Dhavidhi na Goliyati

Yahova apanga Samweli: ‘Ndoko kunyumba kwa Yese. M’bodzi mwa ana ace anadzakhala mambo wa Izraeli.’ Natenepa Samweli aenda kunyumba kwa Yese. Pidaona iye mwana wakutoma wa Yese, iye anyerezera: ‘M’phale uyu ndiye anafuna kukhala mambo.’ Mbwenye Yahova apanga Samweli: ‘Ine ndisaona muntima mwa munthu, tayu basi maonekero ace akunja.’

Yese aendesa kuna Samweli anace anango atanthatu. Mbwenye Samweli alonga: ‘Nee m’bodzi wa iwo asankhulwa na Yahova. Uli na ana anango?’ Yese atawira: ‘Ndiri naye m’bodzi, mwananga wakumalisira, Dhavidhi. Iye akudyesa mabira anga.’ Pidafika Dhavidhi, Yahova apanga Samweli: ‘Unoyu ndiye adasankhula ine!’ Samweli akwata mafuta mbathirira munsolo mwa Dhavidhi, toera kupangiza kuti ndiye anafuna kukhala mambo wa Izraeli.

Mukupita kwa ndzidzi, Afilisti aenda kamenyana na Aizraeli. Iwo akhali na nyankhondo akhacemerwa Goliyati wakuti akhali wakulapha kakamwe. Ntsiku zonsene, Goliyati akhasingirira Aizraeli. Iye akhalonga: ‘Tumani mamuna m’bodzi abwere dzamenyana na ine. Angawina, ife tinadzakhala mabitcu anu. Mbwenye angawina ndine, imwe munadzakhala mabitcu athu.’

Dhavidhi aenda kuna anyankhondo a Izraeli kapasa abale ace cakudya, akuti akhalimbo anyankhondo. Iye abva pikhalonga Goliyati, mbalonga: ‘Ndinamenyana naye!’ Mambo Sauli alonga: ‘Mbwenye iwe ndiwe mwana.’ Dhavidhi atawira: ‘Yahova anandiphedza.’

Sauli ayesera kubvazika Dhavidhi pida pyace pya nkhondo, mbwenye Dhavidhi alonga: ‘Nee ndinakwanisa kufamba napyo.’ Dhavidhi akwata funda yace mbaenda ku nkulo. Iye asankhula miyala mixanu yakuzwerera mbaiikha m’budu mwace. Buluka penepo, Dhavidhi athamanga kuenda kuna Goliyati. Goliyati akhuwa: ‘Bwera kuno. Ndinadzapereka manungo ako ninga cakudya kuna mbalame zakudzulu na pinyama pya ntsanga.’ Dhavidhi nee akhagopa. Iye atawira: ‘Iwe ukubwera na supada na dipa, mbwenye ine ndikubwera na dzina ya Yahova. Iwe nee ukumenyana na ife; mbwenye ukumenyana na Mulungu. Anthu onsene anadzadziwa kuti Yahova ndi wamphambvu kupiringana supada peno dipa. Iye anatiphedza toera kukukunda.’

Dhavidhi aikha mwala mu funda yace mbauponya na mphambvu yonsene. Na ciphedzo ca Yahova, mwala wamenya pa nkhope ya Goliyati mbupita nkati. Iye agwa pantsi mbafa. Buluka penepo, Afilisti athawa. Musanyindirambo Yahova ninga pidacita Dhavidhi?