Mwana wa Nzice Akhala Pontho m’Maso

Mu ndzidzi wacilala peno wakuti madzi nee akhabvumba, Yahova apanga Eliya: ‘Ndoko ku Sarefati, nkazi wanzice anadzakupasa cakudya.’ Pidafika Eliya pa nsuwo wa nzinda aona nkazi wanzice mbakasaka nkhuni. Eliya aphemba madzi kuna nzice unoyu. Pikhaenda iye katunga madzi, Eliya ancemera mbalonga: “Ndaphata miyendo, ndibwereserembo phindi ya nkate.” Mbwenye nkazi wanzice alonga: ‘Ine nkhabe nkate toera kukupasani. Basi ene ndasala na ufa pang’ono na mafuta toera kudya ine na mwananga.’ Eliya alonga: ‘Yahova alonga kuti ungandicitira nkate, ufa wako na mafuta ako nee pinadzamala mpaka kumala kwa cilala.’

Natenepa, nkazi wanzice aenda kunyumba, aphika nkate mbapasa Eliya. Ninga mudalongera Yahova, nkazi wanzice na mwanace adzakhala na cakudya cakukwana mu ndzidzi wacilala. Nkhali yace ya ufa na ya mafuta nee pikhamala.

Mbwenye padzacitika cinthu cakutsukwalisa. Mwana wa nzice adzaphatwa na utenda mbafa. Nkazi wanzice aphemba Eliya toera kumphedza. Eliya akwata mwana unoyu m’manja mwa nkazi wanzice mbaenda naye n’kwartu yapadzulu panyumba ya nzice. Eliya agonesa mwana unoyu pa talimba mbaphembera: ‘Yahova, ndaphata miyendo, citisani kuti mwana uyu akhale pontho na umaso.’ Pidaphemba Eliya pikhaoneka ninga pinthu pyakukhonda kwanisika. Thangwi yanji? Thangwi pinthu ninga pyenepi, nee pikhadacitika kale. Pontho nkazi wanzice na mwanace nee akhali Aizraeli.

Mwana unoyu adzakhala pontho m’maso mbatoma kupuma! Eliya apanga nkazi wanzice: “Ona, mwanako ali m’maso.” Nkazi unoyu atsandzaya kakamwe mbapanga Eliya: “Cincino ndisadziwa kuti mwandimomwene imwe ndimwe ntumiki wa Mulungu, pontho mafala a Yahova analonga imwe ndi andimomwene.”