Lekani Kupswipa Ntima—Mphangwa izi zabuluswa mu Anuário das Testemunhas de Jeová de 2013
Tsamba 138 ndima 2, mpaka tsamba 139 ndima 2—Myanmar
Mbatilekeni Kusiya Kugumanika pa Misonkhano
Pakumala kwa nkhondo ya 1988, makhaliro a mpfuma ya dziko ya Birmaniya atekera kakamwe. Ngakhale tenepa, abale na alongo akhulupira Mulungu mu kuikha pifuno pya Umambo pa mbuto yakutoma mu umaso wawo.—Mat. 6:33.
Mwacitsandzo, Cin Khan Dal wakuti akakhala pabodzi na banjace mu cisa cakutali na nzinda wa Sangaing, iye afokotoza. “Tikhafuna kakamwe kugumanika pa nsonkhano wa gawo ku Tahan, wakuti tikhafunika kucita ulendo wa ntsiku ziwiri na bote, pontho na motokala. Mbwenye nee pakhali munthu toera kuyang’anira nkhuku zathu panyumba. Ngakhale tenepa, tanyindira Yahova mbatigumanika pa nsonkhano wa gawo. Mudabwerera ife, tagumana kuti nkhuku 19 zaluzika, kukhali kuluza kukulu kakamwe. Pakupita caka cibodzi, nkhuku zathu zathimizirika kupiringana 60. Ngakhale kuti anthu azinji aluza nkhuku zawo thangwi ya citukwa, nee nkhuku ibodzi yathu idafa.”
Banja inango yakuwanga mwauzimu ikhali ya Aung Tin Nyunt na nkazace, Nyein Mya, akuti akakhala na ana apfemba mu cisa ca Kyonsha cakuti cisagumanika pa makilometru 64 kunkwiriro kwa nzinda wa Yangon. Aung Tin Nyunt alonga: “Kazinji kene pa banja yathu tikhadya usembe wa mpunga na masamba. Nee tikhali na kobiri peno cinthu toera kugulisa. Mbwenye nee tikhali akutsukwala. Ndapanga banjanga kuti: ‘Yezu nee akhali na mbuto toera kutsamiza nsolo wace. Ngakhale pingafunika kuti ndikhale pantsi pa muti peno kufa na njala ndinapitiriza kulambira Mulungu mwakukhulupirika.’
“Ntsiku ibodzi, nee tikhali na cakudya panyumba. Nkazanga na ananga andiyang’ana mwakudzudzumika. Ndaapanga: ‘Lekani dzudzumika, Mulungu anatiphedza.’ Pidamala ife phata basa mu utumiki na macibese, ndaenda kamedza pabodzi na ananga. Mbwenye tapha ntsomba zakucepa, basi ene toera kudya na masikati. Tasiya mabudu athu akhaphatisira ife pa kumedza cifupi na nkulo pa mabande, ndapanga ananga: ‘Tendeni, tinabwerera pontho pakumala misonkhano.’ Namaulo kwacita mphepo kakamwe. Pidabwerera ife ku nkulo, tagumana kuti ntsomba zizinji zikhali m’mabande thangwi ya mphepo. Natenepa takwata mabudu athu mbatitoma kuphata ntsomba zizinji, zakuti tazigulisa mbatigula cakudya ca sumana ibodzi.”
Kazinji kene, atumiki a Yahova ku Myanmar asaona kukwaniriswa kwa pikiro yacithondozo ya Mulungu: “Chipo na chipo ndinadzakusiya, mbandidzakukhonda.” Mwakukhonda penula iwo asalonga: “[Yahova] ndi nyakuphedza wanga, sinadzagopa pinthu tayu. Anthu anadzandichitiranji, mphapo?”—Aheb. 13:5, 6.