Yonatani Akhali Wacipapo na Wakukhulupirika

Mwana wakutoma wa Mambo Sauli, Yonatani, akhali nyankhondo wacipapo. Dhavidhi alonga kuti iye akhathamanga kupiringana mbalame inacemerwa capungu, pontho akhali wamphambvu kupiringana nkhalamu. Ntsiku inango, Yonatani aona anyankhondo Afilisti akukwana 20 paphiri. Iye apanga nyakuthukula pida pyace pya nkhondo: ‘Tinaenda kamenyana nawo basi ene Yahova angatipasa cidzindikiro. Afilisti angatipanga toera tiende kuna iwo, tinadziwa kuti ndi ndzidzi wakumenyana nawo.’ Afilisti akhuwa: ‘Bwerani mumenyane na ife!’ Uwiri wawo akwira paphiri mbakunda Afilisti.

Nakuti Yonatani akhali mwana wakutoma wa Sauli, iye mbadakhala mambo pa mbuto ya pai wace. Mbwenye Yonatani akhadziwa kuti Yahova asankhula Dhavidhi, ngakhale tenepo iye nee ancitira bibvu. Yonatani adzakhala xamwali wa Dhavidhi. Iwo apikirana kuti mbadatsidzikizana unango na ndzace. Yonatani apasa Dhavidhi tunika yace, supada, uta na sintu ninga cidzindikiro ca uxamwali wawo.

Mu ndzidzi wakuti Dhavidhi akhathawa Sauli, Yonatani aenda kalonga na Dhavidhi: ‘Khala wamphambvu na wacipapo. Yahova akusankhula toera kukhala mambo. Ngakhale babanga asadziwa pyenepi.’ Musafuna kukhala na xamwali ninga Yonatani?

Kusiyapo pyenepi, Yonatani aikha umaso wace pangozwi toera kuphedza xamwali wace. Iye akhadziwa kuti Mambo Sauli akhafuna kupha Dhavidhi, natenepa apanga pai wace: ‘Imwe mungapha Dhavidhi munadawa, thangwi iye nee acita cinthu cakuipa.’ Sauli aipirwa kakamwe na Yonatani. Pidapita pyaka pingasi, Sauli na Yonatani afa pabodzi ku nkhondo.

Pidafa Yonatani, Dhavidhi asaka mwana wa Yonatani, Mefibhoseti. Pidan’gumana iye, Dhavidhi ampanga: ‘Nakuti babako akhali xamwali wanga wapantima, ndinakutsalakana mu umaso wako onsene. Unadzakhala panyumba yanga, pontho unadya pabodzi na ine.’ Dhavidhi cipo aduwala xamwali wace, Yonatani.