Pedru Aenda Kaona Korineri

UYU adalimira pano ndi mpostolo Pedru, na awa ali nduli mwace ndiwo axamwali ace angasi. Mbwenye thangwi yanji mamuna unoyu agodamira Pedru? Kodi akhafunika kucita pyenepi? Kodi musadziwa kuti iye mbani?

Mamuna unoyu ndi Korineri. Iye ndi tsacikunda wa anyankhondo a Roma. Korineri akhadziwa Pedru tayu, mbwenye apangwa kuti ancemerere kunyumba kwace. Tendeni tione kuti pyenepi pyacitika tani.

Atowereri akutoma a Yezu akhali Ayuda, mbwenye Korineri nee akhali Muyuda tayu. Ngakhale tenepa iye akhafuna Mulungu, akhaphembera kwa iye, na akacitira anthu pinthu pizinji pyakukoma ntima. Inde, namaulo anango anju aonekera kwa iye mbalonga: ‘Mulungu akomerwa na iwe, na iye anadzatawira maphembero ako. Tuma amuna angasi towera akakwate mamuna unango anacemerwa Pedru. Iye ali ku Yopa pa nyumba ya Simoni, anakhala duzi na bara.’

Inde, m’nzidzi uneule ene Korineri atuma amuna angasi towera akasake Pedru. Mangwana mwace, mukhafika amuna duzi na Yopa, Pedru akhali pa ntsoi yakuzwerera ya nyumba ya Simoni. Penepo Mulungu acitisa Pedru kunyerezera kuti akhaona nguwo ikulu mbikatcita kudzulu. Nkati mwa nguwo mukhali mitundu yonsene ya pinyama. Mwakubverana na mwambo wa Mulungu, pinyama pyenepi pikhali pyakukhonda cena kuti pidyiwe, ngakhale tenepa fala yalonga: ‘Pedru, lamuka. Phaa udye.’

Pedru atawira: ‘Nyonyo! Ine cipo ndadya cakukhonda cena.’ Mbwenye fala yapanga Pedru: ‘Leka kucemera cakukhonda cena cinalonga Mulungu cincino kuti cacena.’ Pyenepi pyacitika katatu. Mukasaka Pedru kudziwa kuti pyenepi pikhafuna longanji, amuna adatumwa na Korineri afika pa nyumba mbasaka Pedru.

Pedru atcita mbalonga: ‘Mamuna anasaka imwe ndine. Mwadzeranji?’ Mudafokotoza amuna kuti anju apanga Korineri kuti acemere Pedru kunyumba kwace, Pedru atawira kuenda na iwo. Mangwana mwace Pedru na axamwali ace aenda kaona Korineri ku Cesareya.

Korineri akhadagumanya acibale ace na axamwali apaduzi. Mudafika Pedru, Korineri aenda kagumanikana naye. Iye agwa pantsi na agodama pa miyendo ya Pedru, ninga munaonemwe pano. Mbwenye Pedru alonga: ‘Lamuka; Ine ndine munthu basi.’ Inde, Bibilya isapangiza kuti si pyakuthema tayu kugodama na kulambira munthu. Ife tisafunika kulambira Yahova basi.

Mphapo Pedru amwaza mphangwa kwa adagumaywa. Pedru alonga: ‘Ndisaona kuti Mulungu asatawira anthu onsene anafuna kuntumikira.’ Mukhalonga iye, Mulungu atumiza nzimu wace wakucena, na anthu atoma kulonga m’pilongero pyakusiyana. Pyenepi pyadzumatirisa anyakupfunza Aciyuda adabwera na Pedru, thangwi iwo akhanyerezera kuti Mulungu asaphedza Ayuda basi. Natenepa pyenepi pyaapfunzisa kuti Mulungu nkhabe kuona anthu a ntundu ubodzi ninga adidi peno akufunika kakamwe kwa Mulungu kupiringana anthu a ntundu unango. Kodi ceneci si cinthu cadidi cakuti ife tonsene ticikumbukire?