Munadzakhala Mpainiya Wakuphedza?

1. Thangwi yanji ndzidzi wa Cikumbuso ndi wadidi toera kuthimizira utumiki wathu?

¹ Ndzidzi wa Cikumbuso ndi wadidi toera kuthimizira utumiki wathu. Ndi ndzidzi unanyerezera ife ufuni ukulu udapangiza Yahova pakupereka Mwanace ninga ciomboli. (Jwau 3:16) Tisapereka takhuta kakamwe thangwi ya pidaticitira Yahova, pontho pyenepi pisathimizira cifuno cathu cakupanga anango pya Yahova na pinacita iye kwa anthu. (Iza. 12:4, 5; Luka 6:45) Pontho ndi ndzidzi unakhala ife na kampanya yakupambulika toera kucemera ale anadziwana na ife na anthu a mu cisa cathu toera kugumanika pabodzi na ife pa Cikumbuso. Buluka penepo, tisawangisira toera kukulisa cifuno ca ale adagumanika pa Cikumbuso. Kodi munadzathimizira utumiki wanu mu kukhala mpainiya wakuphedza mu nthanda ya Murope, Bwinja, peno Gonkho?

2. Thangwi yanji nthanda ya Murope ndi yadidi kakamwe toera kukhala mpainiya wakuphedza?

² Citani Kuti Nthanda Ya Murope Ikhale Yakupambulika: Nthanda ya Murope inadzakhala yadidi toera kukhala mpainiya wakuphedza. Ale anafuna kukhala apainiya anakwanisa kusankhula kupereka midzidzi 30 peno 50. Khala muyang’aniri wa cisa anacedzesa mpingo wanu mu nthanda ya Murope, apainiya akuphedza anakwanisa kugumanika pa nsonkhano onsene wa apainiya a ndzidzi onsene na akupambulika. Kampanya yakugawira micemerero ya Cikumbuso cakuti cinadzacitwa n’Cipiri, 26 ya Murope ya 2013, iri na ntsiku zizinji mwakusiyana na pyaka pya nduli, pontho inadzatoma pa ntsiku 1 ya Murope. Mwakuthimizira, nthanda ya Murope inadzakhala na masabudu maxanu na madimingu maxanu. Mphapo, thangwi yanji nkhabe kudinga mwacidikhodikho khala munakwanisa kucita khundu toera nthanda ineyi ikhale yakupambulika kakamwe caka cino?

3. Tinacita tani masasanyiro toera kuthimizira utumiki wathu?

³ Citani Masasanyiro Cincino: Uno ndi ndzidzi toera kudinga makhaliro anu mbamuona kuti ninji pisafunika imwe kusasanyira toera mukwanise kukhala mpainiya. Kubverana ninga banja ndi kwakufunika, natenepa, phatisirani ndzidzi wanu wa Kulambira Kwa Banja namaulo toera kudinga pifuno pya banja yanu na kucita ndandanda. (Mis. 15:22) Khala nee munakwanisa kukhala mpainiya wakuphedza, lekani kufewa manungo. Munakwanisa kucinja ndandanda wanu toera kuphatisira ndzidzi uzinji mu ntsiku zinaenda imwe mu utumiki? Munakwanisa kuthimizira ntsiku inango nkati mwa sumana toera kuenda mu utumiki?

4. Ndi maphindu api anafuna kudzakhala na ife tingathimizira basa yathu mu nthanda ya Murope, Bwinja, na Gonkho?

⁴ Tingathimizira basa yathu mu nthanda ya Murope, Bwinja, na Gonkho, tinadzathimizira kukomerwa na kutsandzaya kunakhala na ife pakutumikira Yahova na kupasa anango. (Jwau 4:34; Mach. 20:35) Cinthu cakufunika kakamwe ndi cakuti kuwangisira kwathu kwa kudzimana kunadzakoresa Yahova.​—Mis. 27:11.