Pfunziro Ya Munthu Ekha Na Ya Banja Ndi Yakufunika Kakamwe!
1 Tenepa ninga m’pyaka dzana yakutoma, Mathubo Akutonga asatsalakana kakamwe ukhali wadidi wa mbumba ya Yahova. (Mach. 15:6, 28) Munafika nyatwa ikulu paduzi, ndi pyakufunika kakamwe kuti amwazi mphangwa onsene a Umambo akhale na uxamwali wadidi kakamwe na Yahova. Munaphatisira tani n’dzidzi wakuti kalene mukhauphatisira towera kucita Pfunziro ya Bukhu ya Mpingo? Onsene ali kuwangiswa kuphatisira n’dzidzi unoyu towera kulambira kwa banja. Kuphatisira mwanzeru n’dzidzi unoyu kunadzaticitisa kuti tikwanise kupfunza mwacidikhodikho Mafala akupumirwa a Mulungu na kuphindula na pipfunziso pyawo.—Sal. 1:1-3; Arom. 11:33, 34.
2 Kulambira Kwa Banja Namaulo: Misolo ya banja isawangiswa kuti ikwanirise mabasa awo pamaso pa Yahova mu kudinga mwadidi kuti programu ya pfunziro ya Bhibhlya ya pabanja yakukhonda phonya na yakuphindulisa isacitwa. (Deut. 6:6, 7) Abale na alongo azice akukhonda khala na kupitawirira kwa banja anakwanisa kuphatisira n’dzidzi unoyu towera kucita pfunziro yawo ene ya Bhibhlya na kusaka mabvekero a malemba mwacidikhodikho. Ndi pyakufunika kakamwe kwa ife tonsene ‘kubanza n’dzidzi’ kuti tipfunze na kunyerezera mwacidikhodikho towera tipitirize na uxamwali wakuwanga na Yahova mwakukhonda tsalakana ‘ntsiku zino zakuipa.’—Aef. 5:15, 16.
3 Munapfunzanji: Índice das Publicações da Torre de Vigia peno Watchtower Library mu CD-ROM anakwanisa kukuphedzani kugumana mphangwa zakuti zinadzacitisa midzidzi ya pfunziro yanu ya Bhibhlya kukhala yakukomeresa. Mabanja anakwanisa kudinga misolo mu A Sentinela, ninga ire inabwera mwakukhonda phonya inalonga pya “Como Ter uma Família Feliz,” “Ensine Seus Filhos,” na “Para os Jovens.” Pontho, mu Despertai! musabwera nsolo wakuti “Os Jovens Perguntam” na misolo inango yakukomeresa kakamwe yakulonga thangwi ya pyakucitwa pyakudzumisa.
4 Kuleri Bhibhlya pabodzi mwakukhonda thamanga, kunadzacitisa kuti anthu onsene m’banja aphedzeke towera akumbuke na aphatisire midida yaumulungu mu umaso wawo. (Aheb. 4:12) M’midzidzi inango, imwe munakwanisa kuona na kudinga ibodzi mwa mavidyu anabuluswa na gulu. Pana miyai mizinji towera kusankhula pinafuna imwe kupfunza na kuti munapipfunza tani. Thangwi yanji nkhabe kubvunza anthu a banja yanu pinafuna iwo kupfunza?
5 Thangwi Yanji Ndi Pyakufunika Kakamwe Cincino: Kuwangisa uxamwali wathu na Yahova kunadzaticitisa kukhala akukhunganyika towera kukhala dzololo na ‘kuona Mbuya mbatipulumusa.’ (Eks. 14:13) Anyakubala asafuna citsogolero caumulungu towera kukuza anapiana pakati pa “anthu akuipa na akudawika.” (Afil. 2:15, Chiverano Chachinchino) Anapiana asafuna ciphedzo towera akwanise kuthimbana mwadidi na kupunguka kwa makhaliro adidi m’maxikola a lero. (Mis. 22:3, 6) Anyakumanga banja mbadacita mwadidi kuwangisa ‘nkhambala yacitatu’ na Yahova. (Koel. 4:12) Natenepa, tendeni tiphatisire mwanzeru n’dzidzi udasala uyu towera tithimizire ‘chikhulupiro cathu chakupambulika kakamwe’!—Yuda 20, CC.
[Study Questions]
1. Ndi kudzudzumika kupi kuli na Mathubo Akutonga na ife mu n’dzidzi uno, na thangwi yanji?
2. Kulambira kwathu kwa banja namaulo kusafunika kucitwa tani?
3, 4. Ndi maonero api anaperekwa a mabukhu akuti tinakwanisa kuaphatisira, na tisafunika kunyerezeranji?
5. Thangwi yanji pfunziro ya Bhibhlya ya munthu ekha na ya banja ndi yakufunika kakamwe mu umaso wathu lero?