MBIRI YA UMASO
Ndaikha Yahova pa Mbuto Yakutoma mu Pisankhulo Pyanga Pyonsene
NTSIKU inango namacibese mu caka ca 1984, ine ndabuluka panyumba mbandienda ku mbuto ikhaphata ine basa mu nzinda wa Caracas, mu dziko ya Venezuela. Mu ndzidzi ukhaenda ine, ine ndikhanyerezera thangwi ya nsolo unango wa revista ya Ncenjezi. Nsolo unoyu ukhalonga kuti mavizinyu athu asationa tani. Pidayang’ana ine mavizinyu anga ndabvundzika: ‘Kodi iwo asandiona basi ene ninga nyabasa wadidi wa mu bhanko? Kodi iwo asandiona ninga ntumiki wa Mulungu wakuti asaphata basa mu bhanko toera kuphedza bajace?’ Ine ndadzindikira kuti mavizinyu anga akhandiona basi ene ninga nyabasa wadidi wa mu bhanko, natenepa ndanyerezera kucinja makhaliro anga.
Ine ndabalwa ntsiku 19 ya Maio ya caka ca 1940, mu nzinda wa Amioûn, ku Libhano. Pidapita pyaka pingasi, tafuluka mbatienda kakhala ku nzinda wa Tripoli, anyakubalanga akhali aufuni, pontho akhafuna kakamwe Yahova Mulungu. Ife tabalwa axanu, mbwenye ine ndikhali wakumalisira bere. Anyakubalanga nee akhafuna kakamwe kobiri. Pa banja pathu, pinthu pyakufunika kakamwe pikhali kupfundza Bhibhlya, kuenda ku misonkhano na kuphedza anango toera kudziwa Mulungu.
Mu mpingo mwathu mukhali na Akristu azinji akudzodzwa. M’bodzi wa iwo akhacemerwa Michel Aboud, wakuti akhatsogolera pfundziro ya bukhu. Iye apfundza undimomwene ku Nova York, buluka penepo aenda ku Libhano mbatomesa basa yakumwaza mphangwa mu caka ca 1920. Ndisakumbuka kuti iye apangiza cilemedzo kakamwe, pontho aphedza atsikana awiri adakursari Jiliadhe anacemerwa Anne na Gwen Beavor. Pontho atsikanana anewa adzakhala axamwali athu a ponda ndipondembo. Pidapita pyaka pizinji, ine ndaonana pontho na Anne ku Estados Unidos. Mukupita kwa ndzidzi, ndaonanambo na Gwen wakuti mu ndzidzi unoyu iye akhadamanga banja na Wilfred Gooch, pontho iwo akhatumikira pa Bheteli ya Londres ku Inglatera.
BASA YATHU YAKUMWAZA MPHANGWA KU LIBHANO
Mu ndzidzi ukhali ine m’phale, ku Libhano nee kukhali na Mboni za Yahova zizinji. Mbwenye ife tikhamwaza mphangwa mwaphinga kuna anango. Ife tikhacita pyenepi mwakukhonda tsalakana kutcingwa na atsogoleri anango a mauphemberi. Ine ndisakumbuka mwadidi pinthu pinango pidacitika kuna ife.
Ntsiku inango, ine na mwanankazianga anacemerwa Sana tikhamwaza mphangwa pa nyumba inango. Natenepa padhri abwera pakhali ife mu ndzidzi ukhacedza ife na anaciro nyumba. Pisaoneka kuti iye akhadacemerwa na munthu unango. Padhri unoyu atoma kutikana mwanankazianga. Iye atoma kucita pinthu pyauphanga, mbasukhuma Sana mpaka kufuna kum’phekesa. Buluka penepo munthu unango aligariri apolixa, pidabwera apolixa anewa iwo aphedza Sana. Iwo akwata padhre unoyu mbaenda naye ku esquadra, kweneku iwo adzindikira kuti padhri unoyu akhali na mpfuti. Nkulu wa apolixa ambvundza: “Kodi iwe usapfundzisa anthu pinthu pya Mulungu peno usaapfundzisa pyauphanga?”
Cinthu cinango cinakumbuka ine ndi ndzidzi udalugari mpingo wathu maxibhombo toera kuenda kamwaza mphangwa ku mbuto yakuti nee ikhali na amwazi mphangwa. Ife tikhali akutsandzaya kakamwe mpaka ndzidzi udabwera padhri na anthu anango toera kutitsalakana mwakuipa. Iwo atitsalakana mwakuipa, ngakhale kutiponyera miyala, pontho pai wanga aphekeswa. Natenepa iye akhabuluka ciropa kunkhope kwace. Iye na mai wanga aenda ku mbuto idasiya ife maxibhombo, pontho ife taatowera mwakutsukwala. Mbwenye ine nee ndinaduwala mafala adalonga mai wanga kuti: “Yahova, alekerereni. Iwo nee asadziwa pinacita iwo.”
Ntsiku inango, ife taenda kaona acibale athu mu nzinda udabuluka ife. Pidafika ife panyumba pa yavu wanga, tagumana kuti m’bodzi wa atsogoleri auphemberi akhali penepo. Nkulu unoyu wa uphemberi akhadziwa kuti anyakubalanga akhali Mboni za Yahova. Maseze ine ndikhali basi ene na pyaka pitanthatu pyakubalwa, iye andibvundza: “Iwe, thangwi yanji nee wabatizwa?” Ine ndatawira kuti ndikhali mwana kakamwe, pontho toera kubatizwa ine ndikhafunika kudziwa pizinji thangwi ya Bhibhlya, pontho ndikhafunika kukhala na cikhulupiro cakuwanga. Nakuti iye nee akomerwa na ntawiro wanga, apanga yavu wanga kuti ndine wakusowa cilemedzo.
Mbwenye pinthu pyenepi pyakutsukwalisa nee pikhaticitikira kazinji kene. Thangwi anthu a ku Libhano, kazinji kene ndi auxamwali, pontho asatambira mwadidi alendo. Na thangwi ineyi, ife tikhakwanisa kumwaza mphangwa kuna anthu azinji, pontho tikhakwanisa kucitisa mapfundziro a Bhibhlya na anthu anewa.
TAFULUKA MBATIENDA KU DZIKO INANGO
Mu ndzidzi ukhapfundza ine xikola, m’bale unango abuluka ku Venezuela mbabwera ku Libhano. Iye akhasonkhana mu mpingo mwathu, pontho adziwana na mwanankazianga anacemerwa Wafa. Mukupita kwa ndzidzi, iwo amanga banja mbaenda kakhala ku Venezuela. Matsamba akhatilembera Wafa akhakulumiza pai wanga toera tifuluke kuti tikakhale ku Venezuela. Iye akhacita pyenepi thangwi akhatitsuwa kakamwe. Mukupita kwa ndzidzi, ife tafuluka mbatienda kweneku.
Ife tafika ku Venezuela mu caka ca 1953, pontho taenda kakhala ku Caracas, cifupi na nyumba ya prezidenti. Nakuti ndikhali mwana, ine ndikhakomerwa kakamwe kuona prezidenti midzidzi inango mbakapita na karu yace yakubalika kakamwe. Kuna anyakubalanga, pikhali pyakunentsa toera kudzolowera makhaliro, cilongero, cakudya na temperatura ya dziko ineyi. Mwandimomwene, pidatoma iwo kudzolowera umaso wa kweneku, kwacitika cinthu cakutsukwalisa kakamwe.
Pai wanga. Mai wanga. Mu caka ca 1953, ine ndiri ku Venezuela pabodzi na banja yathu
KUCITIKA KWA CINTHU CAKUTSUKWALISA KAKAMWE
Pai wanga akhali wamphambvu, pontho waungumi wadidi. Mbwenye pidatoma iye kuduwala, ife tadzudzumika kakamwe. Pontho ife nee ndikhakumbuka khala iye akhadaduwala kale pyaka pya nduli. Mbwenye maefermero alonga kuti iye akhali na utenda wa cancer, buluka penepo acitwa operasau. Mwakutsukwalisa, pidapita sumana ibodzi, iye alowa.
Pinthu pyenepi pidacitika, pyatitsukwalisa kakamwe. Ine ndikhali na pyaka 13 pyakubalwa. Ife nee tikhadikhira kuti baba mbadalowa, pontho tikhapibva kuti cipo tinakhala pontho wakutsandzaya. Kusiyapo pyenepi, papita ndzidzi uzinji toera mama aduwale pyenepi. Mbwenye ife taona kuti tisafunika kuyang’ana ntsogolo, pontho na ciphedzo ca Yahova, ife takwanisa kucita pyenepi. Pikhali ine na pyaka 16 ndamalisa xikola ku Caracas, natenepa ndikhafuna kakamwe kuphedza banjathu.
Mwanankazianga Sana pabodzi na mamunace Rubén, andiphedza kakamwe toera ndithambaruke mwauzimu
Pakupita kwa ndzidzi, mwanankazianga Sana amanga banja na Rubén Araujo, wakuti akhadakursari Xikola ya Jiliadhe, pontho ndzidzi unoyu akhadabwerera ku Venezuela. Mbwenye iwo afuluka mbaenda kakhala ku Nova York. Acibale anga alonga kuti ndiende kapfundza ku universidade, natenepa ine ndaenda ku Nova York. Kweneko ine ndikakhala pabodzi na kunyado wanga. Pontho iwo andiphedza kakamwe toera ndithambaruke mwauzimu. Kusiyapo pyenepi, mu mpingo wathu wa Cixipanyola mukhali na abale azinji akukola mwauzimu. Ine ndakomerwa kakamwe kudziwa awiri mwa abale anewa akuti akhali Milton Henschel na Frederick Franz; pontho uwiri wawo akhatumikira ku Bheteli ya ku Brooklyn.
Ndabatizwa mu caka ca 1957
Mu caka cakutoma cikhali ine ku universidhadhe, ine ndatoma kunyerezera thangwi ya umaso wanga. Ine ndaleri na kunyerezera mwacidikhodikho misolo ya Ncenjezi inalonga pya Akristu akuti akhali na pifuno pyakutumikira Yahova. Ine ndikhaona kutsandzaya kukhali na apainiya na Mabhetelita mu mpingo mwathu, pontho ndikhafunambo kukhala ninga iwo. Mbwenye ine ndikhadzati kubatizwa. Natenepa ine ndaona kuti ndikhafunika kuperekeka kuna Yahova. Ine ndaperekeka kuna Yahova mbandibatizwa ntsiku 30 ya Março mu caka ca 1957.
PISANKHULO PYAKUFUNIKA KAKAMWE
Pidamala ine kubatizwa, ndatoma kunyerezera pya kutumikira ninga mpainiya. Ine ndikhafuna kakamwe kutumikira ninga mpainiya, mbwenye ndatoma kuona kuti pyenepi mbipidandinentsa kakamwe. Thangwi ine nee ndikhadziwa khala mbindidakwanisa kupfundza ku universidhadhe mu ndzidzi ubodzi ene mbanditumikira ninga mpainiya. Ine na acibale anga tikatumizirana matsamba mazinji akuti akhalonga thangwi ya cisankhulo canga cakusiya kupfundza ku universidhadhe toera ndibwerere ku Venezuela kuti ndikatumikire ninga mpainiya.
Ine ndabwerera ku Caracas mwezi wa Junho mu caka ca 1957. Mbwenye ndikhakwanisa kuona kuti makhaliro a banja yathu nee akhali mwadidi. Pakhafunika kuti munthu m’bodzi wa pa banja pathu aphate basa toera akwanise kuphedza panyumba. Kodi ine mbidakwanisa tani kucita pyenepi? Ine ndikhadagumana basa mu bhanko, mbwenye ine ndikhafuna kakamwe kutumikira ninga mpainiya. Mwandimomwene, ineyi ndi thangwi idandicitisa toera kubwerera ku Venezuela. Ine ndikhali wakutonga toera kucita mabasa mawiri ene. Mu pyaka pizinji, ine ndaphata basa ku bhanko, mu ndzidzi ubodzi ene mbanditumikira ninga mpainiya. Ine ndikhali na mabasa mazinji, mbwenye ndikhali wakutsandzaya kakamwe!
Toera kuthimizira kutsandzaya kwanga, ine ndamanga banja na mulongo wa ku Alemanya wakubalika anacemerwa Sylvia, pontho iye akhafuna kakamwe Yahova. Iye akhadabwera ku Venezuela pabodzi na anyakubalace. Mukupita kwa ndzidzi ife tabala ana awiri, Michel (Mike) na Samira. Kusiyapo pyenepi, ine ndikhali na basa yakutsalakana mai wanga thangwi iye akakhala na ife. Maseze ine ndikhadasiya kutumikira ninga mpainiya toera kutsalakana banja yanga, mbwenye ndikhapitiriza kukhala na cifuno ceneci. Ine na Sylvia, tingabuluka ferya tikhatumikira ninga apainiya akuphedza.
CISANKHULO CINANGO CAKUFUNIKA KAKAMWE
Mu ndzidzi udacitika pinthu pidalonga ine pakutoma pa nsolo uno, anapiana anga akhapitiriza kupfundza. Mu ndzidzi unoyu, umaso wanga ukhali mwadidi kakamwe, pontho ndikhalemedzwa na anthu akhaphata na ine basa ku bhanko. Ngakhale tenepo, ndikhafuna kakamwe kudziwika ninga ntumiki wa Yahova. Ine ndapitiriza kunyerezera pinthu pikhafunika ine kucita toera anthu andione munjira inango. Natenepa, ine na nkazanga takhala pantsi toera kucedza thangwi ya kobiri ikhali na ife. Mbidasiya kuphata basa ku bhanko, ine mbidapaswa kobiri izinji kakamwe pa ndzidzi unoyu. Nakuti ife nee tikhali na mangawa, mbidasiya kuphata basa ku bhanko kobiri ikhali na ife mbidakwana toera kutiphedza mu ndzidzi uzinji.
Pikhali pyakunentsa toera kucita cisankhulo ceneci, mbwenye nkazanga na mai wanga aphedzera cisankhulo ceneci. Natenepa ndatoma kutumikira pontho ninga mpainiya, pontho ndikhali wakutsandzaya kakamwe. Pyonsene pikhaoneka ninga pikhali mwadidi, mbwenye mwakukhonda dembuka ife tatambira mphangwa zakuti nee tikhazidikhira.
MPHANGWA ZAKUTI NEE TIKHAZIDIKHIRA!
Kubalwa kwa mwanathu wacitatu, Gabriel, kwatitsandzayisa kakamwe
Ntsiku inango, enfermero wathu atipanga kuti Sylvia ali na mimba. Ife tatsandzaya kakamwe na mphangwa zenezi, mbwenye ndikhanyerezerambo cisankhulo canga cakutumikira ninga mpainiya. Natenepa ndabvundzika: Kodi ine ndinakwanisa kutumikira ninga mpainiya? Mwakukhonda dembuka, ife tatoma kuduwala tonsene mbatidikhira kubalwa kwa mwana unoyu. Mbwenye ine ndikhapitiriza kunyerezera khala mbidakwanisa kutumikira ninga mpainiya.
Pakumala kucedza thangwi ya pifuno pyathu, ife taona kuti ine mbandidatumikira ninga mpainiya. Mwanathu Gabriel abalwa mwezi wa Abril wa caka ca 1985. Ngakhale tenepo, ine ndasiya kuphata basa ku bhanko mbanditoma kutumikira ninga mpainiya mwezi wa Junho wa caka ca 1985. Mukupita kwa ndzidzi, ine ndakhala na mwai wakuphata basa ninga m’bodzi wa abale a Komiti ya Filiali. Mbwenye Bheteli nee ikhali ku Caracas, ine ndikhaphata basa ntsiku ziwiri peno zitatu pa sumana, pontho ndikhafamba nsidzo wa makilometru 80 teora kufika ku Bheteli.
TAFULUKA TOERA KAKHALA MBUTO INANGO
Bheteli ikhagumanika mu nzinda wa La Victoria, natenepa ife tafuluka, mbatienda kakhala cifupi na Bheteli mu nzinda unoyu. Anewa akhali macinjo makulu kakamwe kuna ife. Mbwenye ine ndisapereka takhuta kakamwe kuna banja yanga thangwi yakundiphedza kwawo. Makhaliro awo adidi andiphedza toera pinthu pindifambire mwadidi. Mwanankazianga anacemerwa Baha akhali dzololo toera kutsalakana mai wathu. Mwananga Mike amanga banja, mbwenye Samira na Gabriel akhapitiriza kukhala na ife. Mbwenye pidafuluka ife mbatienda ku La Victoria, iwo asiya axamwali awo ku Caracas. Kusiyapo pyenepi, nkazanga akhafunikambo kudzolowera makhaliro a nzinda unoyu ung’ono. Pontho ife tonsene tikhafunika kudzolowera kukhala pabodzi munyumba ing’ono. Mwandimomwene, pakhali na pinthu pizinji kakamwe pidacitika thangwi ya kufuluka kubuluka ku Caracas mbatienda ku La Victoria.
Mbwenye paoneka macinjo anango. Gabriel amanga banja, pontho Samira afuluka mbaenda kakhala pace ekha. Buluka penepo ine na nkazanga Sylvia tacemerwa teora katumikira pa Bheteli mu caka ca 2007, pontho tiri pa Bheteli mpaka lero. Mike, mwanathu wakutoma, asatumikira ninga nkulu wa mpingo, kusiyapo pyenepi, iye asatumikira ninga mpainiya pabodzi na nkazace, Monica. Gabriel asatumikirambo ninga nkulu wa mpingo, pontho iye asatumikira ku Italya pabodzi na nkazace, Ambra. Samira, asatumikira ninga mpainiya, pontho asaphedzera mabasa pa Bheteli.
Ine na nkazanga Sylvia tiri pa Bheteli ya ku Venezuela. Mwanathu wakutoma Mike na nkazace Monica. Mwanathu wankazi, Samira. Mwanathu Gabriel na nkazace Ambra
NDIRI WAKUTSANDZAYA NA PISANKHULO PIDACITA INE
Mwandimomwene, ine ndacita pisankhulo pizinji kakamwe mu umaso wanga. Mbwenye ndiri wakutsandzaya kakamwe na pisankhulo pyenepi. Ndisapereka takhuta kakamwe thangwi ya pinthu pyonsene pidacita ine toera kutumikira Yahova. Mu pyaka pizinji, ine ndakwanisa kuona kuti ndi pyakufunika kakamwe kupitiriza kukhala na uxamwali wakuwanga na Yahova. Mwakukhonda tsalakana khala pisankhulo pinafuna ife kucita ndi ping’ono peno pikulu, Yahova anakwanisa kutipasa ntendere wakuti “usapiringana kubvesesa konsene.” (Afil. 4:6, 7) Ine na Sylvia tisatsandzaya kutumikira pa Bheteli, pontho tisaona kuti Yahova asapasa nkhombo pisankhulo pidacita ife thangwi ndzidzi onsene tisamuikha pa mbuto yakutoma mu umaso wathu.