Pfunziro 14

Axamwali A Mulungu Asacalira Pinthu Pyakuipa

Satana asanyengerera anthu towera acite pinthu pyakuipa. Anafuna khala xamwali wa Mulungu asafunika kuida pinthu pinaida Yahova. (Masalmo 97:10) Ipi ndi pinthu pingasi pyakuti axamwali a Mulungu asapicalira:

Madawo a ulukwali. “Leka kucita upombo tayu.” (Eksodo 20:14) Kugonana banja mbidzati kucitika mphyakuipa pontho.—1 Akorinto 6:18.

Kuledzera. ‘Akuledzera hanadzakhala m’umambo wa Mulungu tayu.’—1 Akorinto 6:10.

Kupha, kutaya mimba. “Leka kupha munthu tayu.”—Eksodo 20:13.

Kuba. “Leka kuba tayu.”—Eksodo 20:15.

Unthawatawa. Yahova asaida “lirimi yauthambi.”—Misangani 6:17.

Uphanga na ukali wakupitiriza. “Yahova . . . ndimomwene asaida ale anakomerwa na uphanga.” (Masalmo 11:5) “Mabasa a nyama [asaphataniza] . . . kukhala na ukali.”—Agalata 5:19, 20.

Juga. “[Lekani] kuendekana na . . . munthu wa umbirimi.”—1 Akorinto 5:11.

Kuidana kwa ntundu peno ntupo. “Pitirizani na kufuna anyamalwa anu aphemberereni anakutcingani.”—Mateo 5:43, 44.

Pinthu pinatipanga Mulungu ndi pyaudidi wathu. Midzidzi inango pisakhala pyakunetsa kucalira pinthu pyakuipa. Na ciphedzo ca Yahova pabodzi na ca Mboni zace, imwe munakwanisa kucalira kucita pinthu pinamuipira Mulungu.—Izaiya 48:17; Afilipi 4:13; Ahebere 10:24, 25.