Kunenseka Konsene Kuli Duzi Na Kumala!

M’midzidzi inango m’umaso wanu, panango mwabvunzika: “Thangwi yanji pana kunenseka kuzinji?” M’piaka pikwi, banja ya anthu isanenseka kakamwe na nkhondo, ucerengi, pidengwa, usumankha, kusowa kulungama, kubva kupha na kufa. Piaka dzana pidapita pyakhala na kunenseka kukulu kupiringana kale. Kodi kunadzamala kunenseka kweneku?

Ntawiro wakuthontholesa ndi inde, na kuli duzi kakamwe! Mafala a Mulungu, Biblya, asalonga: “Anyakuipa anadzambazika [hanadzakhalapobve] . . . Mbwenye anyakupfulika anakhala na dziko, mbakomerwa na ntendere ukulu kakamwe.” Kodi m’nzidzi ungasi? “Anyakulungama anatambira dziko, mbakhala [mwenemo] kuenda na kuenda.”​—Masalmo 37:10, 29.

Mulungu angadzabulusa kuipa na kunenseka, dziko yapantsi inadzacinjwa mbikhala paradizu. Buluka penepo anthu anadzakhala maso kwenda na kwenda na ungumi waungwiro na kutsanzaya. Mafala a Mulungu asalongeratu: ‘Mulungu anadzapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa.’​—Apokalipse 21:4.

M’dziko ineyi ipswa, ngakhale akufa ene anadzabwereswa ku umaso towera adzakomerwe na nkhombo zenezi: “Kunadzaoneka kulamuka muli akufa kwa anthu adidi na kwa akuipambo.” (Machitiro 24:15) Na thangwi ineyi Yezu Kristu apanga nsumankha wakutcinyuka adakhala na cikhulupiro mwa iye: “Unadzakhala m’parayizo pabodzi na ine pano.”​—Luka 23:43.

Thangwi Yanji Kunenseka Kwatoma?

Nakuti Mulungu akhafuna kuti anthu akhale na tsogolo ineyi yakudzumatirisa, thangwi yanji alekerera kunenseka kutome? Thangwi yanji alekerera kunenseka m’nzidzi uzinji?

Mudacita Mulungu Adamu na Eva, Iye aacita na manungo na nzeru zaungwiro. Iye aaikha m’munda wa paradizu mbaapasa basa yakutsanzayisa kuti aicite. Biblya isalonga: “Mulungu, na kwona pyonsene pidachita iye, apiona kuti mphyadidi maningi.” (Genesi 1:31) Iwo mbadabvera Mulungu, mbadabala ana aungwiro, na dziko yonsene yapantsi mbidakhala paradizu, yakuti anthu mbadakhala maso kwenda na kwenda mwantendere na mwakutsanzaya.

Mulungu aikha mwa Adamu na Eva muoni wakudzumatirisa wa ufulu wa kusankhula ninga khundu ya kucitwa kwawo. Iwo nee mbadafunika kukhala ninga mitcini yakusowa nzeru tayu. Natenepa, iwo mbadaphatisira ufulu wawo wa kusankhula m’njira yadidi​—towera kubvera miyambo ya Mulungu—​iwo mbadakhala akutsanzaya kwenda na kwenda. Ninga Mulungu alonga: “Ine ndine Mbuya, Mulungu wako, ule anafuna kukupfundisa towera udidi wako, mbakuendesa pa njira inatongwa iwe kutoweza.” (Izaiya 48:17) Kuphatisira mwakuipa ufulu wa kusankhula mbukudabweresa nyatwa, thangwi anthu hadacitwa towera kupembera mwakusowa citsogolero ca Mulungu tayu. Biblya isalonga: “Nee munthu mbodzi asadziwa pya patsogolo pache nee kupitonga.”​—Yeremiya 10:23.

Mwakutsukwalisa, anyakubala athu akutoma apibva kuti iwo mbadapembera mwakusowa citsogolero ca Mulungu. Mbwenye mudakhonda iwo utongi wa Mulungu, iye hadaasiyabve kukhala aungwiro. Iwo atoma kufewa mbamalisira na kukalamba na kufa. Mwakubverana na miyambo ya kubala, ife tatambira unthaka wa kusowa ungwiro na kufa.​—Aroma 5:12.

Utongi Ukulu​—Cinthu Cikulu Cakuphonyana Kwa Manyerezero

Thangwi yanji Mulungu hadafudza Adamu na Eva mbacita anthu anango? Thangwi utongi ukulu wa Mulungu wakudzulu na pantsi, wakuti ndi kuthema kwace kwa kutonga, wapokanywa. Mbvunzo ukhali uyu: Kodi mbani adathema kutonga, na mbani ali na utongi wadidi? Mwakuthimizira: Kodi anthu mbadapembera mwakusowa citsogolero ca Mulungu? M’kuapasa nzidzi wakukwana towera kuyesera ufulu wakusowa madire, Mulungu mbadapangiziratu pakweca khala iwo mbadakwanisa kupembera pantsi pa utongi wace peno pa utongi wawo ene. Anthu apaswa nzidzi wakukwana towera ayesere mitundu yonsene ya makhaliro a ndale, cibverano, upfumi na uphemberi mwakusowa citsogolero ca Mulungu.

Kodi pyenepi pyabweresanji? Piaka pikwi pya mbiri ya anthu pisatipangiza kuti kunenseka kwathimizirika kakamwe. M’piaka dzana idamala, banja ya anthu yatamba nyatwa ikulu kupiringana nzidzi unango. Pikwi pya pikwi pya anthu pyaphiwa nkati mwa Nkhondo Yaciwiri ya Dziko Yonsene Yapantsi. Anthu akupiringana 100.000.000 aphiwa m’nkhondo zinango. Usumankha na uphanga pyamwazika. Kuphatisira mitombwe yakuledzeresa kwadzala m’dziko yonsene. Matenda akupasirana m’mabonde ali kuenda ntsogolo na kumwazika. Makhumi a pikwi a anthu asafa pa caka na njala na utenda. Umaso wa banja na makhaliro adidi afudzika konsene kwene. Utongi wa anthu nkhabe matawiro a nyatwa zenezi. Nkhabepo utongi udakwanisa kumalisa kukalamba, utenda na kufa.

Makhaliro a anthu asacitikadi ninga mudalongeratu Biblya thangwi ya midzidzi yathu. Mafala a Mulungu asapangiza nzidzi wathu ninga “ntsiku zakumalisa” za makhaliro ano apinthu ‘munaoneka midzidzi yakugopswa.’ Ninga mudalonga Biblya, ‘anthu akuipa na akunyengeza andzawo, athimizira kuipa kwawo.’​—2 Timoti 3:1-5, 13.

Kunenseka Kuli Duzi Na Kumala

Pinthu pyonsene pisapangiza kuti tiri duzi na kumala kwa kucimwana kwa anthu kutonga mwakusowa citsogolero ca Mulungu. Pyenepi pisapangiza pakweca kuti utongi wa anthu wakulekana na Mulungu cipo unakwanisa kupembera. Utongi wa Mulungu ndiwo basi wakuti ungakwanise kubweresa ntendere, kutsanzaya, ungumi waungwiro na umaso okhonda mala. Natenepa kutawirisa kwa Yahova uipi na kunenseka kuli duzi na kumala. Mokhonda dembuka Mulungu anapipitisa m’pinthu pya anthu m’kufudza makhaliro ano onsene akutsukwalisa apinthu.

Profesiya ya Biblya yalonga: “Pa utongi wenewu [mautongi a anthu anaoneka cincino] wakumalisa, Mulungu anadzalamusa utongi unango [kudzulu] wakukhonda kufudzika . . . Utongi uyu, unadzakunda [mbupasa] manyadzo utongi unango [mautongi acincino], iwo mbukhala pyawo mwa kuwanga mwene.” (Danyele 2:44) Kulemedzwa kwa utongi ukulu wa Yahova, kuthema kwace kutonga, kubulukira kwa Umambo wace wakudzulu ndi cipfunziso cikulu ca Biblya. M’kulongeratu khundu yakufunika kakamwe ya cidzindikiro ca “ntsiku zakumalisa,” Yezu alonga: “Mphangwa zadidi za dziko [Umambo] ya kudzulu zinadzapangwa pantsi ponsene, towera mukhale amboni anga pakati pa anthu a mitundu yonsene. Pingamala ipi, inadzabwera nthawi ya kumalisirathu pyonsene.”​—Mateo 24:14.

Kumala kungafika, kodi mbani anafuna kudzapulumuka? Biblya isatawira: “Mbwenye anyakuipa anatayika pyawo . . . Anyakulungama anatambira dziko, mbakhala [mwenemo] kuenda na kuenda.” (Masalmo 37:20, 29) Anyakulungama ndi ale anapfunza cifuno ca Yahova na kucicita. Yezu Kristu alonga: “Moyo wakukhalirathu ndi uyu: anthu akudziweni kuti ndimwe mwekha Mulungu wa maso, adziwembo Yezu Kristu [adatuma] imwe.” (Jwau 17:3) Inde, “pantsi pano . . .  [panamala]. Mbwenye anachita pinafuna Mulungu, hanamala tayu.”​—1 Jwau 2:17, Mphangwa Zadidi.

Kusiyapo ngakhala pana cidzindikiro cinango, malemba a Biblya mbakubulukira m’BIBLYA CHISENA.