Kornelyo Atambira Nzimu Wakucena

Ku Sezareya kukhali mamuna m’bodzi akhacemerwa Kornelyo wakuti akhali nkulu wa anyankhondo. Maseze iye nee akhali Muyuda, Ayuda akhamulemedza. Kornelyo akhali wakukoma ntima, pontho akhakomerwa kakamwe kuphedza anthu. Iye akhakhulupira Yahova, pontho akhacita phembero kazinji kene. Ntsiku inango, anju aonekera kuna Kornelyo mbampanga: ‘Mulungu abva maphembero ako. Natenepa, tuma anthu aende ku Jope toera abwerese mamuna anacemerwa Pedhru.’ Mwakukhonda dembuka, Kornelyo atuma amuna atatu toera kuenda ku Jope.

Mu ndzidzi ukhali amuna anewa njira, Pedhru aoneswa masomphenya ku Jope. Iye akhadaona pinyama pyakuti Ayuda nee akhatawiriswa kupidya, pontho iye abva fala ikhalonga kuti asafunika kudya pinyama pyenepi. Pedhru akhonda, mbalonga: ‘Ine cipo ndadya kale cinyama cakukhonda cena mu umaso wanga.’ Buluka penepo, fala yalonga: ‘Pinthu pidaceneswa na Mulungu, leka kupicemera kuti ndi pyakupswipa.’ Pedhru apangwa pontho: ‘Alipo amuna atatu pansuwo, lamuka, tcita toera uende pabodzi na iwo.’ Pedhru aenda pansuwo mbabvundza amuna anewa kuti thangwi yanji ali penepo. Iwo atawira: ‘Ife tatumiwa na Kornelyo, wakuti ndi nkulu wa anyankhondo Waciroma. Imwe musafunika kuenda kunyumba kwace ku Sezareya.’ Amuna anewa atatu agona panyumba pa Pedhru. Mangwana mwace, Pedhru na amuna anewa atatu pabodzi na abale anango a ku Jope aenda ku Sezareya.

Kornelyo pidaona iye Pedhru, agodama patsogolo pace. Mbwenye Pedhru alonga: ‘Lamuka, inembo ndine munthu ninga iwe. Maseze Ayuda nee asaenda m’manyumba mwa madzindza anango, mbwenye Mulungu andipanga toera ndibwere panyumba panu. Mphapo ndipangeni, ndaphata miyendo thangwi yanji mwandicemera.’

Kornelyo apanga Pedhru: ‘Ntsiku zinai nduli ndikhacita phembero kuna Mulungu, penepo pene anju m’bodzi andipanga toera kukucemerani. Taphata miyendo, tipfundziseni mafala a Yahova.’ Pedhru alonga: ‘Cincino ndisabvesesa mwadidi kuti Mulungu nkhabe tsankhulo, mbwenye m’madzindza onsene, Mulungu asakomerwa na ale anan’gopa mbacita pinthu pyadidi.’ Pedhru atoma kuapfundzisa pinthu pizinji thangwi ya Yezu. Buluka penepo, Kornelyo na anthu akhali na iye pabodzi atambira nzimu wakucena mbabatizwa.