Khundu 5
Muoni Wakudzumisa Wa Ufulu Wakusankhula
1, 2. Kodi ndi muoni upi wakudzumisa unacita khundu ya kucitwa kwathu?
TOWERA kubvesesa kuti thangwi yanji Mulungu asalekerera nyatwa na pinafuna kudzacita iye thangwi ya pyenepi, tisafunika kudziwa njira idaticita iye. Iye acita pizinji kupiringana kutipasa manungo na ongo. Iye aticitambo na makhaliro akupambulika a manyerezero na mabvero.
2 Khundu yakufunika ya manyerezero na mabvero athu ndi ufulu wakusankhula. Inde, Mulungu atipasa mphambvu ya ufulu wakusankhula. Unoyu ndi muoni wakudzumisa wakubuluka kwa iye.
Ife Tacitwa Tani
3-5. Thangwi yanji tisakomerwa na ufulu wakusankhula?
3 Tendeni tione kuti ufulu wakusankhula waphatanizwa tani m’njira ya Mulungu kulekerera nyatwa. Pakutoma, nyerezerani ipi: Kodi imwe musakomerwa thangwi ya kukhala na ufulu wakusankhula pinafuna imwe kucita na kulonga, pinafuna imwe kudya na kubvala, ntundu wa basa inafuna imwe kuphata, na kunafuna imwe kukhala na njira inafuna imwe kukhala maso? Peno mbumudafuna kuti munthu unango akupangeni mafala onsene anafuna imwe kulonga na pyakucita pyonsene nzidzi onsene m’umaso wanu?
4 Nkhabepo munthu wa manyerezero adidi anafuna kupokoserwa utongi wa umaso wace m’pinthu pyonsene. Thangwi yanji? Thangwi ya njira idaticita Mulungu. Biblya isatipanga kuti Mulungu acita anthu ‘akulandana na iye,’ na ubodzi mwa makhaliro a Mulungu ndi ufulu wakusankhula. (Genesi 1:26; Deuteronomyo 7:6) Mudacita iye anthu, iye aapasa nkhaliro unoyu wakudzumisa—muoni wa ufulu wakusankhula. Ineyi ndi thangwi ibodzi inaticitisa kukhala akuipirwa thangwi yakucitwa mabitcu na atongi akuponderera.
5 Natenepa cifuno ca ufulu cidabwera cokha tayu, thangwi Mulungu ndi Mulungu wa ufulu. Biblya isalonga: “Kunakhala nzimu wa Mbuya kweneko anthu anatongana tayu [peno pana ufulu].” (2 Akorinto 3:17) Na thangwi ineyi, Mulungu atipasa ufulu wakusankhula ninga khundu ya kucitwa kwathu. Nakuti akhadziwa njira ikhafuna phata basa manyerezero na mabvero athu, iye akhadziwa kuti mbitidakhala akutsanzaya kakamwe na ufulu wakusankhula.
6. Kodi Mulungu acita tani ongo wathu kuti uphate basa pabodzi na ufulu wakusankhula?
6 Pabodzi na ufulu wakusankhula, Mulungu atipasa luso ya kunyerezera, kudinga pinthu, kucita pyakusankhula na kudziwa cadidi na cakuipa. (Ahebere 5:14) Natenepa, ufulu wakusankhula usafunika kubuluka m’nzeru zadidi. Ife nee tacitwa ninga mitcini yakusowa nzeru yokhonda khala na pifuno mwa iyo ene tayu. Pontho nee tacitwa kuti ticite pinthu mwacibaliro ninga munacita pinyama. Mbuto mwa pyenepi, ongo wathu wakudzumisa wacitwa towera uphate basa mwakubverana na ufulu wathu wakusankhula.
Matomero Adidi
7, 8. Kodi ndi matomero api adidi adapasa Mulungu anyakubala athu akutoma?
7 Towera kupangiza kuti Mulungu akhali wacitsalakano, kusiyapo ufulu wakusankhula, anyakubala athu akutoma, Adamu na Eva, apaswa pinthu pyonsene pyakuti munthu onsene mbadakwanisa kupifuna. Iwo aikhwa m’paradizu ikulu ninga munda wa maluwa. Iwo akhali na pinthu pizinji. Iwo akhali na manyerezero na manungo aungwiro, natenepa iwo nee mbadakalamba peno kuduwala peno kufa—iwo mbadakhala maso kwenda na kwenda. Iwo mbadakhala na ana aungwiro akuti mbadatsanzayambo na tsogolo yokhonda mala. Na anthu akuti mbadathimizirika m’cilengesero mbadakhala na basa yakutsanzayisa yakuphinduza dziko yonsene yapantsi kukhala paradizu.—Genesi 1:26-30; 2:15.
8 M’kulonga thangwi ya pidacitwa, Biblya isalonga: “Mulungu, na [kuona] pyonsene pidachita iye, apiona kuti mphyadidi maningi.” (Genesi 1:31) Pontho Biblya isalonga pya Mulungu: “Mabasa ache mbakulungama.” (Deuteronomyo 32:4) Inde, Nciti apasa banja ya anthu matomero aungwiro. Nkhabe udidi unango ukhafuna citwa kupiringana unoyu. Iye apangiza kukhala Mulungu wacitsalakano cikulu!
Ufulu Nkati Mwa Madire
9, 10. Thangwi yanji ufulu wakusankhula usafunika kutongwa mwadidi?
9 Kodi cifuniro ca Mulungu ndi cakuti ufulu wakusankhula ukhale wakusowa madire? Nyerezerani nzinda wakuti uli na miotokala yakuinjipa kakamwe mbusowa miyambo inatonga m’nseu, kwakuti munthu onsene mbadatekenya ku khundu yonsene na kuthamanga munafunira iye. Kodi mbumudafuna kutekenya m’makhaliro anewa? Nkhabe, thangwi anewa mbadakhala matekenyero akusowa mwambo na mwandimomwene pyenepi mbipidacitisa ngobzi na pidengwa pizinji.
10 Pyenepi ndi sawasawa na muoni wa Mulungu wa ufulu wakusankhula. Ufulu wakusowa madire mbudacitisa mbumba ya anthu kusowa mwambo. Pasafunika miyambo towera kutsogolera mabasa a anthu. Mafala a Mulungu asalonga: ‘Khalani ninga anthu aufulu, na lekani kuphatisira ufulu wanu ninga cinthu cakucitira naco uipi.’ (1 Pedro 2:16, A Bíblia de Jerusalém) Mulungu asafuna kuti ufulu wakusankhula utongwe towera anthu akhale mwadidi. Iye hadaticita kuti tikhale na ufulu wakusowa madire tayu, mbwenye ufulu wakukhala na madire, wakungonjera utongi wa mwambo.
Miyambo Ya Ani?
11. Kodi ife tacitwa towera kubvera miyambo ya ani?
11 Kodi ife tacitwa towera kubvera miyambo ya ani? Khundu inango ya lemba ya 1 Pedro 2:16 (BJ) isalonga: ‘Imwe ndimwe mabitcu a Mulungu tayu a munthu.’ Pyenepi nee pisabveka ubitcu waukali, mbwenye, mbuto mwace, pisabveka kuti ife tacitwa towera tikhale akutsanzaya kakamwe munangonjera ife miyambo ya Mulungu. (Mateo 22:35-40) Miyambo yace, mwakusiyana na miyambo yakucitwa na anthu, isapereka citsogolero cadidi. “Ine ndine Mbuya, Mulungu wako, ule anafuna kukupfundisa towera udidi wako, mbakuendesa pa njira inatongwa iwe kutoweza.”—Izaiya 48:17.
12. Kodi ndi ufulu wanji wakusankhula uli na ife nkati mwa miyambo ya Mulungu?
12 M’nzidzi ubodzi ene, miyambo ya Mulungu isatawirisa ufulu ukulu wakusankhula nkati mwa madire awo. Pyenepi pisacitisa kusiyana-siyana na pisacitisa banja ya anthu kukhala yakutsanzaya. Nyerezerani mitundu yakusiyana-siyana ya pyakudya, nguwo, nyimbo, luso yakucita pinthu, na nyumba ziri pa dziko yapantsi. Mwandimomwene ife tisafuna kusankhula tekha m’pinthu pyenepi mbuto mwakusankhulirwa na munthu unango.
13. Kodi tisafunika kubvera miyambo ipi yakumanungo towera udidi wathu ene?
13 Natenepa ife tacitwa towera tikhale akutsanzaya kakamwe munangonjera ife miyambo ya Mulungu ya makhaliro aumunthu. Ndi sawasawa na kungonjera miyambo yakumanungo ya Mulungu. Mwacitsanzo, tingapwaza mwambo wa mphambvu yakukwewa mbitinumpha pa mbuto yapadzulu kakamwe, tinadzaphekeka peno kufa. Tingapwaza miyambo ya nkati mwa manungo athu mbitisiya kudya, kumwa madzi, peno kupuma, tinadzafa.
14. Kodi tisapidziwa tani kuti anthu nee acitwa towera akhonde tongwa na Mulungu?
14 Nakuti tacitwa na cifuno ca kungonjera miyambo yakumanungo ya Mulungu, tacitwa na cifuno ca kungonjera miyambo ya Mulungu ya makhaliro adidi na ya makhaliro a anthu. (Mateo 4:4) Anthu nee acitwa towera apembere mokhonda tongwa na Nciti wawo. Mprofeta Yeremiya alonga: “Nee munthu mbodzi asadziwa pya patsogolo pache nee kupitonga. Sandikani anthu a mbumba yanu.” (Yeremiya 10:23, 24) Natenepa m’njira yonsene anthu acitwa towera akhale maso pantsi pa utongi wa Mulungu, tayu wawo ene.
15. Kodi miyambo ya Mulungu mbidakhala yakunensa kwa Adamu na Eva?
15 Kubvera miyambo ya Mulungu nee mbukudakhala kwakunensa kwa anyakubala athu akutoma tayu. Mbuto mwa pyenepi, mbukudaaphedza kuti akhale mwadidi pabodzi na banja yonsene ya anthu. Mbidakhala kuti banja yakutoma yakhala nkati mwa madire a miyambo ya Mulungu, pyonsene mbipidakhala mwadidi. Mwandimomwene, mbitidakhala cincino m’paradizu wakudzumisa wakutsanzayisa ninga banja ya anthu akufunana na akubverana! Mwenemu nee mbumudakhala uipi, nyatwa na kufa.
[Foto pa tsamba 11]
Nciti apasa anthu matomero aungwiro
[Foto pa tsamba 12]
Kodi mbumudafuna kutekenya motokala m’nseu wakudzala na miotokala mbukhonda khala na miyambo inatonga m’nseu?