Munaphindula Tani Na Nsoka Wanu Wa Basa Ya M’Munda

1. Ndi Maphindu api a masasanyiro a Pfundziro Ya Bukhu Ya Mpingo akuti aciripo mpaka lero kubulukira ku nsoka wathu wa basa ya m’munda?

¹ Kodi musatsuwa makhundu anango a Pfundziro Ya Bukhu Ya Mpingo? Misoka ikhali ming’ono, pontho yakusudzuka kakamwe. Pyenepi pikhacitisa kukhala kwakukhonda nentsa kucita uxamwali wakuti ukhatiphedza kupitiriza kukhala akuwanga mu cikhulupiro cathu. (Mis. 18:24) Muyang’aniri wa pfundziro ya bukhu akhadziwa mwadidi makhaliro athu na akhakwanisa kupereka ciwangiso kwa m’bodzi na m’bodzi. (Mis. 27:23; 1 Ped. 5:2, 3) Maphindu anewa aciripo mpaka lero kubulukira ku nsoka wathu wa basa ya m’munda.

2. Kodi tinatoma tani kukulisa uxamwali mu nsoka wathu wa basa ya m’munda wakuti ndi phata yaciphedzo cauzimu?

² Tomani Ndimwe: Kazinji kene misoka ya basa ya m’munda ndi ming’ono ninga mukhali misoka ya pfundziro ya bukhu. Kuphata basa mu utumiki ‘pabodzi’ na anango, kusacitisa kukhala na uxamwali wacifupi. (Afil. 1:27) Mwaphata basa na anthu angasi a mu nsoka wanu? Kodi munakwanisa ‘kufungula ntima’ wanu toera kucita pyenepi? (2 Akor. 6:13) Kusiyapo pyenepi, m’midzidzi inango tinakwanisa kucemera m’bale peno mulongo wa mu nsoka wathu toera kukhala pabodzi na ife pa Kulambira kwathu Kwa Banja namaulo peno toera kudya pabodzi. M’mipingo inango, misoka ya basa ya m’munda isakhunganya cakudya toera kudya pabodzi na nyakucita nkhani wa mulendo. Pa sumana yakucedzerwa kwawo, nsoka usagumanyikana toera kudya pabodzi na kuwangisana ngakhale kuti nyakucita nkhani nkhabe kudikhira cakudya.

3. Ndi miyai ipi iripo mu nsoka wathu wa basa ya m’munda toera kucedzerwa?

³ Ngakhale kuti cincino mpingo usagumanyikana basi ene kawiri pa sumana, pyenepi nee pisabveka kuti amwazi mphangwa asafunika kucedzerwa pang’ono. Ayang’aniri a misoka aikhwa mu nsoka ubodzi na ubodzi toera kupereka ciwangiso kwa munthu m’bodzi na m’bodzi na toera kupfundzisa kucita basa ya utumiki. Khala muyang’aniri wa nsoka wanu adzati kucita masasanyiro toera kuphata basa pabodzi na imwe mu utumiki, thangwi yanji nkhabe kumphemba toera kuphata pabodzi? Mwakuthimizira, muyang’aniri wa basa ya m’munda asabuluka mu utumiki pabodzi na misoka yakusiyana-siyana kabodzi pakumala kwa sumana mu nthanda zonsene. M’mipingo ming’ono yakuti iri na misoka yakucepa ya basa ya m’munda, iye anakwanisa kucita masasanyiro toera kucedzera nsoka ubodzi na ubodzi kawiri pa caka. Kodi musacinja ndandanda yanu toera kuenda mu utumiki pa ndzidzi unacedzera muyang’aniri wa basa ya m’munda nsoka wanu?

4. (a) Kodi misonkhano ya basa ya m’munda isacitwa tani? (b) Thangwi yanji tisafunika kunyerezera pya kutawirisa nyumba yathu toera kucitirwa misonkhano ya basa ya m’munda?

⁴ Kazinji kene ndi pyakuphindulisa nsoka ubodzi na ubodzi kugumanyikana paokha toera kuenda m’basa ya m’munda pakumala kwa sumana. Kukhala na mbuto zizinji toera kugumanyikana toera kuenda mu utumiki pa ndzidzi ubodzi ene, pinacitisa kukhala kwakukhonda nentsa kwa amwazi mphangwa kucita ulendo wakwenda ku nsonkhano wa basa ya m’munda panango ku cisa. Amwazi mphangwa anakwanisa kukhunganyika mwakucimbiza na kuenda ku cisa mwakukhonda dembuka. Pontho, mphyakukhonda nentsa kwa muyang’aniri wa nsoka kutsalakana mwadidi anthu a mu nsoka wace. Mbwenye, makhaliro anacitisa kukhala kwakuthema kuti misoka miwiri peno mizinji igumanyikane toera kuphata basa pabodzi. Khala mpingo usagumanyikana pabodzi toera kuenda m’basa ya m’munda pa Sabudu yakutoma ya nthanda peno pakumala Pfundziro ya A Sentinela, kazinji kene ndi pyakuphindulisa nsoka ubodzi na ubodzi ukhale pace-pace, pontho nsonkhano wa basa ya m’munda mbusati kumaliswa na phembero, mphyadidi kuti muyang’aniri wa nsoka akhale na mphindi zingasi toera kucita masasanyiro a nsoka wace.—Onani bokosi “Kodi Munatawirisa Nyumba Yanu?”

5. Maseze masasanyiro a Pfundziro Ya Bukhu Ya Mpingo amala, kodi tinakwanisa kukhala na cinyindiro canji?

⁵ Maseze masasanyiro a Pfundziro Ya Bukhu Ya Mpingo amala, Yahova asapitiriza kutipasa pinthu pyonsene pinafuna ife toera kucita cifuno cace. (Aheb. 13:20, 21) Na citsalakano ca Yahova, nkhabe cinthu cinafuna sowa ife. (Sal. 23:1, Tradução do Novo Mundo) Nkhombo zizinji zisagumanika kubulukira mu nsoka wathu wa basa ya m’munda. Tingakhala akutoma kucita pinthu ‘mbatibzwala na manja akudzala, tinadzatutambo na manja akudzala.’—2 Akor. 9:6.

[Bokosi pa tsamba 6]

Kodi Munatawirisa Nyumba Yanu?

M’mipingo inango misoka ya basa ya m’munda isagumanyikana pa mbuto ibodzi ene pakumala kwa sumana thangwi nkhabe nyumba zizinji. Misonkhano ya basa ya m’munda ndi khundu ibodzi ya masasanyiro a mpingo, natenepa, kukhala na misonkhano ineyi panyumba yathu ndi mwai ukulu kakamwe. Kodi munatawirisa nyumba yanu? Lekani kubwerera nduli thangwi nyumba yanu ndi yakucepeseka. Akulu a mpingo anadzadinga makhaliro a mbuto inagumanika nyumba yanu na makhaliro anango akhadingwa pakusankhula mbuto za pfundziro ya bukhu. Khala musafuna kuti nyumba yanu iphatisirwe, dziwisani muyang’aniri wa nsoka wanu.