Pfunziro 13

Kodi Munakwanisa Tani Kudzindikira Uphemberi Wandimomwene?

Kodi mauphemberi onsene asakomeresa Mulungu, peno ndi ubodzi basi? (1)

Thangwi yanji pana mauphemberi mazinji analonga kuti ndi Akristu? (2)

Kodi munakwanisa tani kudzindikira Akristu andimomwene? (3-7)

1. Yezu atomesa uphemberi wandimomwene ubodzi basi Wacikristu. Natenepa, lero kusafunika kuti kukhale manungo peno nsoka ubodzi basi wa alambiri andimomwene a Yahova Mulungu. (Jwau 4:23, 24; Aefesi 4:4, 5) Biblya isapfunzisa kuti ndi anthu akucepa basi anagumanika mu nseu ung’ono unatsogolera ku umaso.—Mateo 7:13, 14.

2. Biblya yalongeratu kuti pakumala kufa apostolo, pipfunziso pyakuipa na macitiro akukhonda khala acikristu pang’ono na pang’ono mbipidapita m’mpingo Wacikristu. Anthu mbadapeusa anyakukhulupira kuti aatowere mbuto mwa kutowerera Kristu. (Mateo 7:15, 21-23; Machitiro 20:29, 30) Ndi thangwi yace tisaona mauphemberi mazinji akusiyana-siyana analonga kuti ndi Akristu. Kodi tinakwanisa tani kudzindikira Akristu andimomwene?

3. Cidzindikiro cakupambulika kakamwe ca Akristu andimomwene ndi cakuti iwo ali na kufunana kwandimomwene pakati pawo. (Jwau 13:34, 35) Iwo nkhabe pfunziswa kuti ndiwo anthu adidi kupiringana anthu a mitundu inango peno ntundu wa khanda. Pontho nkhabe pfunziswa kuida anthu akubuluka ku madziko anango. (Machitiro 10:34, 35) Natenepa, iwo nkhabe cita khundu mu nkhondo. Akristu andimomwene asatsalakanana unango na nzace ninga abale na alongo.—1 Jwau 4:20, 21.

4. Cidzindikiro cinango ca uphemberi wandimomwene ndi cakuti piwalo pyawo pisalemedza kakamwe Biblya. Iwo asaitawira ninga Mafala a Mulungu na asakhulupira pinalonga iyo. (Jwau 17:17; 2 Timoti 3:16, 17) Iwo asaona Mafala a Mulungu kukhala akufunika kakamwe kupiringana nzeru peno misambo ya anthu. (Mateo 15:1-3, 7-9) Iwo asawangisira kakamwe kukhala maso mwakubverana na Biblya mu umaso wawo wa ntsiku na ntsiku. Natenepa iwo nkhabe kumwaza mphangwa zadidi buluka penepo mbacita pyakusiyana na pinalonga iwo.—Tito 1:15, 16.

5. Uphemberi wandimomwene usafunikambo kulemedza dzina ya Mulungu. (Mateo 6:9) Yezu adziwisa dzina ya Mulungu, Yahova, kwa anango. Akristu andimomwene asafunika kucitambo cibodzibodzi. (Jwau 17:6, 26; Aroma 10:13, 14) Kodi ndi anthu api pa cisa canu anapanga anango pya dzina ya Mulungu?

6. Akristu andimomwene asafunika kumwaza mphangwa zakulonga pya Umambo wa Mulungu. Yezu acita pyenepi. Nzidzi onsene iye alonga pya Umambo. (Luka 8:1) Iye atuma anyakupfunzace kuti amwazembo mphangwa zibodzibodzi pa dziko yonsene yapantsi. (Mateo 24:14; 28:19, 20) Akristu andimomwene asakhulupira kuti ndi Umambo wa Mulungu basi unafuna kudzabweresa ntendere wandimomwene na citsidzikizo pa dziko ino yapantsi.—Masalmo 146:3-5.

7. Anyakupfunza a Yezu nkhabe funika kucita khundu ya dziko ino yakuipa. (Jwau 17:16) Iwo nkhabe cita khundu m’pinthu pya ndale ya dziko na mu nthonga za anthu. Iwo asacalira makhaliro akuipa, pyakucita pyakuipa na mabasa akuipa pyakuti pisagumanika konsene kwene mu dziko lero. (Tyago 1:27; 4:4) Kodi munakwanisa kudzindikira nsoka wauphemberi pa cisa canu wakuti uli na pidzindikiro pyenepi pya Cikristu candimomwene?

[Mafoto pa matsamba 26, 27]

Akristu andimomwene asafunana unango na nzace, asalemedza Biblya na asamwaza mphangwa zakulonga pya Umambo wa Mulungu