Khala Anthu Nkhabepo Panyumba
1 M’pisa pizinji kugumana anthu panyumba kukuthimizirika basi kukhala kwakunensa. ‘M’midzidzi ino yakugopswa,’ azinji asakakamizika kuphata basa m’midzidzi mizinji towera kugumana cakudya. (2 Tim. 3:1) Anango angakwanise kubuluka panyumba towera kuenda ku maloja kagula pinthu peno ku masenzekero. Kodi tinakwanisa tani kupanga anthu anewa mphangwa zadidi?
1. Kodi ndi cinenso cipi cinagumanika konsene kwene munacita ife utumiki wa nyumba na nyumba?
2 Koyani Mwadidi Pyakulemba: Cinthu cakutoma ndi kulemba anthu anakhonda gumanika panyumba. Pyenepi ndi pyakufunika makamaka khala musaphata basa m’cisa canu mokhonda phonya. Kodi mwalemba dzina ya nseu, numero ya cisa, dzina yanu na ntsiku? Panango mungakwanise kubuluka pa nyumba towera kulemba pinthu pinango pyakuthimizirika towera pikuphedzeni peno piphedze m’mwazi mphangwa unango angabwerera kudzaphata basa pa nyumba zakuti nee zikhali na anthu. Mungakotoka, kumbukani kupereka pyakulemba peno kabukhu keneka kwa munthu ule ali na cisa ceneci kusiyapo khala iye akutawirisani kuti muphate basa pa nyumba zakuti nee zikhali na anthu. Lekani kuphatisira tsamba ibodziene tayu towera kulemba ale adapangiza cifuno akuti munaacitira ulendo wakubwereza.
2. Kodi tinakwanisa tani kukhala na cinyindiro cakuti adakhonda gumanika panyumba anadzatsalakanwa?
3 Yeserani Midzidzi Yakusiyanasiyana: Panango ale akuti nee ali panyumba pa ntsiku ya basa angakwanise kukhala panyumba munakhupa dzuwa peno pakumala kwa sumana. Kodi mungakwanise kucinja ndandanda wanu towera kubwerera m’nzidzi unango wakuthema? (1 Akor. 10:24) Khala nkhabe, mungakwanise kupanga m’mwazi mphangwa unango wakuti angakwanise kubwerera m’nzidzi unango kwa ale akuti nee akhali panyumba. Kusiyapo pyenepi, mungakwanise kutumizira tsamba ale akuti nee akhali panyumba peno kuyesera kuagumana m’kuphatisira ntokodzi. Amwazi mphangwa akuti nkhabe kwanisa kucita pizinji ku basa ya nyumba na nyumba thangwi ya ungumi wawo wanyatwa-nyatwa angakwanise kukhala akutsanzaya kukuphedzani kucita pyenepi.
3. Kodi ndi zipi njira zakusiyana-siyana zakufikira ale akuti nkhabe gumanika panyumba?
4 Cakucitika cibodzi cisapangiza kufunika kwa kuyesera kulonga na ale akuti nkhabepo panyumba. Pakumala amwazi mphangwa kuenda kazinji kene panyumba inango nee kugumana anthu m’piaka pitatu, pakumalisira agumana anthu. Pidacitika ndi pyakuti iye akhadikhira kubwera kwa Mboni m’nzidzi unoyu onsene towera kutoma pontho pfunziro ya Biblya ikakhala na iye mbadzati kubwera pa cisa ceneci.
4. Kodi ndi ninji cinapangiza kufunika kwa kucita ulendo wakubwereza kwa ale anakhonda kugumanika panyumba?
5 Kumalisa Cisa: Kodi ndi m’nzidzi upi unalongwa kuti cisa camaliswa? Kazinji kene, ndi m’nzidzi unacitwa kuwangisira kwacidikhodikho towera kulonga na munthu pa nyumba ibodzi na ibodzi. Pingakhale pyakuthema kusiya pa nyumba zakusowa anthu katsamba peno revista yakale pa mbuto yakukhonda oneka na anyakugwanda, makamaka m’pisa pyakuti kazinji kene pisaphatwa basa. Cisa cisafunika kumaliswa nkati mwa nthanda zinai. Buluka penepo ntumiki anatsalakana cisa asafunika kudziwiswa towera alembe papswa ndandanda wace.
5. Kodi ndi m’nzidzi upi unalongwa kuti cisa camaliswa?
6 Ife tisafuna kuti anthu azinji kakamwe anakwanisika akhale na mwai wakupfunza kucemera dzina ya Yahova na apulumuswe. (Arom. 10:13, 14) Pyenepi pisaphatanizambo ale anakhonda gumanika pa nyumba pawo munacita ife utumiki wa nyumba na nyumba. Ninga mpostolo Paulu, citani pyenepi kukhala cifuno canu ca kumalisa kupereka umboni wa “mphangwa Zadidi za kukoma [ntima] kwa Mulungu.”—Mab. [Mach.] 20:24, Chiverano Chachinchino.
6. Thangwi yanji tisafunika kuwangisira kupanga anthu onsene m’cisa cathu mphangwa zadidi?