Mboni za Yahova—Cikhulupiro m’Mabasa, Khundu 1: Kubuluka n’Cidima Kuenda mu Ceza

M’Bhibhlya, ceza cisalandaniswa na undimomwene, mbwenye cidima cisalandaniswa na unthawatawa. (Sal. 43:3; Iza. 5:20) Sathani abweresa cidima pa dziko yapantsi mu ndzidzi udanyengeta iye Eva, mu kupita kwa ndzidzi iye amwaza cidima pa dziko yonsene yapantsi. (Apok. 12:9) Vidyu yakuti Testemunhas de Jeová — Fé em Ação, Parte 1: Da Escuridão para a Luz isapangiza kuti ceza cauzimu catoma tani kuoneka pakati pa cidima. (Iza. 60:1, 2) Pakumala kuona vidyu ineyi, kodi munakwanisa kutawira mibvundzo iyi?

(1) Kodi cidima cakula tani mu ndzidzi udamala kufa apostolo? (2) Kutomera mu pyaka 1100, ninji pidaphedza anthu toera kuona kuti magereja nee akhapfundzisa undimomwene? (3) Henry Grew na George Storrs akhali ani? (4) Ndi pyakucitika pipi pidaoneka mu umaso wa Charles Russell pyakuti pikhadankhuya kakamwe? (5) Kodi M’bale Russell, babace na anango akhadziwana na iwo akhacita tani pfundziro yawo ya Bhibhlya ninga nsoka, pontho ndi mamalisiro api adafika iwo mwakubverana na Malemba? (6) Thangwi yanji nsoka unoyu wa Bhibhlya waphatana na nsoka wa Nelson Barbour, mbwenye ninji cidacitisa M’bale Russell kubuluka mu nsoka unoyu? (7) Ninji cidacitika mu nthanda ya Maluwa ya caka 1879 cakuti catomesa ndzidzi upswa wa ceza cauzimu? (8) Natenepa, ninji pidacita numero yakuthimizirika ya Anyakupfundza Bhibhlya toera kumwaza mphangwa zadidi? (9) Anyakupfundza Bhibhlya akhadikhiranji mu pyaka pizinji pyakuti mbipidacitika mu caka 1914? (10) Ndi pinentso pipi pidathimbana na Anyakupfundza Bhibhlya pidamala kufa M’bale Russell? (11) Ninji pidacita Anyakupfundza Bhibhlya mu ndzidzi udabuluswa M’bale Rutherford na andzace mu kaidi? (12) Kodi vidyu ineyi yathimizira tani kupereka kwanu takhuta ku gulu ya Yahova? (13) Kodi vidyu ineyi yawangisa tani kutonga kwanu toera kupitiriza kumwaza mphangwa mwaphinga mwakukhonda tsalakana mipingizo? (14) Tinaphatisira tani vidyu ineyi toera kuphedza acibale athu, anyakupfundza Bhibhlya, na anango?

Ndi unthaka wauzimu wakufunika kakamwe udatisiira Anyakupfundza Bhibhlya akutoma! Mu dziko ya cidima cauzimu, iwo akhali anyakumwaza ceza acipapo na aphinga. Tendeni titowezere citsandzo cawo na ‘kufamba ninga ana akumwinika.’—Aef. 5:8.