Citisani Ndzidzi Wa Cikumbuso Kukhala Wakutsandzayisa!
1. Ndi ipi njira ibodzi yakuthimizira kutsandzaya kwathu mu ndzidzi wa Cikumbuso?
1 Musafuna kuthimizira kutsandzaya kwanu mu nthanda za Murope, Bwinja, na Gonkho? Njira ibodzi yakucita pyenepi ndi kutumikira ninga mpainiya wakuphedza, pingakwanisika. Kodi pyenepi pinadzathimizira tani kutsandzaya kwanu?
2. Kodi kuthimizira utumiki wathu kusathimizirambo tani kutsandzaya kwathu?
2 Thimizirani Kutsandzaya Kwanu: Yahova aticita na luso yakuti tinakwanisa kutsandzaya na kukomerwa kubulukira mu kumulambira munakwanirisa ife pyakusowa pyathu pyauzimu. (Mat. 5:3, Tradução do Novo Mundo) Iye aticitambo mu njira yakuti tinakwanisa kutsandzaya kubulukira mu kupasa anango. (Mach. 20:35) Utumiki usatiphedza kucita piwiri pyene—kulambira Mulungu na kuphedza anango. Mwandimomwene, kuthimizira utumiki wathu kusathimizirambo kutsandzaya kwathu. Kusiyapo pyenepi, tingathimizira kumwaza mphangwa, tisakhalambo na maluso akuthimizirika. Munathimizirika maluso athu, tisathimizirambo cinyindiro cathu na kupungula kugopa kwathu. Tinadzakhala na miyai mizinji yakupereka umboni na kutomesa mapfundziro a Bhibhlya. Pyenepi pisacitisa utumiki kukhala wakutsandzayisa.
3. Thangwi yanji Murope na Bwinja ndi nthanda zadidi toera kutumikira ninga apainiya akuphedza?
3 Murope na Bwinja ndi nthanda zadidi toera kutumikira ninga apainiya akuphedza, thangwi tinakwanisa kusankhula kupereka midzidzi 30 peno 50. Mwakuthimizira, kutomera n’Sabudu ntsiku 22 ya Murope mpaka pa Cikumbuso cinafuna kucitwa n’Ciposi ntsiku 14 ya Bwinja, tinadzacita khundu mu kampanya yakucemera anango toera kugumanika pa Cikumbuso. Mipingo inadzatsandzaya kakamwe mu kuphata basa ‘phewa na phewa’ toera kugawira micemerero mu pisa pyawo pyonsene pa ndzidzi wakuthema.—Sof. 3:9.
4. Khala tisafuna kutumikira ninga apainiya akuphedza, tisafunika kucitanji?
4 Khunganyikani Cincino: Khala mwadzati kukhunganyika, bandzani ndzidzi toera kudinga ndandanda yanu, mbamuona masasanyiro asafunika imwe kucita toera kuthimizira utumiki wanu mu nthanda ibodzi peno zizinji. Citani phembero thangwi ya pyenepi. (Tgo. 1:5) Cedzani pyenepi na banja yanu, pontho na anango m’mpingo. (Mis. 15:22) Panango, munadzaona kuti mwakukhonda tsalakana nyatwa za ungumi peno mabasa mazinji, munakwanisambo kutsandzaya mu kutumikira ninga mpainiya wakuphedza.
5. Kuthimizira utumiki wathu mu ndzidzi wa Cikumbuso, kunadzabweresanji?
5 Yahova asafuna kuti atumiki ace akhale akutsandzaya. (Sal. 32:11) Tingawangisira toera kuthimizira utumiki wathu mu ndzidzi wa Cikumbuso, nee tinadzathimizira kutsandzaya kwathu basi, mbwenye tinadzakomeresambo Babathu wakudzulu.—Mis. 23:24; 27:11.