Kugawira Mabukhu Mu Cisa Cinalongwa Pilongero Pizinji
1 M’mbuto zizinji, musagumanika anthu adabuluka m’madziko anango. Azinji a iwo asapfundza mwakucimbiza kakamwe mbabvesesa mwadidi angapfundziswa mu cilongero cawo cacibaliro. Ndi masasanyiro api alipo toera kugawira mabukhu akubuluswa m’Bhibhlya mu cilongero cinabvesesa iwo mwadidi?
2 Kugawira Mabukhu: Khala mipingo miwiri peno mizinji ya pilongero pyakusiyana isamwaza mphangwa mu cisa cibodzi cene, misoka ya akulu a mpingo kubulukira mwa ayang’aniri a basa ya m’munda anadzacita masasanyiro akutawirika toera anthu a pilongero pyenepi amwazirwe mphangwa. Pakumwaza mphangwa nyumba na nyumba, amwazi mphangwa kazinji kene nee anagawira mabukhu a cilongero ca mpingo unango. Mbwenye pakupereka umboni wantsusukano peno m’mbuto zapakweca, iwo anakwanisa kugawira mabukhu mu pilongero pinalongwa pacisa. Onani Perguntas Respondidas mu Utumiki Wathu Wa Umambo wa Malimwe caka 2003.
3 Kukoya Mabukhu: Tinacitanji khala pacisa pana anthu azinji ene analonga cilongero cakunja, mbwenye nkhabe mpingo unalonga cilongero ceneci? M’makhaliro anewa, mipingo inakwanisa kukoya ntsama yakucepa ya mabukhu akufunika akuti asagumanika mu cilongero ceneci, ninga matratado na mabruxura. Amwazi mphangwa anakwanisa kugawira mabukhu anewa ndzidzi onsene unagumana iwo munthu analonga cilongero ceneci.
4 Kuphemba Mabukhu: Khala mpingo nee usakoya mabukhu mu cilongero ca munthu adapangiza cifuno, unakwanisa tani kuphemba mabukhu mu cilongero ceneci? Amwazi mphangwa asafunika kubvundza ntumiki wa mabukhu toera kuona kuti ndi mabukhu api anagumanika mu cilongero ceneci, natenepa anakwanisa kudziwa mabukhu anafunika kuphembwa pa kutumiza phembo ya mabukhu a mpingo paulendo unafuna kudza.
5 Khala pasafunika kucita pinthu mwakucimbiza, m’mwazi mphangwa anakwanisa kulonga na m’bodzi wa Komiti ya Basa ya Mpingo khala pinakwanisika kutumiza phembo mwakucimbiza mbidzati kufika ntsiku yakutumiza phembo ya mabukhu a mpingo. Pingatawiriswa, muyang’aniri wa mabukhu peno munthu unango adasankhulwa na iye, anakwanisa kutumiza phembo mwakucimbiza mu kuphatisira email peno kumenyera ntokodzi ofesi ya filiali. Mabukhu anewa anadzatumizwa munjira inatumizwa mabukhu ndzidzi onsene, peno munjira inango ya ndzidzi wakucepa, khala mphyakufunika. Khala mabukhu asafunika kutumizwa mwakucimbiza kakamwe, mpingo unadzalipa kobiri yakutumiza mabukhu anewa.
6 Tendeni tiphatisire mwadidi mabukhu athu Acikristu toera kuphedza “anthu onsene” mwakukhonda tsalakana cilongero cawo, toera ‘akhale na cidziwiso ca undimomwene mbapulumuka.’—1 Tim. 2:3, 4.