Kusudzulwa Nkaidi

YANG’ANANI anju pano anaphata citseko cakufunguka ca kaidi. Amuna anasudzula iye ndiwo apostolo a Yezu. Tendeni tione kuti ndi ninji cidaacitisa kuikhwa nkaidi.

Ukhadapita nzidzi wakucepa basi kubulukira pa kukhutulwa kwa nzimu wakucena kwa anyakupfunza a Yezu. Ipi ndipyo pidacitika: Namaulo anango Pedru na Juwau aenda ku templo ku Yerusalemu. Kweneko, paduzi na nsuwo, pakhali mamuna wakulamala m’umaso wace onsene. Anthu akhankwata ntsiku zonsene mbamuendesa kweneko towera akaphembe kobiri kwa ale akhapita m’templo. Mudaona iye Pedru na Juwau, iye aphemba kuti iwo ampase cinthu. Kodi apostolo mbadadzacitanji?

Iwo alimira mbayang’ana mamuna unoyu wakucerenga. Pedru alonga: ‘Ine nkhabe kobiri, mbwenye ndinadzakupasa pinaine. M’dzina ya Yezu, lamuka ufambe!’ Buluka penepo Pedru aphata mamuna na nkono wamadyo, na kabodzi kene iye anumpha mbatoma famba. Mudaona anthu pyenepi, iwo adzumatirwa na akomerwa kakamwe thangwi ya cirengo ici cakudzumatirisa.

Pedru alonga: ‘Ife tacita cirengo ici na mphambvu ya Mulungu, ule adalamusa Yezu kwa akufa.’ Pedru na Juwau mbakalonga, atsogoleri anango arelijiau afika. Iwo aipirwa thangwi Pedru na Juwau akhapanga anthu pya kulamuswa kwa Yezu kwa akufa. Natenepa iwo aaphata mbaaikha nkaidi.

Mangwana mwace atsogoleri arelijiau akhala na nsonkhano ukulu. Pedru na Juwau, pabodzi na mamuna adawangisa iwo, aendeswa mwenemo. Atsogoleri arelijiau abvunza: ‘Kodi cirengo ici mwacicita na mphambvu yanji?’

Pedru aapanga kuti iwo acicita na mphambvu ya Mulungu, ule adalamusa Yezu kwa akufa. Anyantsembe nee adziwa cakucita, thangwi iwo nkhabe kwanisa kukhonda kuti cirengo cakudzumatirisa cacitikadi. Natenepa iwo acenjeza apostolo kuti aleke longabve pya Yezu, na aasiya mbaenda.

Mukapita ntsiku apostolo apitiriza na kumwaza mphangwa thangwi ya Yezu na kuwangisa anyakuduwala. Mphangwa za pirengo pyenepi zamwazika. Natenepa ngakhale umwinji wa mizinda ya kuzungulira Yerusalemu waendesa anyakuduwala towera akawangiswe na apostolo. Ipi pyacitisa atsogoleri arelijiau kukhala na ntsanje, natenepa iwo aphata apostolo mbaaikha nkaidi. Mbwenye iwo hadakhalamo nzidzi wakulapha tayu.

Namasiku anju wa Mulungu afungula citseko ca kaidi, ninga mungakwanise kuona pano. Anju alonga: ‘Ndokoni mukalimire m’templo, mbumupitiriza na kulonga kwa anthu.’ Namacibese mwace, mudatuma atsogoleri arelijiau amuna ku kaidi kuti akakwate apostolo, iwo akhadaenda. Patsogolo pace amuna aagumana mbakapfunzisa m’templo na aaendesa ku nyumba ya Sinedriyu.

Atsogoleri arelijiau alonga: ‘Ife takukhondesani pikulu pene kupfunzisa pontho pya Yezu. Mbwenye imwe mwadzadza Yerusalemu na cipfunziso canu.’ Buluka penepo apostolo atawira: ‘Ife tisafunika kubvera Mulungu ninga ntongi mbuto mwa anthu.’ Natenepa iwo apitirizadi na kupfunzisa “mphangwa zadidi.” Kodi si citsanzo cadidi kuti ife ticitowerere?