Aphale Awiri Adakhala Pontho Maso

IMWE mbumudafa, kodi mama wanu mbadadzabva tani ngakhala imwe mwabwereswa pontho ku umaso? Iye mbadadzakomerwa kakamwe! Mbwenye kodi munthu wakufa angakwanise kukhala pontho maso? Kodi pyenepi pyatoma kucitika kale?

Yang’anani mamuna pano, na nkazi na kamphale. Mamuna uyu ndi mprofeta Eliya. Nkazi ndi nzice wa nzinda wa Zarefati, na mphale ndi mwanace. Inde, ntsiku inango mphale aduwala. Utenda wanyanya pang’ono na pang’ono mpaka iye kumalisira na kufa. Mphapo Eliya apanga nkazi: ‘Ndipase mphale.’

Eliya akwata mwana wakufa mbaenda naye m’kwartu yapadzulu mbangonesa pa talimba. Buluka penepo iye aphembera: ‘O Yahova, citisani mphale uyu kukhala pontho maso.’ Na mphale atoma kupuma! Natenepa Eliya ankwata mbabwerera naye pantsi mbalonga kwa nkazi: ‘Yang’anani, mwananu ali maso!’ Ndi thangwi ineyi mamace akomerwa kakamwe.

Mprofeta unango wakufunika wa Yahova asacemerwa Elixa. Iye akhatumikira ninga mphedzi wa Eliya. Mbwenye m’kupita kwa nzidzi Yahova aphatisirambo Elixa towera kucita pirengo. Ntsiku inango Elixa aenda ku nzinda wa Sunemu, kule kudancitira nkazi unango udidi kakamwe. M’kupita kwa nzidzi nkazi uyu adzakhala na khombwani wamamuna.

Namacibese anango, mudakula mwana, iye aenda kaona babace, akaphata basa kumunda. Mwakudzidzimusa mphale akhuwa: ‘Nsolo wanga ukupha!’ Mudamala iye kuendeswa kunyumba, mphale afa. Atsukwala tani mamace! M’nzidzi uneule ene iye aenda kakwata Elixa.

Mudafika Elixa, iye apita m’kwartu ikhali mwana wakufa. Iye aphembera kwa Yahova, na agona padzulu pa ntembo. Mwakukhonda dembuka manungo a mphale atoma pisa, mbawatsira kanomwe. Akomerwa tani mamace mudapita iye mbagumana mphale wace maso!

Anthu akuinjipa kakamwe ali kufa. Ipi pisatsukwalisa acibale na axamwali awo. Ife nkhabe mphambvu yakulamusa anthu akufa. Mbwenye Yahova alinayo. Kutsogolo tinadzapfunza kuti iye anadzabweresa tani pontho pikwi na pikwi pya anthu ku umaso.