Yahova Ndi Xamwali Wathu Wapantima

‘[Abrahamu] athulwa xamwali wa Yahova.’​—TGO. 2:23.

MBAMUDATAWIRA TANI?

Ninji cinacitisa Yahova kukhala Xamwali wanu?

Mwakubverana na Masalmo 15:3, 5, Yahova asaphembanji kwa ife toera kukhala axamwali ace?

Ninji cinafuna kudzatiphedza toera kufungula mitima yathu kuna Xamwali wathu wapantima?

1. Nakuti tacitwa mwakulandana na Mulungu, tiri na maluso api?

“UNGAONA mwana ninga waona baba,” anewa ndi mafala analongwa mwakubwereza-bwereza. Indedi, ana azinji asalandana kakamwe na anyakubalawo. Mwandimomwene, baba na mama asaphedzera makhaliro anabalwa na mwana wawo. Yahova, Babathu wakudzulu, ndi Nciti wa umaso. (Sal. 36:9) Pontho, ninga ana a Mulungu, ife anthu talandana naye mu njira zizinji. Nakuti tacitwa mwakulandana na iye, tiri na luso yakunyerezera na kudzindikira, pontho kucita na kukoya uxamwali wathu na iye.​—Gen. 1:26.

2. Ninji cinacitisa Yahova kukhala Xamwali wathu?

² Yahova anakwanisa kukhala Xamwali wathu wapantima. Uxamwali unoyu usabulukira mu ufuni wa Mulungu kwa ife na cikhulupiro cathu kwa iye na kwa Mwanace. Yezu alonga: ‘Mulungu afuna pikulu pyene dziko yapantsi, mbapereka Mwanace m’bodzi ekha toera munthu onsene anankhulupira, akhonde kufudzwa, mbwenye aone umaso wakukhaliratu.’ (Jwau 3:16, NM) Pana pitsandzo pya anthu azinji adakhala na uxamwali wapantima na Yahova. Tendeni tidinge awiri mwa iwo.

“ABRAHAMU, XAMWALI WANGA”

3, 4. Mu kulonga pya uxamwali na Yahova, siyanisani Abrahamu na dzindza yace.

³ Yahova acemera baba, na kholo ya Aisraele ninga “Abrahamu, xamwali wanga.” (Iza. 41:8) Lemba ya Pya dziko ya Israele waciwiri 20:7 isalongambo Abrahamu ninga xamwali wa Mulungu. Ninji cidacitisa mamuna unoyu wakukhulupirika kukhala na uxamwali wakukhonda mala na Nciti wace? Cikhali cikhulupiro cace.​—Gen. 15:6; lerini Tyago 2:21-23.

⁴ Dzindza ya Abrahamu yakuti yadzakhala mbumba ya Israele wakale, pakutoma ikhali na Yahova ninga Babawo na Xamwali wawo. Mbwenye mwakutsukwalisa, iwo aluza uxamwali wawo na Mulungu. Thangwi yanji? Thangwi iwo akhadasiya kukhulupira mapikiro a Yahova.

5, 6. (a) Kodi Yahova adzakhala tani Xamwali wanu? (b) Ndi mibvundzo ipi isafunika ife kudinga mwacidikhodikho?

⁵ Munapfundza imwe pizinji thangwi ya Yahova, cikhulupiro canu kwa iye cisakhala cakuwanga, pontho ufuni wanu kwa iye usathimizirika. Nyerezerani pa ndzidzi udadzindikira imwe kuti Mulungu ndi Munthu wandimomwene, wakuti mbamudakwanisa kucita naye uxamwali wapaduzi. Mwapfundzambo kuti tonsene tabalwa m’madawo thangwi yakukhonda bvera kwa Adhamu. Mwafika pakudzindikira kuti anthu onsene ali akuthaukirana na Mulungu. (Akol. 1:21) Buluka penepo, mwadzindikira kuti Babathu wakudzulu wakuti ndi waufuni, nee si munthu wakuti nkhabe kutitsalakana. Mudapfundza ife pya masasanyiro ace a ntsembe ya ciomboli ca Yezu na kukhulupira masasanyiro anewa, tatoma kukhala na uxamwali na Mulungu.

⁶ Tingayang’ana nduli lero, mphyadidi kubvundzika tekhene: ‘Kodi ndikuthambaruka mu uxamwali wanga na Mulungu? Kodi ufuni wanga na cinyindiro canga kuna Xamwali wanga wapantima, Yahova, cikuthimizirika ntsiku zonsene?’ Munthu unango wakale adakhala na uxamwali wapaduzi na Yahova ndi Gedheoni. Cincino, tendeni tidinge pya citsandzo cace cadidi mbatipfundza pya iye.

“YAHOVA NDI NTENDERE”

7-9. (a) Ndi cakugumana naco cipi cakupambulika cidaona Gedheoni? (Onani cithundzithundzi cakutoma.) (b) Tinakwanisa tani kukhala na uxamwali na Yahova?

⁷ Ntongi Gedheoni atumikira Yahova mu ndzidzi wakunentsa m’mbiri ya Israele, mudamala iwo kupita mu Dziko Yakupikirwa. Kapitulu 6 ya Atongi isalonga kuti anju wa Yahova aonekera kuna Gedheoni ku Ofra. Pa ndzidzi unoyu, anyakuendekana awo, a Amidiyani akhali anyamalwa a Israele. Na thangwi ineyi, Gedheoni akhapepeta trigu, tayu pathambwe, mbwenye n’nyumba mukhakamulirwa vinyu, mwakuti mbadakwanisa kubisa mwakucimbiza mbeu ineyi yakufunika kakamwe. Mwakudzumatirwa na kufika kwa anju na kucemerwa “nyankhondo wa mphambvu,” Gedheoni abvundzisa khala Yahova, ule adaombola Aisraele mu Ejito, mbadaaphedzadi cincino. Mu kulonga mu dzina ya Nciti, anju apereka cinyindiro kuna Gedheoni kuti mwandimomwene Yahova mbadamphedza.

⁸ Gedheoni akhafuna kudziwa kuti mbadakwanisa tani ‘kuombola Israele m’manja mwa Madyani.’ Ntawiro udatambira iye ngwakubveka. Yahova alonga: “Ine ndinadzakhala na iwe, iwe unadzakunda Amidiyani ninga ndi munthu m’bodzi ekha.” (Aton. 6:11-16) Mwakukhonda dziwa kuti mbapidakwanisaka tani, Gedheoni aphemba cidzindikiro. Onani kuti pa makani anewa, mwakukhonda penula Gedheoni akhaona Yahova ninga Munthu wandimomwene.

⁹ Pidacitika patsogolo pace pyawangisa kakamwe cikhulupiro ca Gedheoni na pyanfendedzeresa cifupi na Mulungu. Gedheoni akhunganya cakudya mbacipereka kuna anju. Mwacirengo, mudakhuyiwa cakudya na ndodo ya anju mbacigaka, Gedheoni adzindikira kuti anju unoyu akhadatumwa na Yahova. Mwakugopa, Gedheoni akhuwa: ‘Mama ine, Mbuya [Yahova] Mulungu! Ine ndaonana nkhope na nkhope na anju wa Yahova.’ (Aton. 6:17-22) Kodi kuonana kweneku kwaikha mpingizo pakati pa Gedheoni na Mulungu wace? Mwandimomwene nkhabe! Mbuto mwace, Gedheoni adzafika pakudziwa Yahova mu njira yakuti yancitisa kubva kuti akhali mwantendere na Mulungu. Tisadziwa pyenepi kubulukira mu dzina ya guwa idamanga Gedheoni pa mbuto ineyi​—“Mulungu, peno Yahova wa Kalomi.” Dzina ineyi isabveka: “Yahova Ndi Ntendere.” (Lerini Atongi 6:23, 24) Tinganyerezera mwacidikhodikho pinaticitira Yahova ntsiku zonsene, tisafika pakudzindikira kuti iye ndi Xamwali wandimomwene. Kucita phembero kuna Mulungu ndzidzi onsene kusakulisa mabvero athu akuti tiri mu ntendere, pontho kusawangisa uxamwali wathu na iye.

MBANI ANAFUNA KUDZAKHALA ‘MULENDO PANYUMBA YA YAHOVA’?

10. Mwakubverana na Masalmo 15:3, 5, Yahova asaphembanji kwa ife toera kukhala axamwali ace?

¹⁰ Mbwenye toera Yahova akhale Xamwali wathu, tisafunika kukwanirisa pinaphemba iye. Ninga mudalemberwa ipyo pa Masalmo 15, Dhavidhi aimba mbalonga pinthu pinafunika ife kucita toera kukhala ‘alendo panyumba ya Yahova,’ pyenepi pisabveka kukhala xamwali wa Mulungu. (Sal. 15:1) Tendeni tidinge makhaliro mawiri mwa ale anaphembwa—kucalira kupambizira na kukhala wakuona ntima m’macitiro anthu onsene. Thangwi ya makhaliro anewa, Dhavidhi alonga kuti mulendo wa panyumba ya Yahova, ‘asakhonda kupambizira andzace. . . . Iye nkhabe tawira kudyekerwa toera kuipisa anasowa mulando.’​—Sal. 15:3, 5.

11. Thangwi yanji tisafunika kucalira kupambizira anango?

¹¹ Mu Salmo inango, Dhavidhi acenjeza: “Koyani lirimi yanu na mulomo wanu, mbamukhonda kulonga pyakuipa.” (Sal. 34:13) Kukhonda bvera uphungu unoyu wakupumirwa, kunaticitisa kukhala akuthaukirana na Babathu wakulungama wakudzulu. Mwandimomwene, kupambizira ndi n’khaliro wa Sathani, nyamalwa wankulu wa Yahova. Fala yakuti “Dyabo” ndi Yacigrego yakuti isabveka “nyakupambizira.” Kucalira kulonga thangwi ya anango kusatiphedza toera kukhala cifupi na Yahova. Makamaka, pyenepi mphyakufunika kakamwe ku maonero athu thangwi ya abale anakhazikiswa toera kutsogolera m’mpingo.​—Lerini Ahebere 13:17; Yuda 8.

12, 13. (a) Thangwi yanji tisafunika kukhala akuona ntima mu pinthu pyonsene? (b) Kukhala kwathu akuona ntima kusakhuya tani anango?

¹² Mu njira ibodzi ene, atumiki a Yahova asadziwika na n’khaliro wakuona ntima, tayu wakuponderera. Mpostolo Paulu alemba: “Pitirizani kutiphemberera, thangwi tisanyindira kuti tinakhala na cikumbuntima cadidi, nakuti tisafuna kucita pinthu pyonsene mwakuona ntima.” (Aheb. 13:18, NM) Nakuti tisafuna “kucita pinthu pyonsene mwakuona ntima,” tisacalira kuponderera abale athu Acikristu. Mwacitsandzo, khala iwo asatiphatira basa, tisacita pyonsene toera kuatsalakana mwadidi, mbatialipa ninga mudabverana ife. Ninga Akristu, tisatsalakana anyabasa athu, na anthu anango onsene mwakuona ntima. Pontho, khala tisaphata basa kwa Nkristu ndzathu, tisacita mpholemphole toera kukhonda kumponderera, mu kuphemba citsalakano cakupambulika.

¹³ Kazinji kene, tisabva mafala akusimba analongwa na anthu akudziko adaphata basa na Mboni za Yahova! Mwacitsandzo, nyakuyang’anira wa nsoka wa basa yakumanga nyumba aona kuti Mboni za Yahova zisacita pinalonga iwo. Iye alonga: “Ndzidzi onsene imwe musatoweza pinabverana imwe kucita.” (Sal. 15:4) Makhaliro anewa asatiphedza toera kupitiriza kukhala na uxamwali na Yahova. Kusiyapo pyenepi, asapasa mbiri Babathu waufuni wakudzulu.

PHEDZANI ANANGO TOERA KUKHALA AXAMWALI A YAHOVA

14, 15. Mu utumiki wathu, tinakwanisa tani kuphedza anango toera kukhala axamwali a Yahova?

¹⁴ Maseze anthu asatawira kuti Mulungu alipo, azinji anacedza na ife mu utumiki nee asamuona ninga Xamwali wawo wapantima. Tinaaphedza tani? Onani pitsogolero pidapereka Yezu kwa anyakupfundza ace anango mudaatuma iye awiri awiri toera kumwaza mphangwa: Mungafika ‘panyumba ibodzi tomani kulonga: ‘ntendere ukhale panyumba ino’. Angakhala penepo munthu wa ntendere, ntendere wanu unadzakhala na iye, pezi unadzabwerera kuna imwe.’ (Luka 10:5, 6) Tinakwanisa kutundusa anthu toera kutawira undimomwene mu kulonga nawo mwauxamwali. Kwa anyakutcinga, pyenepi pinaaphedza kusiya kuida na kusasanyira njira toera kutitambira mwadidi pa ndzidzi unango.

¹⁵ Tingagumana anthu akuti ali na maonero akuwanga a mauphemberi authambi peno anatowezera misambo yakukhonda bverana na Bhibhlya, tisapitiriza kupangiza makhaliro auxamwali na antendere. Pa misonkhano yathu, tisatambira mwadidi ale anakhonda kukomerwa na makhaliro a dziko lero, mbapangiza cifuno cakupfundza pizinji thangwi ya Mulungu analambira ife. Misolo yakuti “A Bíblia Muda a Vida das Pessoas” [Bhibhlya Isacinja Umaso Wa Anthu] isatipangiza pitsandzo pizinji.

KUPHATA BASA PABODZI NA XAMWALI WATHU WAPANTIMA

16. Ndi mu njira ipi tinakwanisa kukhala axamwali na “anyakuphedza” a Yahova?

¹⁶ Anthu anaphata basa pabodzi pene, kazinji kene asakhala axamwali apaduzi. Onsene adaperekeka kwa Yahova ali na mwai wakukhala axamwali na “anyakuphedza” ace. (Lerini 1 Akorinto 3:9.) Ndimodi, munacita ife khundu m’basa yakumwaza mphangwa na kucita anyakupfundza, tisakhala na cidziwiso cikulu ca makhaliro akudzumisa a Babathu wakudzulu. Tisaona kuti nzimu wace wakucena usatiphedza tani kukhala akuthema toera kucita basa yathu yakumwaza mphangwa zadidi.

17. Kodi cakudya cauzimu cinaperekwa pa misonkhano yathu ya cisa, yakupambulika, na ya gawo cisapangiza tani kuti Yahova ndi Xamwali wathu?

¹⁷ Tingacita khundu mwakukwana m’basa yakucita anyakupfundza, tisabva kuti tiri cifupi na Yahova. Mwacitsandzo, tisaona kuti Yahova asatitsidzikiza tani kwa ale anatipingiza. Nyerezerani basi mu pyaka pingasi pidapita. Nee tisaona pakweca kuti Mulungu asatitsogolera? Tisakomerwa na cakudya cadidi cauzimu cinaperekwa mwakukhonda limira. Misonkhano yathu ya gawo, ya cisa, na yakupambulika isapangiza kuti Babathu waufuni asadziwa nyatwa zathu na pifuno pyathu. Mu tsamba yakupereka takhuta thangwi ya nsonkhano wa gawo, banja inango yalemba: “Mwandimomwene, programu yakhuya mitima yathu. Taona kuti Yahova asafuna m’bodzi na m’bodzi wa ife, pontho asafuna kuti tiphindule kakamwe.” Pakumala kugumanika pa nsonkhano wa gawo wakupambulika ku Irlanda, banja idabuluka ku Alemanya yapereka takhuta thangwi yakutambirwa mwadidi mwacitsalakano, mbathimiza kulonga: “Mbwenye tisapereka takhuta wankulu kuna Yahova na Mambo wace, Yezu Kristu. Iwo aticemera toera kucita khundu ya mbumba iyi yakuphatana kakamwe. Nee tikulonga basi ene pya kuphatana, mbwenye tisakhala akuphatana ntsiku zonsene. Pyakugumana napyo pidaona ife pa nsonkhano wa gawo wakupambulika ku Dublin, ndzidzi onsene pinadzatikumbusa mwai ukulu uli na ife wakutumikira Mulungu wathu wankulu pabodzi na imwe monsene.”

AXAMWALI ASACEDZA

18. Tisafunika kubvundzikanji thangwi yakucedza kwathu na Yahova?

¹⁸ Anthu asakhala na uxamwali wakuwanga angacedza mwadidi. Uxamwali wa mu Interneti na kutumizirana mphangwa ndi kwakudziwika kakamwe mu ndzidzi uno wakuthambaruka kwa tekinolojiya yakupita nayo n’cibverano. Ndiye tanimbo mphapo kwa m’bodzi na m’bodzi wa ife, ndi midzidzi mingasi inaphatisira ife toera kucedza na Xamwali wathu wapantima, Yahova? Mwandimomwene, iye ndi ‘Nyakubvesera maphembero.’ (Sal. 65:2) Kodi tisakhalambo akutoma kusaka miyai yakulonga na iye kazinji kene?

19. Ndi ciphedzo cipi ciri na ife khala tisaona kuti ndi kwakunentsa kufungula mitima yathu kuna Babathu wakudzulu?

¹⁹ Kwa atumiki anango a Mulungu ndi kwakunentsa kufungula mitima yawo toera kupangiza mabvero awo ankati. Mbwenye Yahova asafuna ticite pyenepi tingacita phembero. (Sal. 119:145; Nyimbo ya chiriro. 3:41) Maseze tione kuti mphyakunentsa kulonga mafala anewa a muntima mwathu, ife tiri na ciphedzo. Paulu alemba kwa Akristu a ku Roma: ‘Nzimu wa Mulungu unatiphedzambo ife anthu akufewa thangwi ife hatinadziwa tayu pinafunika ife kuphemba Mulungu. Ndi nzimu uyu unatiphemberera na kulira kwawo kunakhonda kuoneka, unayang’anira mitima ya anthu, unadziwambo pyonsene pinafunika kwa nzimu, thangwi ya ipyo unabvunulira anthu akucena ninga munafunira Mulungu.’ (Arom. 8:26, 27) Kunyerezera mwacidikhodikho mafala ninga anagumanika m’mabukhu a Yobe, Masalmo, na Misangani, kunadzatiphedza kulonga mabvero athu ankati kuna Yahova.

20, 21. Kodi mafala a Paulu pa Afilipi 4:6, 7 asatipasa ciwangiso canji?

²⁰ Tingathimbana na makhaliro akunentsa, tibvereni uphungu wakupumirwa wa Paulu kwa Afilipi: ‘Lekani kutsamali nee na cinthu cibodzi, mbwenye pakucita maphembero, pa kudembetera, pakucita takhuta mudziwise Mulungu pinthu pyanu pyonsene.’ Mwandimomwene, kucedza mwadidi kweneku na Xamwali wathu wapantima kunadzatipasa ciwangiso na cibalangazo, thangwi Paulu athimiza: ‘Ntendere wa Mulungu wakupiringana ndzeru zonsene unadzakoya mitima yanu na ndzeru zanu mwa Kristu Yezu.’ (Afil. 4:6, 7) Ndzidzi onsene, tendeni tipase ntengo “ntendere wa Mulungu,” wakuti nkhabe landanisika, wakuti mwandimomwene usatsidzikiza mitima yathu na mphambvu za manyerezero athu.

²¹ Phembero isatiphedza toera kukulisa uxamwali na Yahova. Natenepa, tendeni ‘tiphembere nee kupuma.’ (1 Ates. 5:17) Tisadikhira kuti pfundziro ino inadzawangisa uxamwali wathu wakufunika kakamwe na Mulungu na kutonga kwathu kubvera midida yace yakulungama. Pontho tendeni tinyerezere mwacidikhodikho nkhombo ziri na ife thangwi yakuti mwandimomwene, Yahova ndi Babathu, Mulungu wathu, na Xamwali wathu.