Umambo Wagawika

Mu ndzidzi wakuti Salomoni akhalambira Yahova, Aizraeli akhali muntendere. Mbwenye Salomoni amanga banja na akazi azinji a madziko anango, akuti akhalambira madzimunthu. Mwapang’ono-pang’ono, Salomoni acinja mbatomambo kulambira madzimunthu. Yahova aipirwa mbapanga Salomoni: ‘Umambo wa Izraeli unadzagawiwa m’makhundu mawiri. Khundu ikulu ndinadzapasa atumiki ako, khundu ing’ono ndinadzapasa anako.’

Yahova abvekesa mwadidi cisankhulo cace. M’bodzi mwa atumiki a Salomoni, akhacemerwa Yerobhoamu, akhacita ulendo mbagumanikana na mprofeta Aiya. Aiya apandula nguwo yace mapindi 12 mbapanga Yerobhoamu: ‘Yahova anadzabulusa umambo wa Aizraeli m’manja mwa Salomoni, mbaugawa mapindi mawiri. Kwata mapindi khumi thangwi unadzakhala mambo wa madzindza khumi.’ Pidabva Mambo Salomoni pyenepi akhafuna kupha Yerobhoamu! Natenepa, Yerobhoamu athawira ku Ejitu. Mukupita kwa ndzidzi, Salomoni afa, mwanace Robhoamu mbakhala mambo. Buluka penepo, Yerobhoamu aona kuti ukhali ndzidzi toera kubwerera ku Izraeli.

Akulu a mu Izraeli apanga Robhoamu: ‘Ungatsalakana mwadidi mbumba, iyo inadzakhala yakukhulupirika kuna iwe.’ Mbwenye axamwali a Robhoamu alonga: ‘Iwe usafunika kukhala waukali kuna mbumba! Apase basa yakuwanga!’ Robhoamu abvera uphungu wa axamwali ace. Robhoamu akhatsalakana anthu mwakuipa, natenepa iwo asiya kumbvera. Iwo acitisa Yerobhoamu kukhala mambo wa madzindza khumi wakuti wadzadziwika ninga umambo wa Izraeli. Madzindza anango mawiri adzakhala akudziwika ninga umambo Waciyuda, pontho iwo akhala akukhulupirika kuna Robhoamu. Madzindza 12 a Izraeli adzakhala akugawika.

Yerobhoamu nee akhafuna kuti mbumba yace iende kalambira Yahova ku Yerusalemu, thangwi akhatonga kweneko ndi Robhoamu. Thangwi yanji? Yerobhoamu akhagopa kuti iwo mbadacinja toera kukhala kukhundu ya Robhoamu. Natenepa, Yerobhoamu acita anang’ombe awiri a ouro mbapanga mbumba: ‘Yerusalemu ndi kutali kakamwe. Musafunika kulambira kuno.’ Anthu atoma kulambira anang’ombe a ouro mbasiya kulambira Yahova.