Misonkhano Ya Basa Ya M’munda Yakuti Isakwanirisa Cifuniro Cayo

1. Ndi cipi cifuniro ca misonkhano ya basa ya m’munda?

¹ Mu ndzidzi unango, Yezu asonkhana na anyakupfundzace 70 mbadzati kuenda kamwaza mphangwa. (Luka 10:1-11, Tradução do Novo Mundo) Iye aawangisa mukuadziwisa kuti nee mbadakhala okhene, iwo mbadatsogolerwa na ‘mwanaciro wa pinafuna kubvunwa,’ Yahova. Pontho iye aapasa pitsogolero pyakuti pyaakhunganya toera kucita basa mbaatuma ‘awiri-awiri.’ Lero, misonkhano inacita ife mbatidzati kuenda mu utumiki iri na cifuniro cibodzi cene​—kutiwangisa, kutipasa pitsogolero na kutikhunganya.

2. Kodi nsonkhano wa basa ya m’munda usafunika kumala mphindi zingasi?

² Mu ndzidzi uno, nsonkhano wa basa ya m’munda usamala mphindi 10 peno 15, wakuti usaphataniza kukhunganya misoka, kugawa cisa na kucita phembero. Pyenepi cincino pinacinja. Kutomera nthanda ya Bwinja, nsonkhano wa basa ya m’munda unadzakhala wa mphindi zixanu peno zinomwe. Mbwenye, ungacitwa pakumala misonkhano inango ya mpingo, usafunika kumala mphindi zakucepa kakamwe, thangwi abale amala kale kutsandzaya na pinthu Pyauzimu. Kukhala na misonkhano ya basa ya m’munda ya ndzidzi wakucepa kunacitisa anthu kuphatisira ndzidzi uzinji mu utumiki. Natenepa, apainiya peno amwazi mphangwa angatoma kumwaza mphangwa nsonkhano wa basa ya m’munda mbudzati kutoma, iwo asafunika kulimira mu ndzidzi wakucepa toera agumanikembo pa nsonkhano.

3. Kodi misonkhano ya basa ya m’munda inakhunganywa tani toera ikhale yakuphedza kwa amwazi mphangwa?

³ Misonkhano ya basa ya m’munda isafunika kukhunganywa toera ikhale yakuphedza kakamwe kwa amwazi mphangwa. M’mipingo mizinji pisakhala pyakuphedza misoka ya basa ya m’munda ingabuluka pace-pace mbuto mwa kusonkhana pabodzi pene. Pyenepi pisaphedza amwazi mphangwa toera kukhonda kufamba nsindzo wakulapha kuenda ku nsonkhano wa basa ya m’munda peno kucisa. Amwazi mphangwa anakwanisa kugawiwa mwakucimbiza, mbipicitisa kukhala pyakukhonda nentsa kwa ayang’aniri a nsoka kutsalakana mwadidi misoka yawo. Nsoka wa akulu a mpingo unakwanisa kudinga makhaliro apacisa mbuona kuti pyadidi ndi pipi. Mbamudzati kumalisa nsonkhano na phembero, onsene asafunika kudziwa kuti anaphata cisa cipi pontho na ani.

4. Thangwi yanji misonkhano ya basa ya m’munda nee isafunika kupwazwa?

⁴ Ndi Yakufunika Kakamwe Ninga Misonkhano Inango Ya Mpingo: Nakuti misonkhano ya basa ya m’munda isacitwa toera kuphedza ale anafuna kuenda mu utumiki, iyo nkhabe funika kubveserwa na anthu onsene m’mpingo. Mbwenye, pyenepi nee pisabveka kuti isafunika kucitwa mwaphwazo peno kuoniwa ninga nee ndi yakufunika kupiringana misonkhano inango ya mpingo. Ninga misonkhano yathu yonsene, misonkhano ya basa ya m’munda ndi masasanyiro a Yahova akuti asaticitisa kuwangisana unango na ndzace ku ufuni na m’mabasa adidi. (Aheb. 10:24, 25) Natenepa, nyakutsogolera asafunika kukhunganyika mwadidi toera nsonkhano ulemedze Yahova na kuphedza abale na alongo. Pingakwanisika, mbipidakhala pyadidi kuti amwazi mphangwa anafuna kuenda ku utumiki awangisire toera kugumanika pa nsonkhano unoyu.

5. (a) Ndi basa ipi iri na muyang’aniri wa basa ya m’munda pakucita masasanyiro a misonkhano ya basa ya m’munda? (b) Kodi mulongo asafunika kutsogolera tani nsonkhano wa basa ya m’munda?

⁵ Pinafuna Kukhunganya Nyakutsogolera: Toera munthu akhunganyike mwadidi kuti acite khundu pa nsonkhano, asafunika kupaswa khundu yace mwanyapantsi. Pyenepi ndi sawasawa na misonkhano ya basa ya m’munda. Natenepa, misoka ya basa ya m’munda ingasonkhana pace-pace, ayang’aniri a misoka peno abale anaaphedzera ndiwo anafuna kutsogolera nsonkhano unoyu. Mbwenye, mpingo ungacita pabodzi pene nsonkhano wa basa ya m’munda, muyang’aniri wa basa ya m’munda anadzasankhula m’bale m’bodzi toera kutsogolera. Ayang’aniri anango a basa ya m’munda asapasa ndandanda onsene anatsogolera, pontho asaikha ibodzi pa kwadru ya pidziwiso. Muyang’aniri wa basa ya m’munda asafunika kusankhula mwadidi anafuna kutsogolera, mbadziwa kuti toera misonkhano ikhale yakuphindulisa isanyindira maluso akupfundzisa na akukhunganyika a ale anatsogolera. Khala nkhabepo nkulu wa mpingo, ntumiki wakutumikira, peno m’bale unango wakuthema wakubatizwa toera kutsogolera ntsiku zinango, muyang’aniri wa basa ya m’munda asafunika kusankhula mulongo wakuthema wakubatizwa toera kutsogolera.​—Onani nsolo wakuti “Ingatsogolerwa Na Mulongo.”

6. Thangwi yanji m’bale adasankhulwa toera kutsogolera asafunika kukhunganyika mwadidi?

⁶ Tingapaswa nkhani pa Xikola Ya Utumiki Wa Mulungu peno pa Nsonkhano Wa Basa, ife tisakhunganyika mwadidi. Ndi akucepa mwa ife anadikhira mpaka ndzidzi wakuenda ku misonkhano toera kutoma kunyerezera pinafuna kulonga iye. Basa yakutsogolera nsonkhano wa basa ya m’munda isafunika kuoniwa munjira ibodzi ene. Nakuti cincino nsonkhano wa basa ya m’munda unadzakhala wa mphindi zakucepa, kukhunganyika mwadidi ndi kwakufunika kakamwe toera nsonkhano unoyu ukhale wakuphindulisa mbumala mu ndzidzi wakuthema. Kukhunganyika mwadidi kusaphatanizambo kudziwa cisa mwanyapantsi.

7. Ndi pinthu pipi pinafuna kudinga nyakutsogolera?

⁷ Ninji Pinafuna Kudingwa: Nakuti makhaliro a cisa na cisa asasiyana, m’bandazi wakukhulupirika nee asapereka tsamba ya nkhani za misonkhano ya basa ya m’munda. Bokosi ya nsolo wakuti “Nkati Mwa Nsonkhano Wa Basa Ya M’munda Munakwanisa Kudinga” perekani maonero mangasi. Kazinji kene, nsonkhano unadzacitwa ninga nkhani yakucedza. Ndzidzi unango, munakwanisa kuphataniza citsandzo peno vidyu yakuthema inagumanika mu jw.org. Pakukhunganyika nsonkhano wa basa ya m’munda, nyakutsogolera asafunika kunyerezera pinthu pyakuti pinawangisa na kupereka pitsogolero kwa anafuna kuenda mu utumiki ntsiku ineyi.

8. Ndi pinthu pipi pyakuphedza kakamwe toera kudingwa pa misonkhano ya basa ya m’munda Masabudu na Madimingu onsene?

⁸ Mwacitsandzo, Masabudu onsene, amwazi mphangwa azinji asagawira Ncenjezi na Despertai! Anthu azinji anaenda mu utumiki Masabudu onsene nee asabuluka pakati pa sumana, panango iwo ananentseka toera kukumbuka maperekero aumboni adakhunganya iwo pa Kulambira Kwawo Kwa Banja namaulo. Na thangwi ineyi, pinakhala pyakuphedza nyakutsogolera angalonga pya maperekero aumboni anagumanika mu Utumiki Wathu wa Umambo. Maonero anango ndi kulonga kuti tinaphatisira tani makhaliro apacisa, pyakucitika, peno firiyadu pakugawira marevista peno kuti tinacita tani masasanyiro a ulendo wakubwereza khala marevista atambirwa. Khala anango anagumanika pa nsonkhano wa basa ya m’munda aphatisira kale marevista anagawirwa, nyakutsogolera anakwanisa kuaphemba toera apereke maonero mangasi acigwagwa peno kulonga pyakugumana napyo pyakuwangisa. Madimingu onsene, nyakutsogolera anakwanisa kulonga pang’ono thangwi ya mabukhu anagawirwa nthanda ineyi. Mabukhu a pfundziro, ninga mabruxura Mphangwa Zadidi na Bverani Mulungu na bukhu Biblya Isapfunzisanji anakwanisa kugawirwa ntsiku zonsene, natenepa nyakutsogolera anakwanisa kulonga mwacigwagwa kuti tinagawira tani mabukhu anewa.

9. Ninji pinafuna kulongwa pakumala kwa sumana tingacita kampanya yakupambulika?

⁹ Khala mpingo ukucita kampanya yakupambulika pakumala kwa sumana, nyakutsogolera anakwanisa kulonga kuti tinagawira tani marevista mapswa pabodzi na ncemerero peno tratado, peno kulonga kuti tinacita tani munthu angapangiza cifuno. Maonero anango ndi kulonga pyakugumana napyo pinagomezera kufunika kwa makampanya anewa.

10, 11. Thangwi yanji kukhunganyika kwa amwazi mphangwa ndi kwakufunika toera misonkhano ya basa ya m’munda ikhale yakuphindulisa?

¹⁰ Pinafuna Kukhunganyika Amwazi Mphangwa: Amwazi mphangwa asacitambo khundu mukucitisa nsonkhano wa basa ya m’munda kukhala wakuphindulisa. Kukhunganyika mwanyapantsi, panango pa kulambira kwawo kwa banja, kunaaphedza toera kupereka maonero akuphindulisa kwa amwazi mphangwa andzawo . Kukhunganyika mwadidi kusaphatanizambo kukwata marevista na mabukhu anango mbadzati kuenda ku nsonkhano wa basa ya m’munda toera kuti onsene aende ku cisa mwakukhonda dembuka.

¹¹ Mphyakufunikambo kucita masasanyiro akufika pa nsonkhano wa basa ya m’munda nakweru. Inde, tisawangisira kufika nakweru m’misonkhano yonsene ya mpingo. Natenepa, pisadzudzumisa tingafika mwakudembuka pa nsonkhano wa basa ya m’munda. Munjira ipi? Nyakutsogolera asadinga pinthu pingasi mbadzati kupaka misoka. Khala pana amwazi mphangwa akucepa, iye anakwanisa kupereka maonero a kuenda ku cisa cidaphatwa basa pang’ono. Khala anango ali pa nsonkhano unoyu abuluka kutali pontho cisa ciri kutali, iye anakwanisa kugawa amwazi mphangwa anewa na ale ali na miotokala. Khala cisa ndi cakugopswa, nyakutsogolera anakwanisa kugawa abale pabodzi na alongo peno aphate basa cifupi na misoka ya alongo. Ale ali na ungumi wakunentseka anakwanisa kuphata basa mu nseu wadidi peno zinyumba za maxikada akucepa. Amwazi mphangwa apswa asafunika kuphata basa na amwazi mphangwa aluso. Mbwenye, amwazi mphangwa angafika mwakudembuka, kazinji kene masasanyiro anacitwa papswa toera kuphedza akudembuka. Natenepa, m’midzidzi inango tinakwanisa kukhala na mathangwi adidi akudembuka. Mbwenye, tingakhala na nsambo wakudembuka, tisafunika kubvundzika kuti pyenepi pisacitika thangwi yakukhonda kupereka takhuta ku misonkhano ya basa ya m’munda peno thangwi yakukhonda kwanisa kukhunganyika mwanyapantsi.

12. Khala kazinji kene musacita masasanyiro anu ene, ninji pinafunika imwe kudinga?

¹² Amwazi mphangwa anafuna kuenda m’munda anakwanisa kusankhula mwanyapantsi anafuna kubuluka na iwo peno kusankhulirwa. Khala kazinji kene musacita masasanyiro anu ene, kodi ‘munafungula mitima yanu’ mukuphata basa na amwazi mphangwa akusiyana-siyana mbuto mwa kuphata basa na munthu m’bodzi ene ndzidzi onsene? (2 Akor. 6:11-13) Kodi m’midzidzi inango munakwanisa kucita masasanyiro akubuluka na m’mwazi mphangwa mupswa toera kumphedza kuti athambaruke m’maluso ace akupfundzisa? (1 Akor. 10:24; 1 Tim. 4:13, 15) Bveserani mwacidikhodikho pitsogolero pyonsene pinapaswa imwe, kuphatanizambo kunafuna kamwaza imwe mphangwa. Nsonkhano ungamala, calirani kucinja masasanyiro adacitwa na bulukani mwakucimbiza.

13. Onsene angadziwa makhundu awo na kuacita, kodi misonkhano ya basa ya m’munda inadzakhala yakuphindulisa tani?

¹³ Anyakupfundza 70 adatuma Yezu, pakumala kumwaza mphangwa ‘abwerera akukomerwa.’ (Luka 10:17, NM) Mwakukhonda kupenula, kusonkhana kwa Yezu na iwo mbadzati kutoma kumwaza mphangwa kwaaphedza toera kupembera. Lero, misonkhano ya basa ya m’munda inakwanisambo kukhala na maphindu mabodzi ene. Onsene angadziwa makhundu awo na kuacita, misonkhano ya basa ya m’munda inatiwangisa, kutipasa pitsogolero na kutikhunganya toera kukwanirisa basa yathu ya kupereka ‘umboni kwa anthu a mitundu yonsene.’​—Mat. 24:14.

[Ntsonga ikulu pa tsamba 4]

Misonkhano ya basa ya m’munda nee isafunika kupwazwa peno kuoniwa ninga nee ndi yakufunika kupiringana misonkhano inango ya mpingo

[Ntsonga ikulu pa tsamba 5]

Pakukhunganyika nsonkhano wa basa ya m’munda, nyakutsogolera asafunika kunyerezera pinthu pyakuti pinawangisa na kupereka pitsogolero kwa anafuna kuenda mu utumiki ntsiku ineyi

[Bokosi pa tsamba 6]

Ingatsogolerwa Na Mulongo

Mulongo asafunika kuphimbira nsolo na kutsogolera nsonkhano wa basa ya m’munda mbadakhala pantsi. Pinafuna iye kudinga pisafunika kukhala pyakulandana na pikhafuna kudinga m’bale. Mu ndzidzi ubodzi ene asafunika kucalira kupereka maonero akuti akupfundzisa anthu ali penepo, iye anakwanisa kutomesa kucedza. Angaphemba mulongo unango toera kucita phembero, mulongo unoyu asafunikambo kuphimbira nsolo. M’bale wakubatizwa angafika pa nsonkhano mulongo mbadatoma kale kutsogolera, asafunika kusiya m’bale kuti amalise nsonkhano unoyu. Muyang’aniri wa basa ya m’munda asafunika kudinga makhaliro akuti m’midzidzi inango asacitika, mbapereka pitsogolero pyakuthema toera kucalira kugwegwedusa anango. Mwacitsandzo, panango mphale wang’ono wakubatizwa anakwanisa kugumanika pa nsonkhano unatsogolera mulongo, mbwenye akulu a mpingo asaona kuti iye nee athema toera kutsogolera nsonkhano. M’makhaliro anewa, muyang’aniri wa basa ya m’munda asafunika kupanga anthu anacita khundu ya nsonkhano unoyu kuti mulongo ndi anafuna kutsogolera nsonkhano, mbwenye m’bale ndi anafuna kucita phembero khala akulu a mpingo aona kukhala pyakuthema. Peno pinacitika kuti pa nsonkhano unoyu pana m’bale wakuti akhondeswa kutsogolera nsonkhano peno kucita phembero pa mpingo thangwi ya pinango pinadziwa akulu a mpingo. Mukukhonda kulonga mphangwa zacibisobiso, akulu a mpingo asafunika kudziwisa alongo akusankhulwa kuti ndiwo anafunika kutsogolera na kucita phembero maseze m’bale unoyu ali penepo. Akulu a mpingo asafunika kudziwisambo m’bale unoyu ntsiku zinafuna kutsogolera alongo misonkhano ya basa ya m’munda.

[Bokosi pa tsamba 6]

Nkati Mwa Nsonkhano Wa Basa Ya M’munda Munakwanisa Kudinga:

• Maperekero aumboni anagumanika mu Utumiki Wathu wa Umambo.

• Vidyu yakuthema inalonga pya utumiki inagumanika mu jw.org.

• Khundu inango ya maperekero aumboni adidi, ninga mafala akutoma, kucita masasanyiro a ulendo wakubwereza, peno kulonga masasanyiro a pyakupereka pyaufulu khala marevista atambirwa.

• Lemba yakuwangisa peno yakupasa citsogolero yakuti isabverana na utumiki.

• Pyakugumana napyo pya basa ya m’munda pyapacisa peno pya m’mabukhu athu.

• Mphangwa zinagumanika m’misolo ya Utumiki Wathu wa Umambo.

• Mphangwa zinagumanika m’makhundu a cincino a Nsonkhano wa Basa.

• Mphangwa zinagumanika mu Ncenjezi zinalonga pya utumiki.

• Mphangwa zinagumanika m’mabukhu ninga Escola do Ministério na “Bwera Dzanditowera” zinalonga pya utumiki.

• Khundu inango ya jw.org yakuti inaphatisirwa mu utumiki.

• Mphangwa zinagumanika n‘kabukhu Mafala Akutoma a Bhibhlya zakuti zinaphatisirwa mu utumiki.

• Tinatomesa tani makani na anthu anagumana ife mu cisa cathu, ninga anakhonda kukhulupira kukhalapo kwa Mulungu, anakhulupira kusanduka kwa pinthu, Maindu, peno Abhudhista.

• Tinatawira tani anthu akuti panango anatigwanda mafala.

• Munaphedza tani ndzanu wa basa ya m’munda kukhala wa luso yadidi angafika panyumba.

• Munacita tani mungagumana anthu analonga cilongero cinango.

• Munaphata tani basa mu khundu inango ya utumiki inacita andzanu, ninga basa yakusaka anthu analonga cilongero cinango, kupereka umboni mukuphatisira ntokodzi, umboni wapakweca, maulendo akubwereza, peno mapfundziro a Bhibhlya.

• Kufunika kwa kukhala akutsidzikizika, akucimbiza kucita pinthu, a makhaliro adidi, maonero adidi, peno pinango pyakulandana na pyenepi.