Uta Waleza Wakutoma

KODI musadziwa cinthu cakutoma cidacita Nowa mudabuluka iye na banja yace m’cimwadiya? Apereka ntsembe peno muoni kwa Mulungu. Mungakwanise kumuona mbacita pyenepi pa cithunzithunzi pantsiapa. Nowa apereka muoni unoyu wa pinyama towera kupasa takhuta Mulungu na thangwi ya kupulumusa banjace pa cigumula cikulu.

Kodi musanyerezera kuti Yahova akomerwa na muoni unoyu? Inde, akomerwa. Natenepa iye apikira Nowa kuti cipo anadzafudza pontho dziko m’kuphatisira cigumula.

Mwakukhonda dembuka mataka onsene akhadauma, na Nowa na banjace atoma umaso upswa kunja kwa cimwadiya. Mulungu aapasa nkhombo na aapanga: ‘Musafunika kukhala na ana azinji. Musafunika kubvirira m’cilengesero mpaka anthu akhale pa dziko yonsene yapantsi.’

Mbwenye m’kupita kwa nzidzi, anthu akadzabva pya cigumula cikulu, panango mbadadzagopa kuti cigumula ninga ceneci mbicidadzacitika pontho. Natenepa Mulungu apasa cinthu cakuti mbicidakumbusa anthu pikiro yace ya cipo kudzabweresa pontho cigumula pa dziko yonsene yapantsi. Kodi musadziwa kuti apasanji towera kuwakumbusa? Ukhali uta waleza.

Kazinji kene uta waleza usaoneka kuthambo munagaka dzuwa pakumala kubvumba. Mauta aleza angakwanise kukhala na makore mazinji akubalika. Kodi mwauona kale? Kodi musauona pa cithunzithunzi pano?

Ipi ndipyo pidalonga Mulungu: ‘Ndikupikira kuti cipo anthu onsene na pinyama anadzafudzwa pontho m’kuphatisira cigumula. Ndikuikha uta wanga waleza m’mitambo. Ukaonekera uta waleza, ndinadzauona mbindikumbukira pikiro yanga.’

Natenepa mukaona uta waleza, kodi usafunika kukukumbusaninji? Inde, pikiro ya Mulungu yakuti cipo anadzafudza pontho dziko m’kuphatisira cigumula cikulu.