‘Funani Nsoka Onsene Wa Abale’

Mafala akupumirwa anagumanika pa nsolo uno alembwa mu pyaka cifupi na pikwi piwiri nduli. (1 Ped. 2:17) Mbwenye tisafunika kuaphatisira kakamwe lero kupiringana kalene! Kodi tinakwanisa tani kufuna nsoka ukulu kakamwe ninga wa abale athu a dziko yonsene? Mu dziko ino yakusowa ufuni, tinacitanji kuti ufuni wathu ukhonde kuthowa? (Mat. 24:12) Onani khala munakwanisa kutawira mibvundzo iyi pa ndzidzi unaona imwe vidyu yakuti Nossa Associação Inteira de Irmãos.

(1) Ndi ndzidzi upi udatoma ife kucita khundu ya ubale wathu Wacikristu wa dziko yonsene? (2) Ndi mabasa api matatu anacita ife khundu pabodzi na abale athu a dziko yonsene? (3) Kodi abale athu asapangiza tani kutonga kwawo toera kumwaza mphangwa (a) mu cisa cikulu ca Alaska, (b) m’mbuto zikulu zakufikira maxitima a m’madzi ku Europa, na (c) m’misitu yakupata ya ku Peru? (4) Thangwi yanji cipo nee tisafunika kuona kuti basa yathu yakumwaza mphangwa ndi sawasawa na mabasa anango? (5) Longani pitsandzo pinapangiza kuti Mboni za Yahova zisawangisana tani, pontho zisaphedzana tani unango na ndzace (a) pakumala kucitika citeketeke, (b) pakumala kucitika condzi cikulu, na (c) mu ndzidzi wa nkhondo? (6) Ndi mu njira zipi zakuti tonsene tinakwanisa kupangiza cidzindikiro cikulu ca ubale wathu Wacikristu? (Jwau 13:35) (7) Ndi maphindu api anagumanika pakuphata basa pabodzi toera kumanga Nyumba zathu za Umambo? (8) Kodi abale na alongo athu a ku Mabulukiro a dzuwa kwa Europa na Rusiya apitiriza tani kukhala cifupi na Yahova mu ndzidzi udakhondeswa basa yathu yakumwaza mphangwa? (9) Ndi kuwangisira kupi kukulu kunacitwa na abale na alongo azinji toera kugumanika pa misonkhano, mphapo thangwi yanji? (10) Kodi vidyu ineyi yawangisa tani kutonga kwanu (a) toera kulambira Yahova pa misonkhano Yacikristu mwakuphatana pabodzi na abale anu, (b) toera kuphedza anango mu ndzidzi wa nyatwa, na (c) toera kumwaza mphangwa mwakukhulupirika mu ndzidzi onsene unakwanisa imwe ninga munakwanisa imwe? (11) Kodi tinaphatisira tani vidyu ineyi mu utumiki, pontho mu ndzidzi upi?

Thangwi ikulu yakucita kwathu khundu ya ubale wathu Wacikristu pa dziko yonsene ndi ufuni wathu kwa Yahova. Natenepa, ife tisafuna kakamwe kupfundza pya Yahova na kupfundzisa anango pya iye. Pontho tisafuna anthu anafuniwa na Yahova. Tingaaphedza m’midzidzi ya nyatwa, nee tisadikhira kuti Mulungu apereke takhuta kwa ife. Kusiyapo pyenepi, ife tisapereka takhuta kuna Mulungu thangwi tisaona ubale wathu Wacikristu wa dziko yonsene ninga sagwati wakufunika kakamwe wakubuluka kwa iye. Mu ndzidzi wakuti ntsiku zakumalisa za dziko ino yakusowa ufuni zikufika kunkhomo, tendeni tipitirize kupangiza ufuni kwa nsoka onsene wa abale athu!