4. Kodi Ife Tacitwa toera Tithabuke?

Thangwi Yanji Mphyakufunika Kudziwa Ntawiro

Ntawiro wa mbvundzo unoyu usakhuya umaso wathu.

Nyerezerani Ipi

Thangwi yanji Mulungu wakuti acita pinthu pyakubalika asalekerera nyatwa?

Anthu akuti nkhabe kuphembera asaona nyatwa ninga mathangwi akupokanya kukhalapo kwa Mulungu. Iwo asakhulupira kuti nyatwa zisapangiza kuti (1) Mulungu nkhabe mphambvu toera kuzimalisa, (2) Mulungu nee asafuna kuzimalisa peno (3) Mulungu nee alipo.

Kodi ndi anewa mathangwi anacitisa anthu kuthabuka?

Bhibhlya Isalonganji

Mulungu nee aticita toera tithabuke.

Iye asafuna kuti tikhale na umaso wakutsandzaya.

‘Kuna anthu nkhabe cadidi kupita kucita pya udidi na kuphata basa, pontho munthu onsene adye, amwe na aone pinthu pyadidi thangwi ya basa yace yakuwanga. Ndi muoni wa Mulungu.’—KOELETE 3:12, 13.

Mulungu apasa anthu pinthu pyonsene pikhafuna iwo toera akhonde thabuka.

Iye nee akhafuna kuti iwo na anawo athabuke.

‘Mulungu aapanga: Balani ana, pontho munjipe, dzadzani dziko yapantsi mbamuitsalakana.’—GENESI 1:28.

Anthu awiri akutoma asankhula kukhonda bvera Mulungu.

Pyenepi pyabweresa nyatwa zizinji kuna iwo na kuna anawo onsene.

“Ninga mudapita madawo pantsi pano thangwi ya munthu m’bodzi basi, mbakupitambo kufa thangwi ya madawo, natenepa kufa kwamwazika kwa anthu onsene thangwi anthu onsene adawa.”—AROMA 5:12.a

Mulungu nee acita anthu toera atongeke okhene.

Nakuti anthu nkhabe kwanisa kukhala m’madzi, mphyakucimwanikambo kuti anthu atongeke okhene.

‘Si munthu tayu asafunika kutsogolera mathanyo ace.’—YEREMIYA 10:23.

Mulungu nee asafuna kuti tithabuke.

Iye asafuna kuti ticite pyonsene pinakwanisa ife toera ticalire nyatwa.

‘Mungabvera mitemo yanga na ntima wanu onsene! Ntendere wanu unadzakhala ninga nkulo.’—IZAIYA 48:18.