Bokosi Ya Mibvunzo

◼ Kodi Ndi Njira Zipi Zakuphata Basa Zakuti Tinakwanisa Kuphedza Apainiya?

Kuzungulira dziko yonsene, nkati mwa caka ca basa ca 2009, cifupi na 800.000 abale na alongo atumikira ninga apainiya a ndzidzi onsene na apainiya akupambulika. Atumiki anewa a ndzidzi onsene aphatisira pinthu pyawo pyakufunika ninga ndzidzi, mphambvu na pfuma zawo zakumanungo toera kumwaza mphangwa zadidi za Umambo. (Mis. 3:9) Yahova asatsanzaya kakamwe na kuwangisira kwawo kweneku! Kodi ndi mu njira zipi zakuti tinakwanisa kusangizira maonero a Yahova na kuphedza apainiya kugumana kutsanzaya na kupirira m‘basa yawo ya upainiya?

Mwandimomwene mafala athu akusankhulwa mwadidi anakwanisa kuawangisa toera apitirize kutumikira ninga apainiya. (Mis. 25:11) Kodi tingakwanise kucinja ndandanda wathu wa sumana na sumana toera kuphata basa pabodzi na iwo mu utumiki? Tingaphata basa pabodzi na iwo, panango tingakwanise kuphatisira motokala wathu mbuto mwa kuphatisira motokala wawo peno kualipira tingakwira pabodzi na iwo maximbombo. Khala ife takwira motokala wa mpainiya, panango tingakwanise kuapasa cakupereka toera kuaphedza na mafuta a motokala. (1 Akor. 13:5; Afil. 2:4) Tisapangizambo ciphedzo cathu cakubuluka mu ntima mu kutambira alendo na kucemera apainiya m’midzidzi inango toera kudya pabodzi na ife kunyumba kwathu.​—1 Ped. 4:​8, 9.

Malemba asapereka cibaso cakuti Yahova anadzapasa pyakufuna pya ale anaikha Umambo wace pa mbuto yakutoma. (Sal. 37:25; Mat. 6:​33) Njira ibodzi yakucita pyenepi isabulukira kwa abale athu Acikristu akuti asatifuna kakamwe. (1 Jwau 3:​16-​18) Mwandimomwene, apainiya nee asafunika kudikhira kuti anango aalipire pifuno pyawo. M’midzidzi inango iwo asagopa kudziwisa anango pinthu pinafuna iwo. Natenepa, tingakhala anthu akunyang’anisisa, tinakwanisa kuphedza apainiya akukhulupirika mu pinthu pinafuna iwo mu njira za kuphata basa.​—2 Akor. 8:​14, 15.

Febe, nyakumwaza mphangwa waphinga m‘Mpingo wa Senkrea wa pyaka dzana yakutoma, mudaenda iye ku Roma, Paulu awangisa abale ku Roma: “Muntambire pyadidi thangwi ya Mbuya. Munchitire pyadidi ninga munatongwa anthu akuchena kuchita, mbamumphedza angacherenga.” (Arom. 16:​1, 2) Tiri na mwai ubodzi ene toera kupangiza ciphedzo cakubuluka mu ntima kwa anthu a m’mpingo wathu anamwaza mphangwa zadidi mwakukhonda puma ninga apainiya a ndzidzi onsene na akupambulika.​—Mach. 5:​42.