Tsamba Ya Mathubo Akutonga
Anzathu A Mboni Za Yahova Akufunika:
Mpostolo Paulu abanza mwai onsene towera kupangiza kufuna kwace na kupereka kwace takhuta kwa anyakukhulupira anzace. Kwa Akristu a ku Roma, iye alemba: ‘Ndinachita takhuta kuli Mulungu wanga na kuli Yezu Kristu, thangwi ya imwe mwonsene. Cikhulupiro canu cadidi cabvekeswa pantsi ponsene.’ (Arom. 1:8) Inde, mu Utongi wonsene wa Roma, Akristu anewa a piaka dzana yakutoma akhadziwika thangwi ya cikhulupiro cawo cakuwanga pabodzi na phinga yawo m’basa ya kumwaza mphangwa. (1 Ates. 1:8) Si pyakudzumisa tayu kuona Paulu mbakhala na kufuna kweneku kwa abale ace!
Ninga Paulu, ndzidzi onsene tingakunyerezerani tisapereka takhuta kwa Yahova. Ife tisakufunani kakamwe imwe monsene! Na mungakwanise kukhala na cibaso cakuti Yahova asafunambo m’bodzi na m’bodzi wa imwe. Anango a imwe akuthimbana na mpingizo ukulu, mbwenye muli kupitiriza na kumwaza mphangwa. Usakomeresa tani Yahova nzimu wacipapo na wakukhonda gopa unapangiza imwe!—Mis. 27:11.
Munaleri imwe na kunyerezera mwacidikhodikho “Pinacita Mboni za Yahova M’midzidzi Ino” pidagomezerwa mu Anuário uyu wakukomeresa na wakuwangisa cikhulupiro, munadzaona pipangizo pizinji pyakuti Mbuya Yezu Kristu akupitiriza ‘kukunda towera kumalisa kukunda kwace’ na kuti cida ca ntundu onsene cinafuna kudzacitirwa atowereri a Kristu nkhabe kudzapembera.—Apok. 6:2; Iza. 54:17.
Kwa Akristu a ku Filipi, Paulu alemba: “Ndinachita takhuta Mulungu wanga . . . thangwi mwatsalakana pya mphangwa zadidi.” (Afil. 1:3-5) Ife piwalo pya Mathubo Akutonga tisapibva mu njira ibodzibodzi tingakunyerezerani. Nkati mwa caka ca basa ca 2007, amwazi mphangwa akukwana 6.691.790 abvunga midzidzi yakukwana 1.431.761.554 mu kukwaza mphangwa zadidi m’madziko 236 kuzungulira dziko yonsene yapantsi. Ndi kuwangisira kwakudzumisa tani kunacita imwe towera kuendesa kutsogolo mphangwa zadidi! Nyerezerani pikwi na pikwi pya anthu adaphedzwa thangwi ya kuwangisira kwa ife tonsene, pyonsene towera kusimba Yahova!
Pa ndzidzi unango, Paulu apangiza kuti iye akhabvera ntsisi kakamwe abale ace. Iye alembera ale akhali ku Tesalonika: ‘Tisakumbuka kwenda na kwenda pa maso pa Mulungu Baba wathu, tingakumbukira kupirira kwanu pa kukhulupira Mbuyathu Yezu Kristu.’ (1 Ates. 1:2, 3) Inde, umaso uli na nyatwa zace zizinji. Nyatwa ziripo, mbwenye ndi pyakufunika kuti tipirire. Kodi ndi pinenso pipi pinathimbana na imwe ene? Kodi mwafewa manungo thangwi ya matenda makulu akuti asakucimwanisani kucita pikhafuna imwe m’basa ya Yahova? Kodi mamuna wanu peno nkazi wanu wa piaka pizinji akwatiwa na nyamalwa wankulu wakukhonda khuta, Sheole? (Mis. 30:15, 16) Kodi mukucimwana kugumana munthu wakucita naye banja wakuti asafunambo Yahova mu ndzidzi ibodzi ene mbumubvera mwakukhulupirika uphungu wa Malemba wakucita banja na nkristu basi? (1 Akor. 7:39, Mphangwa Zadidi) Kodi mukuwangisira kukuza ananu pakati pa nyatwa ikulu kakamwe ya kobiri? Mwakukhonda tsalakana makhaliro anu, mungapitiriza kuikha pifuno pya Umambo pa mbuto yakutoma mu umaso wanu, mungakwanise kukhala na cinyindiro cakuti Yahova “hanadzadwala tayu pinthu pyadidi pidachita imwe na kufuna kwanu kudaonesa imwe, thangwi ya dzina yache.” Taphata miyendo abale na alongo, lekani “kuneta na kuchita pyadidi” tayu!—Aheb. 6:10; Agal. 6:9.
Kodi ndi ninji pinafuna kukucitisani kupirira? Ninga a ku Tesalonika, ndi ‘cidikhiro mwa Mbuyathu Yezu Kristu.’ Na thangwi yadidi, patsogolo pace Paulu alandanisa ‘cidikhiro ca kupulumuswa’ na cakubvala ca pa nkhondo cakuti cingakwanise kutsidzikiza Nkristu ku manyerezero akuipa na kupenula kwakukhonda mala.—1 Ates. 5:8.
Inde, mu kupirira mu njira yadidi, imwe mukupereka ntawiro ku uxoli wa Sathani pa nseru ukulu wa utongi wa kudzulu na pantsi. Sathani asalonga kuti anzakazi a Mulungu mwacibaliro ndi akucenama na kuti iwo panango asafuna kutumikira Mulungu mu ndzidzi wakucepa, mbwenye anadzasiya ulambiri wawo mayesero angathimizirika peno makhaliro ano a pinthu angadembuka kumala ninga mukhadikhira iwo. Imwe muli na mwai wakupambulika wa kupangiza Dyabo kuti iye ndi nyauthambi! Ntsiku na ntsiku ya umaso wanu imwe muli cifupi kakamwe na nkhombo zinadikhira imwe.
Tenepa ninga Paulu abanza miyai ikhali na iye towera kusimba abale ace thangwi ya cikhulupiro cawo cakuwanga, kuphedzera kwawo mwakudzala manja basa ya kumwaza mphangwa na kupirira kwawo, tiri akukomerwambo kubanza mwai uno towera kukusimbani na kukupangani kuti ife tisakufunani. Pitirizani na basa yadidi!
Tikuphembera kuti caka cinafuna kudza ici cikhale na nkhombo zizinji zauzimu. Na cifuno cadidi kakamwe, ife ndife
Abale anu,
Mathubo Akutonga a Mboni za Yahova