Simbani Yahova Mukutumikira Ninga Mpainiya

Aizraeli akhali na mathangwi mazinji toera kusimba Yahova. Iye aabulusa ku Ejitu, pontho aatsidzikiza toera akhonde kuphiwa na anyankhondo a Farau. (Eks. 15:1, 2) Yahova asapitiriza kucita pinthu pyadidi kuna atumiki ace. Tinapangiza tani kuti tisapereka takhuta kuna Yahova thangwi ya pinthu pinacita iye kuna ife?—Masal. 116:12.

Njira ibodzi ndi kutumikira ninga mpainiya wakuphedza peno wa ndzidzi onsene. Imwe mungacita phembero kuna Yahova, iye anakupasani cifuno na mphambvu toera kutumikira ninga mpainiya. (Afil. 2:13) Azinji asatoma kutumikira ninga apainiya akuphedza. Mungatumikira ninga mpainiya wakuphedza, munakwanisa kupereka maora 30 peno 50 mwezi wa Março na Abril peno mwezi unafuna kucedzerwa imwe na muyang’aniri wa cisa. Mungakomerwa na kutumikira ninga mpainiya wakuphedza, panango munadzafuna kutumikira ninga mpainiya wa ndzidzi onsene. Abale na alongo anango akuti asaphata basa ntsiku yamumphu peno asathimbana na nyatwa za ungumi asakwanisa kutumikira ninga apainiya a ndzidzi onsene. (Umaso Wathu Wacikristu na Utumiki 16/07 tsa. 8) Mwandimomwene, ndi Yahova adathema kusimbwa na kuwangisira konsene kunacita ife.—1 Pya dziko. 16:25.

ONANI VIDHYU YA NSOLO WAKUTI ALONGO ATATU A KU MONGOLIA, BULUKA PENEPO TAWIRANI MIBVUNDZO IYI:

• 

  Ndi pinentso pipi pidathimbana na alongo atatu, pontho apikunda tani toera kutumikira ninga apainiya?

• 

  Ndi nkhombo zipi zidakhala na iwo?

• 

  Ndi miyai ipi idakhala na iwo thangwi yakutumikira ninga apainiya a ndzidzi onsene?

• 

  Pinthu pidacita iwo pyakhuya tani anango?