Nsolo Khumi Nacinai

Kodi Yahova Asatsogolera Tani Gulu Yace?

1. Kodi Biblya isatipanganji pya gulu ya Yahova, na thangwi yanji mphangwa zenezi ndi zakufunika kwa ife?

KODI Mulungu ali na gulu? Malemba akupepeserwa asatipanga kuti ali nayo. M’mafala ace, iye asatipasa nthunzi wa khundu yakudzulu yakudzumatirisa ya gulu ineyi. (Ezekyele 1:1, 4-14; Danyele 7:9, 10, 13, 14) Maseze ife nkhabe kwanisa kuona khundu ineyi yakukhonda oneka, iyo isakhuya kakamwe alambiri andimomwene lero. (2 Amambo 6:15-17) Pontho, gulu ya Yahova iri na khundu yakuoneka, pa dziko yapantsi. Biblya isatiphedza kuona kuti gulu ineyi ndi ninji na kuti Yahova asaitsogolera tani.

Kudzindikira Khundu Yakuoneka

2. Kodi ndi mpingo upi upswa udacita Mulungu?

² Nkati mwa piaka 1.545 dzinza ya Israele ikhali mpingo wa Mulungu. (Machitiro 7:38) Mbwenye Israele adodoma m’kukoya miyambo ya Mulungu na akhonda Mwanace. Ninga cakubwereswa, Yahova akhonda mpingo unoyu mbausiya. Yezu apanga Ayuda: ‘Mudzi wanu unadzakhala madembe.’ (Mateo 23:38) Natenepa Mulungu acita mpingo upswa, udacita na iye cibverano cipswa. Mpingo unoyu mbudakhala na anthu akukwana 144.000 akusankhulwa na Mulungu towera akhale pabodzi na Mwanace kudzulu.—Apokalipse 14:1-4.

3. Kodi ndi ninji cidacitika pa Pentekoste ya 33 E.C. ninga cipangizo capakweca cakuti kutomera pa nzidzi unoyu Mulungu akhaphatisira mpingo upswa?

³ Anthu akutoma a mpingo unoyu upswa adzodzwa na nzimu wakucena wa Yahova pa Pentekoste ya 33 E.C. Ife tisaleri pya cakucitika ceneci cakupambulika: “Pidafika ntsiku ya Pentekoste, anthu onsene akhali pabodzi pene pa mbuto ibodzi ene. Penepo wabuluka kudzulu mungu ninga wa chondzi chikulu udadzadza nyumba mukhakhala iwo. Aaonekerambo malirimi ninga a moto, mbamwazika mbaphamira anthu, munthu lirimi yache. Onsene adzalibswa na Nzimu Wakuchena.” (Machitiro 2:1-4) Natenepa, nzimu wa Mulungu wapangiza pakweca kuti unoyu ukhali nsoka wa anthu akhafuna Mulungu kuaphatisira towera kukwanirisa cifuniro cace pantsi pa citsogolero ca Yezu Kristu kudzulu.

4. Kodi mbani anacita khundu ya gulu yakuoneka ya Yahova lero?

⁴ Lero alipo pang’ono basi a nsoka wa a 144.000 pa dziko yapantsi. Mbwenye m’kukwanirisika kwa profesiya ya Biblya, “[mwinji] ukulu” wa “mabira anango,” mamiliyau a iwo, uli kugumanywa na akusala akudzodzwa. Yezu, Nkumbizi Wadidi, agumanya mabira anango pabodzi na akusala akudzodzwa towera akhale nkumbi ubodzi basi wakutsogolerwa na iye ninga Nkumbizi wawo mbodzi. (Apokalipse 7:9; Jwau 10:11, 16) Iwo onsene asacita mpingo ubodzi wakuphatana, gulu yakuoneka ya Yahova.

Masasanyiro A Gulu Yakutsogolerwa Na Mulungu

5. Kodi mbani anatsogolera gulu ya Mulungu, na m’njira ipi?

⁵ Mafala a m’Malemba akuti “igreja [peno mpingo] ya Mulungu wa moyo” asapangiza pakweca ntsogoleri wawo. Gulu ineyi isatsogolerwa peno isatongwa na Mulungu. Yahova asapereka citsogolero kwa mbumba yace kubulukira mwa Yezu, adaikha Iye kukhala Nsolo wakukhonda oneka wa mpingo, na Mafala Ace akupepeserwa, Biblya.—1 Timoti 3:14, 15; Aefesi 1:22, 23; 2 Timoti 3:16, 17.

6. (a) Kodi pyapangizwa tani kuti m’piaka dzana yakutoma mpingo ukhatambira citsogolero cakudzulu? (b) Kodi ndi ninji cinapangiza kuti Yezu aciri Nsolo wa mpingo?

⁶ Citsogolero ceneci caoneka pakweca pa Pentekoste. (Machitiro 2:14-18, 32, 33) Capangizwambo mudatsogolera anju wa Yahova kumwaza mphangwa zadidi m’Afrika, mudapasa fala ya Yezu pitsogolero pa kusanduzika kwa Saulu wa ku Tarsu, na mudatoma Pedro basa ya kumwaza mphangwa pakati pa Ajentiyu. (Machitiro 8:26, 27; 9:3-7; 10:9-16, 19-22) Mbwenye, m’kupita kwa nzidzi, nee munthu mbodzi abva fala kubulukira kudzulu, kuona anju peno kupaswa mitukwa ya nzimu yakucita pirengo. Yezu akhadapikira: “Ine ndinakhala na imwe ntsiku zonsene mpaka kumala kwa pantsi pano [peno makhaliro a pinthu]!” (Mateo 28:20, MZ; 1 Akorinto 13:8) Lero, Mboni za Yahova zisadzindikira citsogolero ca Yezu. Mwakusowa citsogolero ceneci, kumwaza mphangwa za Umambo pantsi pa udani ukulu nee mbukudakwanisika tayu.

7. (a) Kodi mbani anacita khundu ya “mbandazi wakukhulupirika na wanzeru,” na thangwi yanji? (b) Kodi ndi basa ipi idapaswa “mbandazi”?

⁷ Cifupi na kufa kwace, Yezu apanga anyakupfunzace pya “mbandazi wakukhulupirika na wanzeru” wakuti iye, ninga Mbuya, mbadampasa kupitawirira kwakupambulika. “Mbandazi” unoyu mbadakhalapo pa nzidzi wakubuluka kwa Mbuya kuenda kudzulu na mbadapitiriza kuphata basa mwaphinga mpaka pa kubwerera kwa Kristu mwakukhonda oneka m’mphambvu ya Umambo. Mafokotozero anewa nkhabe bverana na munthu mbodzi basi tayu, mbwenye asabverana mwadidi na mpingo wakudzodzwa wa Kristu. Pakumala kuugula na ciropa cace, Yezu aucemera kuti ndi “mbandazi.” Iye apasa piwalo pya mbandazi unoyu basa ya kucita anyakupfunza na kupitiriza kuapasa ‘na kweru [peno m’nzidzi wakuthema] phoso yawo [yauzimu].’—Mateu 24:45-47, MZ; 28:19, MZ; Izaiya 43:10; Luka 12:42; 1 Pedro 4:10.

8. (a) Kodi nsoka wa mbandazi uli na kupitawirira kwanji cincino? (b) Thangwi yanji kutawira kwathu citsogolero cinapaswa ife na nsoka wa mbandazi ndi kwakufunika?

⁸ Nakuti nsoka wa mbandazi ukhacita mwakukhulupirika basa ya Mbuyawo mudabwerera iye mwakukhonda oneka m’caka ca 1914, pana cipangizo cakuti mbandazi unoyu atambira kupitawirira kwakuthimizirika m’caka ca 1919. Kutomera m’caka ceneci umboni wa Umambo usaperekwa m’dziko yonsene yapantsi, na mwinji ukulu wa alambiri a Yahova uli kugumanywa towera upulumuke pa nyatwa zikulu. (Mateo 24:14, 21, 22; Apokalipse 7:9, 10) Anewa asafunambo cakudya cauzimu, na asapaswa cakudya ceneci na nsoka wa mbandazi. Natenepa, towera tikomerese Yahova, tisafunika kutawira citsogolero cinatipasa iye kubulukira ku nsoka unoyu na kucita pinthu mwakubverana na citsogolero ceneci.

9, 10. (a) Kodi ndi masasanyiro api adacitwa towera kutonga miseru ya cipfunziso na kupasa citsogolero ca kumwaza mphangwa zadidi m’piaka dzana yakutoma? (b) Kodi ndi masasanyiro api anagumanika lero towera kutsogolera mabasa a mbumba ya Yahova?

⁹ M’midzidzi inango, pasabuluka mabvunzo thangwi ya cipfunziso na macitiro a pinthu. Kodi pasacitwanji na mabvunzo anewa? Machitiro kapitulu 15 asatipanga njira idatongwa nseru ukhaphataniza Ajentiyu akusanduzika. Nseru unoyu waperekwa kwa apostolo na akulu ku Yerusalemu, akuti akhaphata basa kweneku ninga mathubo akutonga. Amuna anewa nee akhali anthu akukhonda dodomeka tayu, mbwenye Mulungu aaphatisira. Iwo adinga malemba akulonga pya nseru unoyu na adingambo cipangizo cakuti nzimu wa Mulungu waphata basa m’kufungulira njira Ajentiyu. Buluka penepo iwo augwanda nseru. Mulungu apasa nkhombo masasanyiro anewa. (Machitiro 15:1-29; 16:4, 5) Kubulukira ku mathubo aneale, anthu atumizwa kuenda kaphedza kumwaza mphangwa za Umambo.

¹⁰ M’ntsiku zathu, ale anacita khundu ya Mathubo Akutonga a gulu yakuoneka ya Yahova asacitwa na abale akudzodzwa na nzimu akubulukira ku madziko akusiyanasiyana na iwo asagumanika ku ofesi ikulu ya dziko yonsene yapantsi ya Mboni za Yahova. Pantsi pa citsogolero ca Yezu Kristu, Mathubo Akutonga asathimizira ulambiri wakucena m’madziko onsene, mbatsogolera mabasa akumwaza mphangwa a Mboni za Yahova m’pikwi pya mipingo. Ale anacita khundu ya Mathubo Akutonga ali na maonero mabodzi ene na mpostolo Paulu, adalembera Akristu anzace: “Kukhala ninga nyakutonga kunakutawirisani tayu, tinafuna kukuphedzani mwakusekera, thangwi na kutawira kwanu kwawanga kale [‘muli dzololo thangwi ya cikhulupiro canu,’ NM].”—2 Akorinto 1:24.

11. (a) Kodi akulu ampingo na atumiki akutumikira asaikhwa tani? (b) Kodi tisafunika kubverana tani mwapaduzi na anyakuikhwa anewa?

¹¹ Mathubo Akutonga a Mboni za Yahova asasankhula abale akuthema mbaapasa mphambvu za kuikha akulu ampingo na atumiki akutumikira towera atsalakane mipingo. Pinthu pinafuna kuoneka mwa ale anafuna khala akulu ampingo peno atumiki akutumikira pyalembwa m’Biblya na kusadziwika kuti amuna anewa si aungwiro tayu na kuti asadodoma. Akulu ampingo anasankhula amuna anewa na ale anaaikha ali na kupitawirira kukulu pamaso pa Mulungu. (1 Timoti 3:1-10, 12, 13; Tito 1:5-9) Natenepa, iwo asaphembera towera agumane ciphedzo ca nzimu wa Mulungu na asasaka citsogolero cinagumanika m’Mafala akupepeserwa. (Machitiro 6:2-4, 6; 14:23) Tendeni tipereke takhuta kwa ‘mitukwa ineyi iri anthu,’ inatiphedza kufikira ‘ubodzi m’cikhulupiro.’—Aefesi 4:8, 11-16, NM.

12. Kodi Yahova asaphatisira tani akazi m’masasanyiro a gulu yace?

¹² Malemba asalonga kuti anafunika kuyang’anira m’mipingo ndi amuna. Pyenepi nkhabe pwaza akazi, thangwi anango a iwo asatambira unthaka wa Umambo wakudzulu, na ndiwo anacita pizinji m’basa yakumwaza mphangwa. (Masalmo 68:11) Pontho, m’kutsalakana mwakukhulupirika kupitawirira kwawo pa banja, akazi asacitisa kuti mpingo ukhale na dzina yadidi. (Tito 2:3-5) Mbwenye amuna ndiwo anapfunzisa m’mpingo thangwi aikhwa towera kucita pyenepi.—1 Timoti 2:12, 13.

13. (a) Kodi Biblya isawangisa akulu ampingo kukhala na maonero anji a ciimiriro cawo? (b) Kodi tonsene tisacita khundu m’mwai upi?

¹³ M’dziko, munthu waciimiriro capadzulu asaoniwa ninga wakufunika kupiringana anango, mbwenye ndida unaphatisirwa m’gulu ya Mulungu ndi uyu: “Thangwi uyu anakhala wang’onong’ono kakamwe, iye ndi wankulu.” (Luka 9:46-48; 22:24-26) Malemba asawangisa akulu ampingo kuti acite mpholemphole towera akhonde oneka ninga ambuya a ale akuti ndi unthaka wa Mulungu, mbwenye aoneke ninga pitsanzo pyadidi kwa nkumbi. (1 Pedro 5:2, 3) Mwai wa kuimirira Ntongi Wankulu wa kudzulu na pantsi, na kulonga mwakucepeseka m’dzina yace na kupanga anthu konsene kwene kuna iwo pya Umambo wace si wa anthu akucepa basi tayu, mbwenye ndi wa Mboni zonsene za Yahova, amuna na akazi.

14. M’kuphatisira malemba akusowa mafala m’ndima, dingani mabvunzo adandandaliswa pantsi pa ndima iyi.

¹⁴ Ife tisafunika kubvunzika: ‘Kodi ndisabvesesadi na kukomerwa na njira inatsogolera Yahova gulu yace yakuoneka? Kodi makhaliro anga, malongero anga na mabasa anga asapangiza pyenepi?’ Kunyerezera ntsonga zinatowerera pantsi apa kungakwanise kuphedza mbodzi na mbodzi wa ife kudingika.

Khala ndisangonjeradi Kristu ninga Nsolo wa mpingo, kodi ndisafunika kucitanji mwakubverana na malemba akutowerera? (Mateo 24:14; 28:19, 20, MZ; Jwau 13:34, 35)

Kodi ndisalemedza ani ndingatawira mwakukomerwa masasanyiro a m’malemba anabwera kubulukira mwa nsoka wa mbandazi na Mathubo ace Akutonga? (Luka 10:16)

Kodi onsene m’mpingo, makamaka akulu ampingo, asafunika kutsalakana tani anango? (Aroma 12:10)

15. (a) Kodi tisapangizanji kubulukira m’njira inaona ife gulu yakuoneka ya Yahova? (b) Kodi ndi miyai ipi iri na ife towera tipangize kuti Dyabo ndi nyauthambi na kukomeresa ntima wa Yahova?

¹⁵ Yahova asatitsogolera lero kubulukira ku gulu yace yakuoneka pantsi pa utongi wa Kristu. Njira inaona ife masasanyiro anewa isapangiza maonero athu a nseru wa utongi ukulu. (Ahebere 13:17) Sathani asakakamira kulonga kuti tisadzudzumika kakamwe na ife ene. Mbwenye tingatumikira m’njira zonsene zakufunika mbiticalira pinthu pyakutionekeresa, tisapangiza kuti Dyabo ndi nyauthambi. Tingafuna na kulemedza ale anatsogolera pakati pathu mbitikhonda ‘kucitira uchenjeri kuli anthu towera titambire maganyo,’ tisakomeresa Yahova. (Yuda 16; Ahebere 13:7) M’kukhala akukhulupirika ku gulu ya Yahova, tisapangiza kuti Yahova ndi Mulungu wathu na kuti taphatana m’kumulambira.—1 Akorinto 15:58.

Kubwerezera Pidapfunzwa

• Kodi ndi ipi gulu yakuoneka ya Yahova lero? Kodi ndi cipi cifuniro ca gulu ineyi?

• Kodi mbani adaikhwa ninga Nsolo wa mpingo, na ndi masasanyiro api akuoneka anaphatisira iye towera kutipasa citsogolero cakufuna?

• Kodi ndi maonero api adidi anafunika ife kukhala nawo kwa ale ali m’gulu ya Yahova?

[Mafoto pa tsamba 133]

Yahova asatitsogolera kubulukira ku gulu yace yakuoneka pantsi pa utongi wa Kristu