Yehosafati Anyindira Yehova

KODI musadziwa kuti amuna awa mbani na ndi ninji pinacita iwo? Iwo ali kuenda kunkhondo, na amuna ali patsogolo pawo akuimba. Mbwenye imwe mungakwanise kubvunza: ‘Kodi thangwi yanji anyakuimba nkhabe masupada na madipa kuti amenye nawo nkhondo?’ Tendeni tione.

Yehosafati akhali mambo wa umambo wa madzinza mawiri a Israyeli. Iye akhala maso m’nzidzi ubodzi ene na Mambo Ahabu na Yezabele wa umambo wakumulolo wa madzinza 10. Mbwenye Yehosafati akhali mambo wadidi, na babace Asa akhalimbo mambo wadidi. Natenepa, m’piaka pizinji mbumba ya umambo wakubangwe ya madzinza mawiri ikhakomerwa na umaso wadidi.

Mbwenye pakhali cinthu cidacitisa mbumba kugopa. Anyamphangwa alonga kwa Yehosafati: ‘Nsoka ukulu wa anyankhondo a madziko a Moabi, Amoni na a Phiri ya Seiri akubwera kamenyana na imwe.’ Aisrayeli azinji agumanyikana ku Yerusalemu towera kusaka ciphedzo ca Yahova. Iwo aenda ku templo, na kweneku Yehosafati aphembera: ‘O Yahova, Mulungu wathu, ife nkhabe dziwa cakucita. Tiri akusowa ciphedzo cakumenyana na nsoka ukulu uyu wa anyankhondo. Tisayang’ana kuna imwe towera ciphedzo.’

Yahova abvesera, na atuma mbodzi wa anzakazi ace kuti apange mbumba: ‘Nkhondo si yanu tayu, mbwenye ya Mulungu. Nee munadzafunika kumenya nkhondo. Yang’anani basi, muone njira inafuna dzakupulumusirani Yahova.’

Natenepa, mangwana mwace namacibese Yehosafati apanga mbumba: ‘Nyindirani Yahova!’ Buluka penepo atuma anyakuimba kuti aende patsogolo pa anyankhondo ace, na mukafamba iwo akhaimba mwakukuza Yahova. Kodi musadziwa cidacitika mukhafika iwo cifupi na mbuto yakumenyana? Yahova acitisa kuti anyankhondo a anyamalwa amenyane okhene. Mudafika Aisrayeli, anyankhondo onsene a anyamalwa akhali akufa!

Kodi kukhali kwanzeru tayu kwa Yehosafati kunyindira Yahova? Tinadzakhala anzeru tikanyindirambo kwa Iye.