Tsidzikizani Cikumbuntima Canu
1. Ndi upi nsolo wa ntsiku ya nsonkhano wakupambulika wa caka ca basa ca 2013, na ndi cipi cifuniro ca programu ineyi?
1 Ntsiku ibodzi na ibodzi, tisathimbana na makhaliro akuti anaticitisa kukhonda bvera cikumbuntima cathu. Na thangwi ineyi, programu ya ntsiku ya nsonkhano wakupambulika wa caka ca basa ca 2013, cinafuna kutoma pa ntsiku 1 ya nthanda ya Nyenzi ya 2012, inadzakhala na nsolo wakuti: “Tsidzikizani Cikumbuntima Canu.” (1 Tim. 1:19, Tradução do Novo Mundo) Programu ya nsonkhano unoyu yakhunganywa toera kuphedza m’bodzi na m’bodzi wa ife kuonesesa kuti tikuphatisira tani muoni wakupambulika udapaswa ife na Nsasanyi wathu.
2. Ndi mibvundzo ipi yakufunika kakamwe inafuna kudzatawirwa nkati mwa programu ya nsonkhano?
2 Sakani Kugumana Matawiro A Mibvundzo Iyi: Programu inadzatawira mibvundzo minomwe yakufunika kakamwe inalonga pya cikumbuntima:
• Ninji pinafuna kwanisa kuikha pangozwi cikumbuntima cathu?
• Tinapfundzisa tani cikumbuntima cathu?
• Tinakwanisa tani kukhala nee mathangwi a ciropa ca anthu onsene?
• Kodi kunyerezera kwathu na kucita kwathu pinthu mwakubverana na midida ya Bhibhlya kusapangizanji thangwi ya ife?
• Tinacalira tani kuphekesa cikumbuntima ca anango?
• Aphale na atsikana, munapitiriza tani kukhala akuwanga pakuthimbana na mikakamizo toera kuswa miyambo ya Mulungu?
• Ndi nkhombo zipi zinatambira ale anatowezera cikumbuntima cakutsogolerwa na nzimu wa Mulungu?
3. Kodi programu inakwanisa tani kutiphindulisa?
3 Na ciphedzo ca Yahova, tinakwanisa kukunda kuwangisira kwa Sathani toera kuphekesa cikumbuntima cathu. Kubulukira ku Mafala a Mulungu na gulu yace, mwaufuni Babathu wakudzulu asatipanga: “Njira njiyi, ndokoni nayo.” (Iza. 30:21) Programu iyi ndi njira ibodzi inaphatisira Yahova toera kupereka citsogolero ceneci. Natenepa, citani masasanyiro toera kugumanika pa programu yonsene. Bveserani mwacidikhodikho, na dingani kuti munaphatisira tani mphangwa zenezi kwa imwe ene. Cedzani pya programu ineyi ninga banja. Kuphatisira kwathu pitsogolero pinafuna kudzatambira ife kunadzatiwangisa toera kupitiriza “kukhala na cikumbuntima cadidi”, na kunatiphedza toera kukhonda kunyengezwa na pinthu pyakukomeresa pya ndzidzi wakucepa pya dziko ya Sathani.—1 Ped. 3:16, NM.