Anthu Asere Apulumuka

Nowa na banja yace pabodzi na pinyama apita mu arka. Buluka penepo, Yahova afunga nsuwo, madzi mbatoma kubvumba. Madzi abvumba kakamwe arka mbitoma kuberuka. Natenepa, dziko yonsene yadzala na madzi. Anthu onsene akhacita pinthu pyakuipa amala kufa thangwi iwo akhali kunja kwa arka. Mbwenye Nowa na banja yace akhali akutsidzikizika mu arka, pontho iwo atsandzaya kakamwe thangwi yakubvera Yahova.

Madzi abvumba mu ntsiku 40, masiku na masikati. Buluka penepo alimira kubvumba, mbatoma kupwa pang’ono-pang’ono. Pakumalisa, arka yatsama paphiri. Mbwenye madzi akhadzati kumala kupwa, natenepa Nowa na banja yace apitiriza kukhala mu arka.

Mbwenye mwapang’ono-pang’ono madzi apwa onsene. Nowa na banja yace amala caka na miyezi mingasi mu arka. Natenepa, Yahova aapanga toera abuluke mu arka. Iwo apereka takhuta kuna Yahova mbapereka ntsembe kuna Iye thangwi yakuapulumusa.

Yahova atsandzaya na ntsembe ineyi. Iye apikira kuti cipo anaphatisira pontho madzi makulu toera kufudza pinthu piri na umaso pa dziko yapantsi. Yahova acitisa kuti utawaleza wakutoma uoneke kudzulu ninga cidzindikiro ca pikiro ineyi. Waona kale utawaleza?

Buluka penepo, Yahova apanga Nowa na banja yace toera abale ana mbadzadza dziko yapantsi.