Pfunziro 6
Paradizu Iri Cifupi!
Pinthu pyakuipa pinacitika cincino pa dziko yapantsi pisapangiza kuti Paradizu iri cifupi. Bibilya yalonga kuti nzidzi pang’ono, Paradizu mbidzati fika, panadzakhala nzidzi wa kugopswa. Tiri kukhala maso cincino m’midzidzi ineyi. Pinthu pinango pidalonga Bibilya kuti pinadzacitika ndi ipi:
Nkhondo zikulu. “Mbumba ibodzi inadzamenyana na mbumba inzace, umambo na umambo unzace.” (Mateo 24:7) Profesiya ineyi yakwaniriswa. Kubulukira m’caka ca 1914, zacitika nkhondo ziwiri za pa dziko yonsene na nkhondo zakuinjipa zing’ono zing’ono. Pikwi na pikwi pya anthu afa m’nkhondo zenezi.
Kumwazika kwa matenda. Kunadzakhala, “m’mbuto ibodzi na inango miliri”. (Luka 21:11) Kodi pyenepi pisacitika? Inde. Cancro, matenda a ntima, cokolo, malaria, Sida na matenda anango asapha pikwi na pikwi pya anthu.
Kusoa kwa pyakudya. M’dziko yonsene yapantsi, muna anthu akusoa cakudya cakukwana. Caka na caka, anthu pikwi na pikwi asafa na njala. Ceneci ndi cidzindikiro cinango cakuti Paradizu inabwera cincino pano. Bibilya isati: “Panadzakhala kusoa kwa pyakudya.”—Marko 13:8.
Piteketeke. “Panadzakhala . . . piteketeke mbuto zakusianasiana.” (Mateo 24:7) Pyenepi pisacitikambo m’nzidzi wathu uno. Anthu akupiringana cikwi ca cikwi cibodzi afa m’piteketeke kubulukira m’caka ca 1914.
Anthu akuipa. Anthu anadzakhala “akufuna kobiri” na ‘akupifuna okhene’. Anadzakhala “akufunisisa pyakutsanzaisa kupiringana akufuna Mulungu”. Ana anadzakhala “akukhonda bvera akuwabala”. (2 Timoti 3:1-5) Kodi imwe nkhabe kutawira kuti lero alipo anthu akuinjipa atenepa? Ndi anthu akukhonda lemedza Mulungu na akucitisa pyakunentsa kwa ale analesera kupfunza pya Mulungu.
Umphandu. Kunadzakhala pina “kuinjipa kwa kukhonda tongeka”. (Mateo 24:12) Panango munatawira kuti umphandu cincino wanyanya kupiringana piaka pyandulimu. Anthu ku mbuto zonsene ali pa ngobzi ya kuberwa, kunyengezwa na kuphekeswa.
Pyonsenepi pisaonesa kuti Umambo wa Mulungu uli cifupi. Bibilya isati: “Pakuona pinthu pyenepi kucitika, dziwani kuti umambo wa Mulungu uli cifupi.” (Luka 21:31) Kodi Umambo wa Mulungu ndi ninji? Ndi utongi wa kudzulu wa Mulungu unafuna dzabweresa Paradizu pa dziko yapantsi. Umambo wa Mulungu unadzakhala m’mbuto mwa maumambo onsene a anthu.—Danyele 2:44.