Sangizirani Kristu M’utumiki Wanu

¹ Yezu akhazikisa citsanzo kwa ife kuti ticitowezere m’utumiki wathu. Kufuna kwace kukulu Mulungu na anthu kwaoneka m’nzidzi uzinji na m’njira zizinji. Iye apfunzisa undimomwene anthu akufansa na acita mabasa a udidi towera kuphindulisa anthu akuthabuka na akupondererwa.—Mat. 9:35.

² Citsanzo Ca Yezu Na Pipfunziso: Yezu hadadzudzumika m’kucita khundu ya pinthu pya ndale tayu peno kucita basi mabasa akuphindulisa mbumba. Na pang’ono pene iye atawirisa basa inango yonsene ya cifuno cadidi kundzudzumisa peno kupingiza basa yace ikulu. (Luka 8:1) Iye aikha manyerezero ace m’kumwaza mphangwa zadidi za Umambo wa Mulungu ninga njira ibodzi basi ya kumalisa nyatwa za anthu kwenda na kwenda. Yezu akhali na basa ikulu towera kucita na akhali na nzidzi wakucepa towera kuicita. Mukhafuna anthu ku Kafarnau kuti Yezu apitirize kukhala kweneku, iye alonga kwa anyakupfunzace: “Tendeni ku pisa pya chifupi towera ndipfundisembo kweneko; thangwi ya ipyo ndadza.”—Mko. 1:38.

³ Pakumala kupfunzisa anyakupfunzace, Yezu aatuma na pipfunziso pyakuthonyeka: “Longani mphangwa kuti: ‘dziko [umambo] ya kudzulu yafika duzi.’” (Mat. 10:7) Iye apfunzisa atowereri ace kuti pifuno pya Umambo pisafunika kuikhwa pa mbuto yakutoma m’umaso wawo. (Mat. 6:33) Mafala akumalisa a Yezu kwa anyakupfunzace mbasati kwenda kudzulu apangiza mwapakweca pikhafunika iwo kucita. Iye alonga: “Chinchino ndokoni kuna anthu a madziko onsene mbamuachita anyakupfudza anga.”—Mat. 28:19, Mphangwa Zadidi.

⁴ Kufunika Kwa Umambo: Nsolo ukulu wa cipfunziso ca Yezu ukhali Umambo wa Mulungu, na iye akulumiza anyakupfunzace kutowezera citsanzo cace. Kuwangisira kwa anthu towera kumalisa nyatwa za mbumba nkhabe kupembera. (Yer. 10:23) Basiene Umambo wa Mulungu unadzacenesa dzina ya Mulungu na kubweresa ufulu wa kuenda na kuenda kwa anthu. (Mat. 6:9, 10) Kupfunzisa undimomwene wa Umambo kwa anthu akuti ndi ‘akutsukwala na pinthu pyakuipa pire pinachitika’ kusaaphedza kukhala akutsanzaya, kukhala na umaso wakupembera cincino na kuphatisisa mwakucimbiza cidikhiro cakunyindirika ca ntsogolo.—Ezek. 9:4.

⁵ Yezu asapitiriza kucita nkhundu m’basa ya kumwaza mphangwa zadidi za Umambo wa Mulungu, na iye apikira kutiphedza. (Mat. 28:20, MZ) Kodi mpaka papi utumiki wathu usakwanirisa citsanzo cidatisiyira Yezu? (1 Ped. 2:21) M’nzidzi uno wa ntsiku zakumalisa, tingakwanise kucita pyonsene nkati mwa mphambvu zathu towera kutowezera mwadidi citsanzo cidasiya Yezu m’utumiki!