Kubwerezera Kwa Xikola Ya Utumiki Wa Mulungu
Mibvunzo inatowerera iyi inadzadingwa pa Xikola Ya Utumiki Wa Mulungu nkati mwa sumana 27 ya nthanda ya Malandalupya ya 2008. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 1 ya nthanda ya Nyenzi mpaka sumana 27 ya nthanda ya Malandalupya ya 2008.
LUSO YAKULONGA
1. Kodi tinakwanisa tani kudziwa pinakhulupira anthu anango? [be tsa. 259 ndima 2, 3] Kudziwa piri mu ntima mwa munthu unango kusafuna ndzidzi na nkhabe funika kucimbizirwa tayu. Mibvunzo inakwanisa kuphedza. Ife tinakwanisa kubvunza: “Kodi musapibva tani thangwi ya . . . ?” “Kodi ndi ninji pinakucitisani kukhulupira kuti . . . ?” peno “Kodi mbumudacita tani mbidakhala kuti . . . ?” Mbatisati kupokanya maonero akuipa a munthu unango, tisafunika kuwangisira towera kudziwa kuti thangwi yanji munthu unoyu ali na manyerezero anewa. Anyakubvesera athu angadziwa kuti tisaatsalakana, panango iwo anadzadinga mwacidikhodikho pinalonga ife.
2. Kodi tinakwanisa tani kuphedza munthu towera kubulusa tsangulo peno kuida mu ntima mwace? [be tsa. 260 ndima 2] unthu anakoya kuida peno tsangulo asafunika kupfunza kuona anango, kuphataniza iye ene, ninga pinacita Yahova. Angamala kudziwa kuti Yahova ndi wakukoma ntima tani kwa anthu onsene mwakukhonda tsalakana makuziro awo, dziko yakubalwa, peno ntundu, buluka penepo iye ali na phata yakuwanga ya Malemba yakukhala wantendere kwa anango. (Mach. 10:34, 35)
3. Kodi tinakwanisa tani kuphedza anyakupfunza athu kuti adinge mitima yawo ene towera akwanise kupitiriza kukula mwauzimu? [be tsa. 261 ndima 3] Ife tisafunika kuwangisa anyakupfunza athu towera akumbuke kuti Biblya isapangiza kuti Yahova asationa tani. (Mis. 17:3) Ife tisafunika kuadembetera kuti aone kuleri Biblya ninga njira inaphatisira Yahova towera kudinga ‘manyerezero’ na pifuno pya mitima yawo towera akwanise kucita pinthu mwakubverana na Mulungu mukucita macinjo onsene akufunika. (Aheb. 4:12)
4. Kodi tisafunika kukumbukanji munawangisira ife kukhuya mitima ya anyakubvesera athu? [be tsa. 262 ndima 3] Ndi pyadidi kukumbuka kuti munapfunzisa ife basa yathu ndi kuphedzera Yahova. (1 Akor. 3:9) Ndi Yahova anadinga mitima na kucitisa anthu towera akhale na uxamwali na iye. (Mis. 21:2; Jwau 6:44) Iye nkhabe kakamiza munthu towera atawire undimomwene, mbwenye munaphatisira ife Malemba, Mulungu anakwanisa kucitisa anthu kudziwa kuti pinabva iwo ndi ntawiro wa mibvunzo peno maphembero awo.
5. Thangwi yanji tisafunika kuphatisira mwadidi ndzidzi pa misonkhano yathu ya mpingo? [be tsa. 263 ndima 1, 3, bokosi] Tingaphatisira mwadidi ndzidzi wathu, tisacitisa kuti ‘pinthu pyonsene picitwe mwakuthema na mwakulinganira.’ (1 Akor. 14:40, Chiverano Chachinchino) Ndzidzi uzinji ene usafunika kuphatisirwa ku ntsonga zonsene zikulu za cipfunziso. Kusiyapo pyenepi, misonkhano yathu yakhunganywa towera itome na imale mu ndzidzi wakuthema mwakukhonda tsalakana nsambo wapacisa peno cifuno ca munthu paekha.
NKHANI N.° 1
6. Kodi ndi ninji cidacitisa Paulu kulembera Akorinto tsamba yace yakutoma? [bsi08-1 tsa. 20 ndima 3] Pisaoneka ninga Paulu atambira tsamba ya mpingo upswa wa ku Korinto, na ikhafuna ntawiro. Mwakuthimizira, mphangwa zakudzudzumisa zafika kuna Paulu. (1 Akor. 1:11; 5:1; 11:18) Mphangwa zenezi zikhali zakutsukwalisa kakamwe kwa Paulu kwakuti iye hadazitawira tayu pa tsamba yawo ya mibvunzo mpaka pa vesi yakutoma ya kapitulu 7 ya tsamba yace.
7. Kodi ndi mathangwi api adacitisa Paulu kulembera Akorinto tsamba yace yaciwiri? [bsi08-1 tsa. 22 ndima 1-2] Tito akhadabwerera kubulukira ku Korinto na kulonga kuna Paulu pidacita mpingo na tsamba yace yakutoma, yakuti yaacitisa kutcinyuka. Ngakhale tenepo, n’khaliro wadidi wauzimu wa mpingo ukhali pangozwi thangwi ya ‘ale akhaoneka okhene ninga apostolo,’ akuti Paulu aalonga kuti ndi “alongeri [peno apostolo] apezi, anyamabasa akudodomesa.” (2 Akor. 11:5, 13, 14) Utongi wa Paulu ninga mpostolo ukhapokanywa. Natenepa, tsamba yace yaciwiri kwa Akorinto ikhakwanirisa pyakufunika pikulu.
8. Kodi Akristu asafunika kuona tani utumiki? [bsi08-1 tsa. 22-3 ndima 18] Akristu asafunika kukhala na maonero mabodzi ene na adapangiza Paulu mu tsamba yace yaciwiri idalembera iye Akorinto, tsamba yakupereka takhuta kakamwe. Ntumiki Wacikristu wakuti apfunziswa mwadidi na Mulungu si nyakugulisa mafala tayu, mbwenye asatumikira mwakulinganira. Pinancitisa kusimbwa si phaso yakulembwa tayu, mbwenye ndi misapo inabala iye mu utumiki. Maseze utumiki wathu ndi wambiri, cipo ife tisafunika kuuona ninga thangwi yakuticitisa kukhala akuzikuza. Mbuto mwace, tisakwanirisa utumiki wathu thangwi ya mphambvu ya Yahova. (2 Akor. 2:16, 17; 3:1-5; 4:7)
9. Kodi tinakwanisa tani lero, ninga abale a ku Filipi, kukhala akutawirika pamaso pa Mulungu na kukhala citsanzayo kwa abale athu? [bsi08-1 tsa. 29 ndima 12] Ife tinakwanisa kusangizira Afilipi tingakhala akupasa mwakudzala manja na kuphedza abale athu angakhala pa nyatwa. (Afil. 1:3-6) Ife tisakhala akutawirika pamaso pa Mulungu munapitiriza ife kukhala ‘akuwanga mwa nzimu ubodzi ene na mwa nzeru zibodzi zene, mbatibverana na ntima ubodzi ene, mbatibverambo mphangwa zadidi,’ ‘mbatiyetima ninga nyenyezi za kudzulu’ mu dziko ino yakuipa. Munacita ife pinthu pyenepi, tinakwanisa kukhala akutsanzayisa kwa abale athu. (Afil. 1:27; 2:15; 4:1)
10. Kodi ndi maphindu api adidi adakhala na Paulu pabodzi na anzace ku mpingo wa ku Atesalonika? [bsi08-2 tsa. 4 ndima 13] Paulu alonga pya iye ene na ale akhali na iye kuti hadapfunzisa mphangwa zadidi za Mulungu basi tayu mbwenyembo apereka mioyo yawo ene towera kuphedza abale awo akufunika mu Tesalonika. Paulu aphembera kuti ‘kufuna’ kwa Atesalonika ‘kukule’ kwa unango na nzace. Ufuni wakupangizwa mwakufuna mwandimomwene ndi wakuwangisa na usasiyanisa Akristu na dziko yakusowa ufuni, yakubvunda na yaulukwali. (1 Ates. 2:8; 3:12; 4:1-9)
KULERI BIBLYA KWA SUMANA NA SUMANA
11. Kodi pisabvekanji kupereka mamuna wakucita pyakuipa ‘m’manja mwa Sathani towera afudzwe manungo mbwenye nzimu wache upulumuswe’? (1 Akor. 5:5) [w08 15/7 “A Palavra de Jeová É Viva — Destaques das cartas aos coríntios”] Munthu angabuluswa m’mpingo, iye asacita pontho khundu ya dziko ya Dyabo. (1 Jwau 5:19) Iye asalongwa ninga wakuperekwa kwa Sathani. Kubuluswa kwace kusamalisa unyengereri wakuipa m’mpingo na kusacitisa kuti mpingo ukhale na “nzimu” waumulungu, peno n’khaliro wadidi. (2 Tim. 4:22)
12. Kodi cikumbuso ca kufa kwa Yezu cisafunika kucitwa kangasi na “mpaka” lini? (1 Akor. 11:26) [w08 15/7 “A Palavra de Jeová É Viva — Destaques das cartas aos coríntios”] Paulu nee akhalonga kuti kufa kwa Yezu kusafunika kukumbukirwa ntsiku zonsene tayu. Mbuto mwace, iye akhalonga kuti m’midzidzi yonsene inadya Akristu akudzodzwa pidzindikiro pya Cikumbuso, iwo ‘asadziwisa kufa kwa Mbuya.’ Iwo mbadacita pyenepi “mpaka kudza kwache,” nkhubveka kuti, mpaka iye kuatambira kudzulu kubulukira mu kulamuswa muli akufa mu ndzidzi wa ‘kukhalapo’ kwace. (1 Ates. 4:14-17)
13. Kodi ndi masomphenya api analongwa pa 2 Akorinto 12:2-4, na mbani panango adaaona? [w04 15/10 tsa. 8 ndima 4; tsa. 10 ndima 9] Masomphenya akhapangiza n’khaliro wakupambulika wa ulambiri wandimomwene, paradizu wauzimu unatsanzaya na mbumba ya Yahova mu ndzidzi wa “kumala kwa pantsi.” (Dan. 12:4) Nakuti khundu ineyi isatowerera mavesi adatsidzikiza Paulu kukhala kwace mpostolo, mphyakukwanisika kuti iye akhalonga thangwi ya pyakugumana napyo pyace pyene.
14. Thangwi yanji Paulu alandanisa Mwambo wa Mose na ‘ntsogoleri towera kutifikisa kuna Kristu’? (Agal. 3:24) [w08 1/3 tsa. 18-21] Paulu akhagomezera kuphata basa kwa Mwambo ninga citsidzikizo na kuti iwo mbudakhala wa ndzidzi wakucepa. Kazinji kene ntsogoleri akhali nyabasa wakunyindirika wakuti basa yace ikhali ya kutsidzikiza mwana towera akhonde phekeka na kumpfunzisa makhaliro adidi. Mu njira ibodzibodzi, Mwambo wa Mose ukhali na cifuno ca kutsidzikiza Aisraele ku makhaliro na pyakucita pyakuipa pya mauphemberi akuazungulira. Mwakuthimizira, mwana angafika pa uphale peno pa utsikana, iye nee akhalibve pantsi pa utongi wa ntsogoleri wace tayu. Mu njira ibodzibodzi, Mwambo ukhali wa ndzidzi wakucepa towera kuti ungamala kutsogolera Ayuda akugopa Mulungu kwa Kristu, kuphata kwawo basa ninga ntsogoleri kwakwanirisika.
15. Kodi Paulu akhafuna kulonganji mudaphembera iye kuti ‘nzimu na moyo na manungo a abale anu akoyiwe’? (1 Ates. 5:23) [w08 15/9 “A Palavra de Jeová É Viva — Destaques das cartas aos tessalonicenses e a Timóteo”] Paulu akhalonga pya piwalo pizinji pikhacita mpingo Wacikristu. Iye aphembera kuti “nzimu,” peno n’khaliro wadidi wa mu ntima wa mpingo unoyu ukoyiwe. Pontho iye aphemberera ‘moyo,’ umaso wawo, peno kukhalapo kwawo, na “manungo” awo — nsoka onsene wa anyakudzodzwa. (1 Akor. 12:12, 13) Mu kusangizira maphembero a Paulu akupangiza kuti akhatsalakana kakamwe mpingo, maphembero athu asafunikambo kupangiza citsalakano cikulu ku ubale wathu wa dziko yonsene yapantsi.