NSOLO WA PFUNDZIRO 34
NYIMBO 3 Yahova Asatipasa Mphambvu, Cidikhiro na Cinyindiro
Khalani na Cinyindiro Cakuti Yahova Akulekererani
“Imwe mwandilekerera madodo anga na madawo anga.”—MAS. 32:5.
PINAFUNA IFE KUPFUNDZA
Tinapfundza kuti thangwi yanji ndi pyakufunika kukhala na cinyindiro cakuti Yahova asatilekerera, pontho tinaona cinyindiro cinatipasa Bhibhlya cakuti iye asacita pyenepi na ale anatcunyuka.
1-2. Ndi mabvero api anakhala na munthu analekererwa madawo ace na Yahova? (Onanimbo foto .)
MAMBO Dhavidhi akhadziwa mwadidi mabvero akupasika mulando anakhala na munthu angacita madawo. (Mas. 40:12; 51:3, mafala akutoma) Iye acita pinthu pyakuipa kakamwe, mbwenye thangwi yakutcunyuka na ntima onsene, Yahova amulekerera. (2 Sam. 12:13) Na thangwi ineyi, Dhavidhi akhadziwambo kutsandzaya kunakhala na ale analekererwa madawo awo na Yahova.—Mas. 32:1.
2 Ninga Dhavidhi, ife tinakhalambo akutsandzaya tingabverwa ntsisi na Yahova. Kudziwa kuti Yahova asalekerera madawo athu kusatibalangaza kakamwe. Iye asacita pyenepi tingatcunyuka na ntima onsene, tingabweka madawo athu na kuwangisira toera tikhonde kucita madawo mabodzi ene. (Mis. 28:13; Mabasa 26:20; 1 Juw. 1:9) Ndi pyakutsandzayisa kakamwe kudziwa kuti Yahova angatilekerera, iye asacita pyenepi na ntima onsene mbatikhala ninga nee tacita madawo.—Ezek. 33:16.
Mambo Dhavidhi alemba mafala mazinji analonga thangwi yakulekerera kwa Yahova (Onani ndima 1-2)
3-4. (a) Ndi mabvero api akhali na Jennifer maseze akhadamala kubatizwa? (b) Tinapfundzanji mu nsolo uno?
3 Midzidzi inango pisanentsa kuna anango kukhala na cinyindiro cakuti Yahova aalekerera. Onani pidacitikira Jennifer adakuzwa mu undimomwene. Pikhali iye ntsikana, atoma kucita pinthu pyakuipa, pontho akhabisira anyakubalace. Iye alonga: “Ndikhacita ulukwali, ndikhamwa kakamwe, ndikhacita kakamwe nthonga, pontho basi ene ndikhanyerezera pyakuwina kobiri.” Pidapita pyaka pingasi, iye atoma pontho kutumikira Yahova, aperekeka, pontho abatizwa. Mbwenye iye alonga: “Ine ndikhadziwa pinalonga Bhibhlya kuti thangwi ya ntsembe ya Yezu, Yahova analekerera madawo athu. Ngakhale tenepo, pidatcunyuka ine mbandiphemba Yahova toera andilekerere, ndikhapenula khala mwandimomwene andilekerera.”
4 Kodi imwe musapenulambo munjira ineyi? Pisakunentsani toera kukhala na cinyindiro cakuti Yahova alekerera madawo adacita imwe nduli? Dhavidhi akhali na cinyindiro cakuti Yahova ndi Mulungu wantsisi, pontho akhadamulekerera. Yahova asafunambo kuti mukhale na cinyindiro cibodzi cene. Mu nsolo uno, tinapfundza kuti thangwi yanji ndi pyakufunika kukhala na cinyindiro cakuti Yahova atilekerera, pontho tinapfundza pinthu pyakuti pinatiphedza toera kucita pyenepi.
THANGWI YANJI NDI PYAKUFUNIKA KUKHALA NA CINYINDIRO CAKUTI YAHOVA ATILEKERERA?
5. Sathani asafuna kuti tinyerezerenji? Perekani citsandzo.
5 Kunyindira kuti Yahova atilekerera, kusatiphedza toera tikhonde kugwa m’misamba ya Sathani. Lekani duwala kuti Sathani asafuna tisiye kutumikira Yahova, pontho asacita pyonsene pinakwanisa iye toera tisiye kutumikira Yahova. Iye asafuna kuticitisa kunyerezera kuti madawo athu nee analekererwa. Nyerezerani pinthu pidacitikira mamuna wa ku Korinto wakuti akhadabuluswa mu mpingo thangwi yakucita ulukwali. (1 Akor. 5:1, 5, 13) Mamuna unoyu akhadatcunyuka, mbwenye Sathani akhafuna kuti abale mu mpingo akhonde kumulekerera. Kusiyapo pyenepi, Sathani akhafunambo kuti mamuna unoyu wakuti akhadatcunyuka anyerezere kuti nee athema kulekererwa na Yahova, toera ‘akundwe thangwi yakutsukwala kakamwe’ mbasiya kutumikira Yahova. Sathani asacitambo pibodzi pyene lero. Mbwenye ife nee tisasowa cakucita, thangwi “tisadziwa mwadidi njira zinaphatisira iye toera kutinyengeza.”—2 Akor. 2:5-11.
6. Tisafunika kucitanji toera tisiye kupasika mulando mbatikhala akutsandzaya?
6 Tingakhala na cinyindiro cakuti Yahova atilekerera tisakhala akutsandzaya, pontho tisasiya kupasika mulando. Kazinji kene tingacita madawo tisapasika mulando. (Mas. 51:17) Pyenepi mphyadidi, thangwi pinatiphedza toera kucinja mbaticita pinthu pyadidi. (2 Akor. 7:10, 11) Mbwenye tingapitiriza kupasika mulando maseze tatcunyuka, tinatsukwala mbatisiya kutumikira Yahova. Tingakhala na cinyindiro cakuti Yahova atilekerera, ife nee tinapasikabve mulando. Natenepa, tinakwanisa kutumikira Yahova mwakutsandzaya na cikumbuntima cakucena ninga munafuna iye. (Akol. 1:10, 11; 2 Tim. 1:3) Mphapo tisafunika kucitanji toera tikhale na cinyindiro cakuti Yahova atilekerera?
NINJI PINAFUNA KUTIPHEDZA TOERA KUKHALA NA CINYINDIRO CAKUTI YAHOVA ATILEKERERA?
7-8. (a) Yahova alonganji kuna Mose thangwi ya iye ene? (b) Pyenepi pisatipasa cinyindiro cipi? (Eksodho 34:6, 7)
7 Nyerezerani mafala adalonga Yahova thangwi ya iye ene. Onani pidalonga Yahova kuna Mose pa Phiri ya Sinai.a (Lerini Eksodho 34:6, 7.) Yahova mbadakwanisa kupanga Mose pinthu pizinji thangwi ya iye ene na makhaliro ace. Mbwenye iye asankhula kumpanga kuti ndi Mulungu wantsisi na wakukoma ntima. Kodi Mulungu wantsisi, anakhonda kulekerera ntumiki wace adatcunyuka madawo ace na ntima onsene? Nkhabe. Nakuti Yahova ndi waufuni, iye cipo mbadacita pyenepi.
8 Yahova angalonga kuti ndi wantsisi, ife tinakwanisa kukhala na cinyindiro cakuti unoyu ndi undimomwene, thangwi iye nkhabe kulonga uthambi. Iye ndi Mulungu wa undimomwene. (Mas. 31:5) Natenepa, tinanyindira pinalonga iye. Khala ndi pyakunentsa kuna imwe kusiya kupasika mulando thangwi ya madawo adacita imwe, bvundzikani: ‘Kodi ine ndisanyindira kuti Yahova ndi wantsisi, wakukoma ntima, pontho kuti asalekerera atumiki ace onsene anatcunyuka? Natenepa ndisafunikambo kukhala na cinyindiro cakuti iye andilekerera.’
9. Lemba ya Masalmo 32:5 isatipfundzisanji thangwi ya njira inalekerera Yahova madawo athu?
9 Nyerezerani pidalembesa Yahova m’Bhibhlya thangwi yakulekerera kwace. Onani mafala adalonga Dhavidhi thangwi yakulekerera kwa Yahova. (Lerini Masalmo 32:5.) Dhavidhi alonga: “Imwe mwandilekerera madodo anga na madawo anga.” Fala Yacihebheri idathumburuzwa kuti “kulekerera” inakwanisambo kubveka “kulamusa,” “kubulusa,” peno “kukwata.” Dhavidhi pidalekererwa iye na Yahova, pyakhala ninga Yahova akwata madawo ace. Natenepa Dhavidhi atsandzaya thangwi nee akhapasikabve mulando. (Mas. 32:2-4) Pyenepi pinakwanisambo kucitika kuna ife. Tingatcunyuka na ntima onsene, nee tisafunika kupitiriza kupasika mulando thangwi ya madawo akuti Yahova aakwata mbaaponya kutali na ife.
10-11. Mafala akuti “dzololo toera kulekerera” asatipfundzisanji thangwi ya Yahova? (Masalmo 86:5)
10 Lerini Masalmo 86:5. Pa vesi ineyi, Dhavidhi alonga kuti Yahova “ali dzololo toera kulekerera.” Bukhu inango inalonga thangwi ya Bhibhlya, yalonga tenepa thangwi ya Yahova: “Iye ndi ‘wakulekerera,’ pontho pyenepi pisacita khundu ya makhaliro ace.” Thangwi yanji Yahova asacita pyenepi? Vesi ibodzi ene ya bukhu ya Masalmo, isalonga: “Ufuni wanu wakukhonda mala ndi ukulu kuna onsene anakucemerani.” Mu nsolo udamala, ife taona kuti ufuni wakukhonda mala wa Yahova usancitisa kukhala na uxamwali wakuwanga, pontho wakwenda na kwenda na atumiki ace akukhulupirika. Thangwi ya ufuni wace wakukhonda mala, Yahova ‘asalekerera na ntima onsene’ ale anatcunyuka madawo awo. (Iza. 55:7) Khala ndi pyakunentsa kuna imwe kukhala na cinyindiro cakuti Mulungu akulekererani, bvundzikani: ‘Ndiri na cinyindiro cakuti Yahova ndi wakulekerera, pontho kuti ndzidzi onsene ali dzololo toera kulekerera ale anatcunyuka na ntima onsene? Natenepa, ndisafunika kukhala na cinyindiro cakuti Yahova andilekererambo pidatcunyuka ine.’
11 Kudziwa kuti Yahova asabvesesa mwadidi mathangwi anaticitisa kudawa, kusatibalangaza. (Mas. 139:1, 2) Ife tinakwanisa kuona pyenepi tingapfundza pinthu pinagumanika mu kapitulu inango ya bukhu ya Masalmo idalemba Dhavidhi. Iyo inatiphedzambo toera kukhala na cinyindiro cakuti Yahova atilekerera.
YAHOVA ASAKUMBUKANJI THANGWI YA IFE?
12-13. Mwakubverana na Masalmo 103:14, Yahova asakumbukanji thangwi ya ife, pontho pyenepi pisancitisa kucitanji?
12 Lerini Masalmo 103:14. Dhavidhi alonga kuti Yahova “asakumbuka kuti ndife pfumbi.” Mafala anewa asapangiza ibodzi mwa mathangwi anacitisa Yahova kukhala dzololo toera kulekerera atumiki ace anatcunyuka. Thangwi ineyi ndi yakuti iye asakumbuka kuti ife ndife anthu akudawa, pontho kazinji kene tisacita madodo. Toera kubvesesa mwadidi pyenepi, tinapfundza mafala adalonga Dhavidhi.
13 Dhavidhi alonga kuti Yahova “asadziwa mwadidi kuti aticita tani.” Iye acita Adhamu na “pfumbi ya mataka.” Natenepa iye asadziwa kuti anthu acitwa tani, pontho asadziwa pinthu pyakufunika kuna iwo. Mwacitsandzo, anthu asafunika kudya, kugona na kupuma. Ngakhale anthu akusowa madawo asafunikambo kucita pinthu pyenepi. (Gen. 2:7) Mbwenye pidadawa Adhamu na Eva, ‘kucitwa na pfumbi’ kwakhala na mabvekero anango. Nakuti ndife ana a Adhamu na Eva, ifembo “ndife pfumbi” thangwi tabalwa na madawo, pontho kazinji kene tisacita madodo. Yahova asadziwa pyenepi, pontho ‘asakumbuka’ kuti ndife anthu a madawo. Fala Yacihebheri idathumburuzwa kuti ‘asakumbuka’ nee isalonga basi ene pya kukumbuka cinthu, mbwenye isalongambo pyakucita cinthu cadidi pakumala kukumbuka. Natenepa mafala a Dhavidhi asatipfundzisa kuti Yahova asabvesesa kuti midzidzi inango tinacita madodo, pontho pyenepi pisancitisa kutilekerera na kutibvera ntsisi tingatcunyuka na ntima onsene.—Mas. 78:38, 39.
14. (a) Ndi pinthu pipi pinango pidalonga Dhavidhi thangwi ya njira inatilekerera Yahova? (Masalmo 103:12) (b) Pidacitikira Dhavidhi pisapangiza tani kuti Yahova asalekerera na ntima onsene? (Onani bokosi ya nsolo wakuti “Yahova Asalekerera Mbaduwala.”)
14 Ninji pontho cinafuna kutiphedza toera kukhala na cinyindiro cakuti Yahova atilekerera? (Lerini Masalmo 103:12.) Dhavidhi alonga kuti Yahova angatilekerera asaikha madawo athu kutali kakamwe na ife “ninga kumabulukiro a dzuwa ndi kutali kakamwe na kumadokero a dzuwa.” Kumabulukiro a dzuwa na kumadokero a dzuwa ndi makhundu akusiyana kakamwe. Pyenepi pisatipfundzisanji thangwi yakulekerera kwa Yahova? Bukhu inango yalonga tenepa: “Madawo angabuluswa munjira ineyi, tinakwanisa kukhala na cinyindiro cakuti khwema, cidzindikiro, ngakhale pinthu pinatikumbusa madawo anewa pisamaliswa.” Nyerezerani basi: Khwema inakwanisa kuticitisa kukumbuka cinthu. Mbwenye Yahova angatilekerera nkhabe pitiriza khwema nee pang’ono yakuti inancitisa kukumbuka madawo athu mbaphatisira pyenepi toera kutitcunyusa.—Ezek. 18:21, 22; Mabasa 3:19.
15. Tisafunika kucitanji khala tisapitiriza kupasika mulando thangwi ya madawo adacita ife nduli?
15 Mafala a Dhavidhi anagumanika pa Masalmo 103, anatiphedza tani toera tikhale na cinyindiro cakuti Yahova atilekerera? Khala tisapitiriza kupasika mulando thangwi ya madawo adacita ife nduli, tisafunika kubvundzika: ‘Kodi ine ndiri kuduwala pinthu pyakuti Yahova asapikumbuka mbandikumbuka pinthu pyakuti Yahova apiduwala? Peno ndaduwala kuti Yahova asakumbuka kuti ndine munthu wa madawo, pontho kuti iye asalekerera munthu wakudawa ninga ine angatcunyuka? Kusiyapo pyenepi, ndisakumbuka madawo akuti Yahova aalekerera, pontho nee anaaphatisira toera kunditcunyusa?’ Yahova nee asapitiriza kukumbuka madawo athu a nduli, natenepa, ife nee tisafunikambo kucita pyenepi. (Mas. 130:3) Tingakhala na cinyindiro cakuti Yahova atilekerera, tinakwanisa kulekerereka mbatipitiriza kuntumikira.
16. Perekani citsandzo cinapangiza kuti ndi pyakugopswa kupitiriza kupasika mulando thangwi ya madawo adacita ife nduli. (Onanimbo foto.)
16 Nyerezerani basi. Kupitiriza kupasika mulando thangwi ya madawo adacita ife nduli, ndi ninga munthu anatekenya karu mbayang’ana basi ene supeyu inapangiza nduli. Ndimomwene kuti ndi pyadidi kuyang’ana supeyu ineyi midzidzi inango, thangwi inakwanisa kuphedza munthu anatekenya toera kucalira ngozwi. Mbwenye toera kutekenya karu mwakutsidzikizika, ndi pyakufunika kupitiriza kuyang’ana kutsogolo. Munjira ibodzi ene, midzidzi inango ndi pyadidi kukumbuka madawo adacita ife nduli, thangwi iwo anatiphedza toera kuwangisa cifuno cathu cakukhonda kucitabve madawo mabodzi ene. Mbwenye tinganyerezera basi ene madawo anewa, tinapitiriza kupasika mulando, pontho tinasiya kukhala akutsandzaya mbatidzudzumika m’basa ya Yahova. Natenepa, ndi pyakufunika kupitiriza kuyang’ana kutsogolo kwakuti ndi nseu unatsogolera ku umaso wakukhonda mala mu dziko ipswa idapikira Mulungu mwakuti pinthu pyakuipa “nee pinadzakumbukirwabve.”—Iza. 65:17; Mis. 4:25.
Ninga nyakutekenya karu wakuti asafunika kupitiriza kuyang’ana kutsogolo, tayu pa supeyu inapangiza nduli, ife tisafunikambo kupitiriza kunyerezera nkhombo za ntsogolo, tayu madawo adacita ife nduli (Onani ndima 16)
PITIRIZANI KUKHALA NA CINYINDIRO CAKUTI YAHOVA ASAKUFUNANI, PONTHO ASAKULEKERERANI
17. Thangwi yanji tisafunika kupitiriza kukhala na cinyindiro cakuti Yahova asatifuna, pontho asatilekerera?
17 Ife tisafunika kupitiriza kukhala na cinyindiro cakuti Yahova asatifuna, pontho asatilekerera. (1 Juw. 3:19) Thangwi yanji? Thangwi Sathani nee anasiya kuwangisira toera kuticitisa kunyerezera kuti nee tathema kufuniwa peno kulekererwa na Yahova. Mwakukhonda tsalakana njira zinaphatisira iye, cifuniro cace ndi kuticitisa kusiya kutumikira Yahova. Sathani anapitiriza kuwangisira toera kucita pyenepi, thangwi iye asadziwa kuti ndzidzi wace wasala pang’ono basi. (Apok. 12:12) Natenepa, lekani kusiya kuti Sathani awine!
18. Musafunika kucitanji toera mupitirize kukhala na cinyindiro cakuti Yahova asakufunani, pontho asakulekererani?
18 Toera mupitirize kukhala na cinyindiro cakuti Yahova asakufunani, phatisirani pinthu pidapfundza ife mu nsolo udamala. Toera kupitiriza kukhala na cinyindiro cakuti Yahova asakulekererani, phatisirani pinthu pidapfundza ife mu nsolo uno. Nyerezerani mafala adalonga Yahova thangwi ya iye ene, pontho nyerezerani mafala adalembesa Yahova m’Bhibhlya thangwi yakulekerera kwace. Lekani duwala kuti Yahova asadziwa kuti ndife anthu akudawa, pontho asatibvera ntsisi. Kumbukanimbo kuti iye asatilekerera na ntima onsene. Natenepa, imwe munakhala na cinyindiro cibodzi cene ninga cikhali na Dhavidhi thangwi ya ntsisi za Yahova, mbamulonga kuti: “Takhuta Yahova thangwi ‘yakulekerera madodo anga na madawo anga.’”—Mas. 32:5.
NYIMBO 1 Makhaliro a Yahova
a Onani nsolo wakuti “Achegue-se a Deus—Jeová descreve a si mesmo” mu Sentinela ya 1.º de Maio de 2009.