Aanju Anango Asandukira Mulungu

Aanju onsene adacita Yahova akhali adidi. Buluka penepo anju m’bodzi adzakhala wakuipa. Iye ndi Sathani Dyabo. Sathani akhafuna kuti anthu pa dziko yapantsi alambire iye m’mbuto mwakulambira Yahova. Onani pidacitika:

M’munda wa Edheni mukhali na miti mizinji yakubala misapo yakukoma. Yahova apanga Adhamu na nkazace, Eva, kuti iwo mbadakwanisa kudya misapo yonsene. Mbwenye ukhalipo muti ubodzi udalonga Mulungu toera akhonde kudya misapo yace. Iye alonga kuti angadya, iwo mbadafa.—Genesi 2:9, 16, 17.

Ntsiku inango Eva akhali ekhene, mbabva nyoka mbikalonga. Mwandimomwene, nee ikhali nyoka ikhalonga; mbwenye akhali Sathani Dyabo adacitisa nyoka kuoneka ninga ikulonga. Sathani apanga Eva kuti angadya nsapo udakhondeswa iwo, iye mbadakhala ninga Mulungu. Sathani alonga pontho kuti Eva nee mbadafa. Pyonsene pikhali pyauthambi. Natenepa Eva akhulupira Sathani mbadya nsapo. Buluka penepo, iye apasa Adhamu, pontho Adhamu adyambo.—Genesi 3:1-6.

Pyenepi pisatipfundzisa kuti Sathani ndi nyakusandukira na nyauthambi. Iye anyengeza Eva kuti angakhonda kubvera Mulungu, nee mbadafa. Unoyu ukhali uthambi. Natenepa, Adhamu na Eva afa. Mbwenye, Sathani nee afa, maseze iye anadzafambo thangwi yakudawa kwace. Cincino iye akupitiriza kunyengeza anthu. Iye akupitiriza na kulonga uthambi, pontho asafuna kuti anthu akhonde kubvera mitemo ya Mulungu.—Juwau 8:44.

Aanju Anango Adzakhalambo Akuipa

Mukupita kwa ndzidzi, aanju anango adzakhalambo akuipa. Aanju anewa aona akazi akubalika pa dziko yapantsi mbafuna kupita nawo m’mabonde. Natenepa iwo abwera pa dziko yapantsi mbacinja manungo awo mbakhala ninga anthu. Buluka penepo, iwo akwata akazi anewa toera akhale akazi awo. Pyenepi nee pikhabverana na cifuniro ca Mulungu.—Genesi 6:1, 2; Yuda 6.

Pyenepi pyabweresa nyatwa zizinji kuna anthu. Ana adabala iwo na akazi anewa, akhali amphambvu kakamwe, pontho aukali. Pakumalisa, dziko yapantsi yadzala na anthu auphanga, natenepa Yahova anyerezera kufudza anthu akuipa na madzi makulu. Nowa na banja yace ndiwo adapulumuka pa Madzi Makulu thangwi akhali akukhulupirika.—Genesi 6:4, 11; 7:23.

Mbwenye aanju anewa akuipa abwerera kudzulu ku mbuto yauzimu; iwo nee afa. Natenepa, iwo atcunyuswa. Mulungu nee atawirisa kuti abwerere pontho mbakhala pabodzi na banja yace ya aanju akulungama. Yahova nee atawirisa aanju anewa akuipa kucinja pontho manungo awo mbakhala ninga anthu. Pontho ntsogolo, anadzaphiwa pa ntsiku ikulu yakutonga miseru.—2 Pedhru 2:4; Yuda 6.

Sathani Athamangiswa Kudzulu

Mu caka 1914, kwacitika nkhondo kudzulu. Bhibhlya isalonga: “Kwacitika nkhondo kudzulu: Migeli na aanju ace amenyana na nyoka ikulu, nyoka ikulu na aanju ace amenya nkhondo, mbwenye iwo akundwa, pontho iwo nee akhalibve na mbuto yawo kudzulu. Natenepa, nyoka ikulu yaponywa pa dziko yapantsi, nyoka ire yakale, inacemerwa Dyabo na Sathani, wakuti asanyengeza dziko yonsene yapantsi. Iye aponywa pa dziko yapantsi, pontho aanju ace aponywa pantsi pano pabodzi na iye.”

Buluka penepo, ninji pidacitika? Bhibhlya isapitiriza kulonga: “Na thangwi ineyi, komerwani kudzulu na imwe munakhala kweneko! Mbwenye dzedze pa dziko yapantsi na bara, thangwi Dyabo atcita kuna imwe, iye ali na ukali ukulu, thangwi asadziwa kuti ndzidzi wace wasala pang’ono basi.”—Apokalipse 12:7-9, 12.

Inde, Sathani na aanju ace akuipa asanyengeza anthu mbabweresa nyatwa pa dziko yapantsi. Aanju anewa akuipa asacemerwa madimonyo. Iwo ndiwo anyamalwa a Mulungu.