Citani Masasanyiro Cincino toera Kuthimizira Utumiki Wanu
1. Ndi cinthu cipi cakufunika pa ndzidzi wa Cikumbuso, pontho tinakhunganyika tani?
1 Midzidzi yonsene ya Cikumbuso isatipasa miyai ipswa toera ‘kucita takhuta wankulu kuna Yahova.’ (Sal. 109:30) Munadzathimizira utumiki wanu nkati mwa nthanda ya Murope ninga njira ibodzi yakupereka takhuta kuna Mulungu adapereka ciomboli? Cincino ndi ndzidzi toera kutoma kucita masasanyiro.—Mis. 21:5.
2. Kodi imwe na anango mwatawira tani masasanyiro a ndzidzi udapungulwa toera kutumikira ninga apainiya akuphedza mu nthanda ya Bwinja ya caka cidamala?
2 Upainiya Wakuphedza: Caka cidamala mipingo yatsandzaya kakamwe mudapfundza iyo kuti ndi pyakukwanisika kukhala mpainiya wakuphedza mu nthanda ya Bwinja mu kupereka midzidzi yakucepa ikhaphembwa. M’bale m’bodzi alemba: “Ndiciri kupfundza mapfundziro apadzulu, nee ndikhaona kuti ndi pyakukwanisika kwa ine kukhala mpainiya wa ndzidzi onsene. Mbwenye ndinalembesa toera kupereka midzidzi 30 na kuwangisira toera kupereka midzidzi 50 mu nthanda ya Bwinja.” Mulongo m’bodzi anaphata basa ya ndzidzi onsene alemba: “Midzidzi makumatatu ndi yakukhonda nentsa kukwanirisa!” Mu ndzidzi udadziwiswa masasanyiro anewa, mpainiya wakale m’bodzi, wakuti cincino ali nkati mwa pyaka 80, alonga: “Uyu ndi ndzidzi wadidi ukhadikhira ine! Yahova asadziwa kuti upainiya ukhali ndzidzi wadidi kakamwe mu umaso wanga!” Anango akuti nee akwanisa kukhala apainiya akuphedza akhala na pifuno pyakuthimizira utumiki wawo.
3. Ndi mathangwi api alipo toera kudinga upainiya wakuphedza nkati mwa nthanda za Murope, Bwinja na Gonkho?
3 Nthanda ya Murope inadzakhala yadidi toera kutumikira ninga mpainiya wakuphedza thangwi tinadzapaswa pontho mwai wakusankhula kupereka midzidzi 30 peno 50. Mwakuthimizira, kutomera pa Sabudu, ntsiku 17 ya Murope, tinadzacita khundu mu kampanya yakupambulika toera kucemera anango kuti agumanike pabodzi na ife pa Cikumbuso pa ntsiku 5 ya Bwinja. Azinji anadzatsandzaya kakamwe mu kucita kwawo khundu mu utumiki kwakuti anadzafuna kutumikira pontho ninga apainiya akuphedza mu nthanda ya Bwinja na Gonkho, ngakhale anadzaphembwa midzidzi 50.
4. Tinakwanisa tani kuthimizira kucita kwathu khundu mu utumiki, na tinadzakhala na maphindu api?
4 Nkati mwa Kulambira kwanu kwa Banja namaulo kunafuna kudza, thangwi yanji nkhabe kudinga kuti munthu m’bodzi na m’bodzi pa banja anakwanisa tani kuthimizira utumiki wace nkati mwa ndzidzi wa Cikumbuso? (Mis. 15:22) Phembani Yahova toera apase nkhombo kuwangisira kwanu. (1 Jwau 3:22) Mu ndzidzi unathimizira imwe utumiki wanu, tayu basi ene munadzathimizira kusimba kwanu Yahova mbwenye kutsandzaya kwanu kunadzathimizirikambo.—2 Akor. 9:6.