Nyatwa Pa Nyumba Pa Davidi

MUDAMALA Davidi kutoma kutonga m’Yerusalemu, Yahova apasa anyankhondo ace mapembero mazinji kwa anyamalwa awo. Yahova akhadapikira Aisrayeli kuapasa dziko ya Kanani. Cincino, na ciphedzo ca Yahova, dziko yonsene ikhadapikirwa iwo pakumalisira yadzakhala yawo.

Davidi akhali ntongi wadidi. Akhafuna Yahova. Natenepa cibodzi ca pinthu pyakutoma pidacita iye pakumala kukunda Yerusalemu cikhali kubweresa kweneku bokosi ya cibverano ya Yahova. Iye akhafuna kumanga templo towera aiikhe.

Mudagwesera Davidi, iye acita cakudodomeka cakuipa. Davidi akhadziwa kuti kukhali kwakuipa kukwata cinthu ca munthu unango. Mbwenye namaulo anango, mukakhala iye padzulu pa nyumba yace, ayang’ana pantsi mbaona nkazi wakubalika kakamwe. Dzinace ikhali Bateseba, na mamunace akhali mbodzi wa anyankhondo ace akhacemerwa Uriya.

Davidi akhafunadi kakamwe Bateseba kwakuti ancemeresera kunyumba kwace. Mamunace akhali kutali, kunkhondo. Inde, Davidi agona naye na patsogolo pace Bateseba adziwa kuti iye anadzabala mwana. Davidi anenseka kakamwe mbatumiza mafala kwa nkulu wa anyankhondo ace, Yoabu, kuti aikhe Uriya patsogolo pa nkhondo towera aphiwe. Mudafa Uriya, Davidi akwatira Bateseba.

Yahova aipirwa kakamwe na Davidi. Natenepa atuma ntumiki wace Natani kuti ampange pya madawo ace. Mungakwanise kuona pale Natani akulonga na Davidi. Davidi atsukwala kakamwe na thangwi ya pidacita iye, natenepa Yahova hadamupha tayu. Mbwenye Yahova alonga: ‘Nakuti wacita pinthu pyakuipa ipi, unadzakhala na nyatwa zizinji m’nyumba mwako.’ Akhala na nyatwa tani Davidi!

Yakutoma, mwana wamamuna wa Bateseba afa. Buluka penepo, mwana wautombo wa Davidi, Amnoni, akwanisa kukhala ekhene na mwanankazi yace Tamara mbankakamiza kugona naye. Mwana wa Davidi, Abisalomu, aipirwa kakamwe kwakuti apha Amnoni. M’kupita kwa nzidzi, Abisalomu awina uxamwali kwa anthu azinji, mbapiikha ekhene mambo. Pakumalisira, Davidi awina nkhondo yakumenyana na Abisalomu, ule adaphiwa. Inde, Davidi akhala na nyatwa zizinji.

Nkati mwa pyonsene ipi, Bateseba abala mwana wamamuna akhacemerwa Salomo. Mudakalamba Davidi mbaduwala, mwanace wamamuna Adoniya ayesera kupiikha ekhene mambo. Na thangwi ineyi, Davidi atuma nyantsembe wakucemerwa Zadoki kukhutula mafuta pa nsolo pa Salomo towera aonese kuti Salomo anadzakhala mambo. M’nzidzi wakucepa Davidi afa mbakhali na piaka 70 pyakubalwa. Iye atonga piaka 40, mbwenye patsogolo pace Salomo akhala mambo wa Israyeli.