M’kwartu Yapadzulu

MPHAPO cikhali Cinai namasiku, pakumala pita ntsiku ziwiri. Yezu na apostolo ace 12 akhadadza ku kwartu ikulu iyi yapadzulu towera kudzadya cakudya ca Paskwa. Mamuna anaonemwe mbabuluka ndi Yudasi Iskarioti. Iye akuenda kapanga anyantsembe kuti iwo anaphata tani Yezu.

M’ntsiku ibodzi basi ndulimu, Yudasi aenda kwa iwo mbabvunza: ‘Kodi munadzandipasanji ndikakuphedzani kuphata Yezu?’ Iwo alonga: ‘Mikuruzadu makumatatu ya siliva.’ Natenepa cincino Yudasi ali kuenda kagumanikana na amuna aneale kuti aatsogolere kwa Yezu. Kodi ceneci cikhali cakugopswa tayu?

Cakudya ca Paskwa cikhadamala. Mbwenye m’nzidzi uneule Yezu atoma cakudya cinango cakupambulika. Iye apasa nkate apostolo ace mbalonga: ‘Udyeni, thangwi uyu usabveka manungo anga anafuna kudzaperekwa thangwi ya imwe.’ Buluka penepo aapasa khamico ya vinyu mbalonga: ‘Imweni, thangwi iyi isabveka ciropa canga, cinafuna kukhutulwa thangwi ya imwe.’ Bibilya isacemera ceneci ‘cakudya cancidodo ca Mbuya,’ peno ‘siyali ya Mbuya.’

Aisrayeli akhadya Paskwa towera kuwakumbusa mudapita anju wa Mulungu na padzulu panyumba zawo m’Ijitu, mbwenye apha ana autombo m’nyumba za Aijitu. Mbwenye cincino Yezu akhafuna kuti atowereri ace ankumbuke, na apereka tani umaso wace thangwi ya iwo. Ndi thangwi ineyi iye aapanga kuti akumbuke cakudya ici cakupambulika caka na caka.

Pakumala kudya Cakudya Cancidodo ca Mbuya, Yezu apanga apostolo ace kuti akhale acipapo na akuwanga m’cikhulupiro. Pakumalisira, iwo aimba nyimbo kwa Mulungu mbabuluka. Kukhadadoka kale kakamwe, panango pakhadapiringana pakati pa masiku. Tendeni tione kuti iwo aenda kupi.