Pfunziro 10

Pyakucita Pinaida Mulungu

Kodi musafunika kuona tani pinthu pinalonga Mulungu kuti ndi pyakuipa? (1)

Kodi ndi mitundu ipi yakupita m’mabonde yakuti ndi yakuipa? (2) Kodi Nkristu asafunika kuona tani uthambi? (3) masenzekero akufuna kuwina kobiri? (3) kuba? (3) uphanga? (4) kukhulupira mizimu? (5) kuledzera? (6)

Kodi munthu anakwanisa tani kusudzuka ku pyakucita pyakuipa? (7)

1. Anzakazi a Mulungu asafuna pinthu pyadidi. Mbwenye iwo asafunikambo kupfunza kuida pinthu pyakuipa. (Masalmo 97:10) Pyenepi pisabveka kucalira pyakucita pinango pinaida Mulungu. Kodi pinango pya pyakucita pyenepi ndi pipi?

2. Ulukwali: Kupita m’mabonde mbamusati kumanga banja, upombo, kupita m’mabonde na cinyama, cisumbali na kupita m’mabonde kwa mamuna na mamuna pyonsene ipi ndi madawo makulu kwa Mulungu. (Levitiko 18:6; Aroma 1:26, 27; 1 Akorinto 6:9, 10) Khala mamuna na nkazi nee amanga banja mwakubverana na mwambo mbwenye asakhala pabodzi, iwo asafunika kumwalana peno asafunika kumanga banja mwakulinganira mwakubverana na mwambo.—Ahebere 13:4.

3. Uthambi, Masenzekero Akufuna Kuwina Kobiri, Kuba: Yahova Mulungu nkhabe nyengeta. (Tito 1:2) Munthu anafuna kukhala wakutawirika kwa iye asafunika kucalira uthambi. (Misangani 6:16-19; Akolose 3:9, 10) Ntundu onsene wa masenzekero akufuna kuwina kobiri ndi wakukulumizwa na kucenama. Natenepa, Akristu nkhabe cita khundu mu ntundu onsene wa masenzekero akufuna kuwina kobiri, ninga malotariya, mapika a makavalu na bingo. (Aefesi 5:3-5) Na Akristu nkhabe kuba. Iwo nkhabe gula pinthu pyakubiwa peno kukwata pinthu mwakukhonda kutawiriswa.—Eksodo 20:15; Aefesi 4:28.

4. Kuipirwa, Uphanga: Kuipirwa kwakuti bwerani mudzaone kungakwanise kutsogolera ku makhaliro auphanga. (Genesi 4:5-8) Munthu wauphanga nkhabe khala xamwali wa Mulungu. (Masalmo 11:5; Misangani 22:24, 25) Ndi pyakuipa kuthabusa peno kubwezera pyakuipa na pyakuipa pyakuti anango angakwanise kuticitira.—Misangani 24:29; Aroma 12:17-21.

5. Ufiti Na Kukhulupira Mizimu: Anthu anango asaphemba mphambvu ya mizimu towera kuyesera kukonza mautenda. Anango asalodza anyamalwa awo towera aaduwalise peno ngakhale towera kuapha. Mphambvu inaphatisirwa mu pyakucita pyenepi pyonsene ndi ya Sathani. Natenepa Akristu nkhabe funika kucita khundu m’pinthu pyenepi pyonsene. (Deuteronomyo 18:9-13) Kukhala duzi na Yahova ndi citsidzikizo cadidi kakamwe khala anthu anango asafuna kutilodza.—Misangani 18:10.

6. Kuledzera: Si pyakudawika tayu kumwa vinyu pang’ono, bwadwa, peno cakumwa cinango cakuledzeresa. (Masalmo 104:15; 1 Timoti 5:23) Mbwenye kumwa kwakupiringana ndida na kuledzera ndi kwakudawika pamaso pa Mulungu. (1 Akorinto 5:11-13; 1 Timoti 3:8) Kumwa kwakupiringana ndida kungakwanise kufudza ungumi wanu na kufudza banja yanu. Iko kungakwanisembo kukucitisani kugwa mwakukhonda nensa m’mayesero anango.—Misangani 23:20, 21, 29-35.

7. Anthu anacita pinthu pinalonga Mulungu kuti ndi pyakuipa nkhabe ‘kudzatambira pya dziko [peno umambo wa] Mulungu tayu.’ (Agalata 5:19-21) Khala imwe musafunadi Mulungu na musafuna kunkomeresa, munakwanisa kusiya pyakucita pyenepi. (1 Jwau 5:3) Pfunzani kuida pire pinalonga Mulungu kuti mphyakuipa. (Aroma 12:9) Citani uxamwali na anthu ale akuti ali na makhaliro aumulungu. (Misangani 13:20) Kucita uxamwali na Akristu akukola kungakwanise kukhala ncera wa ciphedzo. (Tyago 5:14) Kupiringana pyonsene, nyindirani ciphedzo ca Mulungu bulukira m’phembero.—Afilipi 4:6, 7, 13.

[Mafoto pa matsamba 20, 21]

Mulungu asaida kuledzera, kuba, masenzekero akufuna kuwina kobiri na macitiro auphanga