Phwando Yakumalisa ya Yezu

Pyaka pyonsene Ayuda akhacita Paskwa pa ntsiku 14 ya mwezi wa Nisane. Iwo akhacita pyenepi toera kukumbuka pinthu pidacita Yahova toera kubulusa Aizraeli mu Ejitu mbaaendesa mu Dziko Yakupikirwa. Mu caka 33 P.K.K., Yezu na apostolo ace acita Paskwa mu sala ikulu yandzulu mu Yerusalemu. Pidamala iwo kudya, Yezu apanga apostolo ace: “M’bodzi wa imwe anadzandisandukira.” Apostolo adzudzumika kakamwe mbabvundza Yezu: ‘Mbani?’ Yezu aatawira: ‘Ndi ule anafuna ine kupasa phindi ya nkate.’ Buluka penepo, Yezu apasa Yuda Iskariyoti phindi ya nkate. Mwakucimbiza, Yuda alamuka mbabuluka.

Pidabuluka Yuda Iskariyoti, Yezu acita phembero, buluka penepo agwanda-gwanda nkate mbaupasa apostolo ace akhadasala. Yezu alonga: ‘Dyani nkate uyu. Iwo usaimirira manungo anga anafuna kuperekwa thangwi ya imwe.’ Buluka penepo, Yezu acita phembero, akwata ndiko ya vinyu mbaipasa apostolo ace. Iye alonga: ‘Mwani vinyu iyi. Iyo isaimirira ciropa canga cakuti cinadzaperekwa thangwi ya imwe toera kulekererwa madawo. Ndisapikira kuna imwe monsene kuti munadzakhala amambo pabodzi na ine kudzulu. Pitirizani kucita pyenepi pyaka pyonsene toera mundikumbukire.’ Mpaka lero, atowereri a Yezu asakumbuka kufa kwa Yezu kabodzi pacaka. Nsonkhano unoyu cincino usacemerwa Cakudya Cancidodo ca Mbuya.

Pidamala iwo kudya, apostolo atoma kuketesana kuti mbani akhali wakufunika kakamwe pakati pawo. Mbwenye Yezu aapanga: ‘Munthu wakufunika kakamwe ndi ule anaoneka ninga wang’ono kakamwe.

Yezu alonga: ‘Imwe ndimwe axamwali anga. Ndakupangani pyonsene pinafuna Babanga toera mupidziwe. Thimize pano, ndinaenda kuna Babanga kudzulu. Imwe munapitiriza pano. Imwe mungafunana unango na ndzace, anthu onsene anadzindikira kuti ndimwe anyakupfundza anga. Natenepa funanani unango na ndzace ninga mudakufunani ine.’

Pakumalisa, Yezu acita phembero, mbaphemba Yahova toera kutsidzikiza anyakupfundza ace, pontho iye aphemba Yahova toera aaphedze kuphata basa mwakubverana. Yezu aphembambo toera dzina ya Yahova iceneswe. Buluka penepo, Yezu na apostolo ace aimba nyimbo toera kusimba Yahova. Pidamala iwo kuimba nyimbo abuluka. Pontho ndzidzi ukhali cifupi toera Yezu amangwe.