Jidhiyoni Akunda Amidhiyani

Mukupita kwa ndzidzi, Aizraeli asiya kulambira Yahova mbatoma kulambira alungu authambi. Na thangwi ineyi, Yahova atawirisa kuti mu pyaka pinomwe Amidhiyani abe pinyama pya Aizraeli mbafudza maminda awo. Toera Aizraeli akhonde kuthabuswa na Amidhiyani, iwo akhabisala m’mphako na m’mapiri. Natenepa Aizraeli aphemba ciphedzo kuna Yahova. Buluka penepo, Yahova atuma anju toera kuenda kalonga na m’phale akhacemerwa Jidhiyoni. Anju alonga: ‘Yahova akusankhula kuti ukhale nyankhondo wamphambvu toera upulumuse Aizraeli.’ Jidhiyoni abvundza: ‘Ndinakwanisa tani kupulumusa Aizraeli? Ine ndine wakupwazika kakamwe?’

Jidhiyoni mbadakhala tani na cinyindiro cakuti akhadasankhulwa na Yahova? Toera kukhala na cinyindiro ceneci, iye aikha uweya pantsi mbapanga Yahova: ‘Mangwana namacibese, uweya uyu ungatota na bume, n’khundu mwace mbamukhonda kutota, penepo ndinadziwa kuti munaphatisira ine toera kupulumusa Aizraeli.’ Pidaca kunja, iye agumana kuti uweya ukhadatota kakamwe, mbwenye mataka akhali akuuma! Buluka penepo, Jidhiyoni aphemba pontho kuti mangwana mwace namacibese, pantsi ponsene patote na bume, mbwenye uweya ukhonde kutota. Ndi pyenepi pidacitika. Natenepa Jidhiyoni adzakhala na cinyindiro cakuti akhadasankhulwa na Yahova. Jidhiyoni na anyankhondo ace alamuka mbaenda kamenyana na Amidhiyani.

Yahova apanga Jidhiyoni: ‘Ndinaphedza Aizraeli toera akunde Amidhiyani. Nakuti uli na anyankhondo azinji kakamwe, leka kunyerezera kuti munaakunda na mphambvu zanu. Natenepa panga onsene kuti ule anagopa asafunika kubwerera kunyumba.’ Jidhiyoni pidacita iye pyenepi, anyankhondo 22.000 abwerera kunyumba, mbasala na anyankhondo 10.000. Buluka penepo Yahova ampanga: ‘Anyankhondo adasala na iwe ndi azinji kakamwe. Ndoko nawo ku nkulo, mbuapanga toera amwe madzi. Basi ene sankhula ale anamwa madzi uku mbakayang’anira anyamalwa awo.’ Amuna akukwana 300 ndiwo basi adakwanisa kucita pyenepi. Yahova apikira kuti amuna anewa akucepa mbadakwanisa kukunda anyankhondo Amidhiyani akukwana 135.000.

Ntsiku ineyi namasiku, Yahova apanga Jidhiyoni: ‘Uno ndi ndzidzi toera kumenyana na Amidhiyani!’ Jidhiyoni apasa anyankhondo ace nyanga na pitomba pikulu pyakuti nkati mwace mukhali na nkhuni zakugaka moto. Buluka penepo, iye aapanga: “Onani pinacita ine toera mucitembo pibodzi pyene.” Jidhiyoni aliza nyanga yace, aswa citomba, alamusa nyale mbakhuwa: “Supada ya Yahova na ya Jidhiyoni!” Anyankhondo ace 300 acitambo pibodzi pyene. Pidabva Amidhiyani pyenepi, iwo agopa kakamwe mbathawa. Nakuti akhali akudzudzumika, iwo atoma kuphana okha-okha. Yahova aphedza pontho Aizraeli kukunda anyamalwa awo.