Madawo a Mambo Dhavidhi

Pidafa mambo Sauli, Dhavidhi adzakhala mambo. Iye akhali na pyaka 30 pyakubalwa. Ntsiku inango namasiku, pikhali iye padzulu panyumba yace, aona nkazi wakubalika. Dhavidhi adzindikira kuti nkazi unoyu akhali Bhatisebha, pontho mamunace akhali Uriya. Natenepa Dhavidhi acemeresa Bhatisebha kunyumba kwace. Iwo apita m’mabonde, Bhatisebha mbakhala na mimba. Dhavidhi ayesera kubisa madodo ace. Iye apanga nkulu wa anyankhondo toera Uriya apite patsogolo kunkhondo. Pidaphiwa Uriya kunkhondo, Dhavidhi amanga banja na Bhatisebha.

Mbwenye Yahova akhaona pinthu pyonsene pikhacitika. Mphapo iye acitanji? Yahova atuma mprofeta Natani toera kalonga na Dhavidhi. Natani alonga: ‘Mamuna wakupfuma akhali na mabira mazinji, mbwenye mamuna wakutcerenga akhali na bira ibodzi ing’ono yakuti akhaifuna kakamwe. Mamuna wakupfuma akwata bira ibodzi ikhali na mamuna wakutcerenga.’ Dhavidhi aipirwa kakamwe, mbalonga: ‘Mamuna unoyu wakupfuma athema kuphiwa!’ Buluka penepo, Natani apanga Dhavidhi: ‘Mamuna unoyu ndiwe!’ Dhavidhi atsukwala kakamwe mbapanga Natani madawo ace: ‘Ine ndadawira Yahova.’ Madawo anewa abweresa nyatwa kuna Dhavidhi na banja yace. Yahova atcunyusa Dhavidhi, mbwenye antawirisa kukhala m’maso thangwi iye akhali wakukhulupirika na wakucepeseka.

Dhavidhi akhafuna kumangira Yahova templo, mbwenye Yahova asankhula mwana wa Dhavidhi akhacemerwa Salomoni toera kumanga templo. Dhavidhi atoma kucita masasanyiro toera kuphedza Salomoni, mbalonga: ‘Templo ya Yahova isafunika kukhala yakubalika kakamwe. Salomoni aciri m’phale, mbwenye ndinamphedza kucita masasanyiro.’ Dhavidhi apereka kobiri izinji toera iphatisirwe pakumanga templo. Iye asaka anyabasa aluso. Iye agumanyiza ouro, parata na usalu wa sedha wakubuluka ku Tiro na ku Sidhoni. Pikhali iye dhuzi na kufa, Dhavidhi apanga Salomoni kuti templo ikhafunika kumangwa tani. Iye alonga: ‘Yahova andipanga toera kukulembera ipi. Yahova anakuphedza. Leka gopa. Khala wacipapo mbuphata basa.’