NSOLO 59
Aphale Anai Abvera Yahova
Pidakwata Nabhukodhonozore aphale angasi a ku Yuda mbaenda nawo ku Bhabhilonya, iye akhazikisa Aspenazi toera kupfundzisa aphale anewa. Nabhukodhonozore apanga Aspenazi toera asankhule aphale a ungumi wadidi na akucenjera. Aphale anewa akhafunika kupfundziswa mu pyaka pitatu. Pinthu pikhafuna iwo kupfundza mbapidaaphedza toera kuphata basa panyumba ya mambo ku Bhabhilonya. Aphale anewa akhafunika kupfundziswa kuleri, kulemba na kulonga cilongero ca ku Bhabhilonya. Iwo akhafunikambo kupaswa pyakudya pikhadya mambo na atumiki akhaphata basa panyumba pa mambo. Anai mwa aphale anewa akhali Dhanyeli, Ananiya, Mizaeli na Azariya. Aspenazi aapasa madzina a ku Bhabhilonya: Bheltisezari, Sadhrake, Mezaki na Abhedhinego. Kodi pikhapfundza iwo pyaacitisa kusiya kutumikira Yahova?
Aphale anewa anai asankhula kubvera Yahova. Iwo akhadziwa kuti nee akhafunika kudya cakudya ca mambo thangwi Mwambo wa Yahova ukhalonga kuti cinango mwa cakudya ceneci cikhali cakukhonda cena. Natenepa iwo apanga Aspenazi: ‘Taphata miyendo, lekani kutipasa cakudya ca mambo.’ Aspenazi aapanga: ‘Mungakhonda kudya, mambo mbaona kuti mwaonda kakamwe, iye anandipha!’
Dhanyeli akhala na maonero. Iye apanga Aspenazi: ‘Taphata miyendo, tipaseni masamba na madzi mu ntsiku khumi. Buluka penepo, munatilandanisa na aphale anadya cakudya ca mambo.’ Aspenazi atawira pyenepi.
Pidamala ntsiku khumi, Dhanyeli na axamwali ace atatu aoniwa kuti akhali na ungumi wadidi kupiringana aphale anango. Yahova akomerwa kakamwe thangwi yakubvera kwawo. Natenepa, iye apasa Dhanyeli udziwisi toera kufokotoza mabvekero a masomphenya na ndoto.
Pakumala kupfundziswa, aphale anewa akwatwa na Aspenazi mbaenda nawo kuna Nabhukodhonozore. Mambo alonga na iwo, mbadzindikira kuti Dhanyeli, Ananiya, Mizaeli na Azariya akhali na udziwisi kakamwe kupiringana aphale anango. Iye asankhula aphale anewa anai toera kuphata basa panyumba pace. Kazinji kene mambo akhaaphemba uphungu toera kucita pisankhulo pyakufunika. Yahova aacitisa kukhala na udziwisi kupiringana amuna audziwisi na anyakucita masalapita onsene a mambo.
Maseze Dhanyeli, Ananiya, Mizaeli na Azariya akhali kutali na kunyumba kwawo, iwo nee aduwala kuti akhatumikira Yahova. Kodi imwe musabverambo Yahova ndzidzi onsene, maseze anyakubalanu akhale kutali na imwe?
“Nee munthu m’bodzi asafunika kukupwaza thangwi yakukhala kwako m’phale. Mbwenye pangiza kuti wathema kutowezerwa na anthu akukhulupirika, kubulukira pakulonga, m’macitiro ako, pakupangiza ufuni na mu cikhulupiro, mbupitiriza na makhaliro akucena.”—1 Timoti 4:12