khala munthu asafuna kukhala wakutawirika kuna Yahova, asafunika kukhala na unyai wadidi.

¹⁴ Mwakubverana na midida ineyi, ndzidzi onsene tisafunika kukhala akusudzuka toera kucemera anthu kuti agumanike pa misonkhano mbatinyindira kuti makhaliro a Nyumba yathu ya Umambo anathimizira mphambvu ya mphangwa zadidi zidaamwazira ife. Iwo anadzaona kuti tikulambira Mulungu wakucena wakuti mwakukhonda dembuka anadzacinja dziko yapantsi toera kukhala paradizu yakubalika.​—Iza. 6:1-3; Apok. 11:18.

15, 16. (a) Thangwi yanji midzidzi inango pisanentsa kuti nyumba ya umambo ipitirize kukhala yakucena, mbwenye thangwi yanji isafunika kukhala yakucena? (b) Ndi api masasanyiro akucenesa Nyumba yanu ya Umambo, mphapo ndi mwai upi uli na ife tonsene?

¹⁵ Anthu ali na maonero akusiyana thangwi ya unyai. Maonero awo asakhuyiwa na makuziro awo, na pinango ninga matope, pfumbi, makhaliro a miseu, kusoweka kwa madzi na mitombwe yakucenesa nayo. Mwakukhonda tsalakana maonero na makhaliro apacisa, Nyumba yathu ya Umambo isafunika kukhala na makhaliro adidi, thangwi isadziwika na dzina ya Yahova, pontho ndi mbuto ya ulambiri wakucena.​—Deut. 23:14.

¹⁶ Khala tisafuna kuti Nyumba yathu ya Umambo ikhale yakucena, tisafunika kuphedzera basa yakucenesa. Akulu a mpingo asafunika kucita ndandanda yakucenesa Nyumba ya Umambo, na kugula maferamentu na pyonsene pinafunika toera kucenesa mbuto ya ulambiri kuti ipitirize na makhaliro adidi. Mabasa anango akucenesa asacitwa mukupita kwa ndzidzi. Mbwenye anango asafunika kucitwa ndzidzi onsene pakumala kwa misonkhano, natenepa pisafunika kubverana mwadidi na kuyang’anira basa toera pinthu pifambe mwadidi. Anthu onsene pa mpingo ali na mwai wakuphedzera mabasa anewa.

KUTSALAKANA MBUTO YATHU YA ULAMBIRI

17, 18. (a) Tisapfundzanji kubulukira munjira idatsalakanira atumiki a Yahova templo mu ndzidzi wakale? (b) Thangwi yanji tisafunika kutsalakana Nyumba yathu ya Umambo?

¹⁷ Atumiki a Yahova asawangisira kakamwe toera kusasanyira papswa mbuto zawo za ulambiri. Mambo Yoasi wa ku Yuda apanga anyantsembe kuti aphatisire pyakupereka pikhadacitwa toera ‘kusasanyira papswa’ nyumba ya Yahova, mu ndzidzi ukhakhonda iyo kukhala na maonekero adidi. (2 Am. 12:4, 5) Mu pyaka pyakupiringana 200, Mambo Yosiya aphatisirambo pyakupereka toera kuphedzera kusasanyirwa papswa kwa templo.​—Lerini 2 Pya dziko. 34:9-11.

¹⁸ Makomiti anango a filiali asaona kuti mu dziko inatumikira iwo, anthu nkhabe kusasanyira papswa Nyumba peno kutsalakana mafaramentu mwakubwereza-bwereza. Panango ndi anthu akucepa m’madziko anewa asadziwa basa ineyi peno nkhabe kobiri yakukwana toera kuiphatisira. Khala Nyumba ya Umambo nee isasanyirwa papswa, pyenepi pinacitisa kuti nyumba ya Umambo itome kufudzika, mbikhonda kupereka umboni wadidi pacisa. Munjira inango, khala abale na alongo asacita pyonsene pinakwanisa iwo toera Nyumba ya Umambo ikhale na makhaliro adidi, pisapasa mbiri Yahova na pisacitisa kuti pyakupereka pya abale pikhonde kubvungika.

19. Munacitanji toera kupangiza kuti musalemedza mbuto inalambira imwe Yahova?

¹⁹ Nyumba ya Umambo ndi nyumba idaperekwa kwa Yahova. Natenepa, nee ndi pyakuthema kulonga kuti ndi ya munthu peno ya mpingo mwakukhonda tsalakana pidalembwa pa phaso. Mwakubverana na midida ya Bhibhlya idamala ife kudinga, tisafunika kucita pyonsene toera Nyumba ya Umambo ikwanirise cifuniro cayo cakulambira Yahova. Onsene m’mpingo anakwanisa kuphedzera cifuniro ceneci mu kupangiza cilemedzo cakuthema ku mbuto zathu za ulambiri, kucita pyakupereka toera kuphedza kumangwa kwa nyumba zipswa, kuphatisira ndzidzi na mphambvu yathu toera kucenesa na kusasanyira papswa Nyumba za Umambo. Tingacita pyenepi, tinapangiza ufuni na cilemedzo ku mbuto ya ulambiri wakucena wa Yahova, ninga pidacita Yezu.​—Jwau 2:17.

[Cidzindikiro capantsi]