Yezu Afa pa Golgota

Akulu a anyantsembe akwata Yezu mbaenda naye kunyumba kwa Pilato. Buluka penepo, Pilato abvundza: ‘Munthu uyu adawanji?’ Iwo alonga: ‘Iye asalonga kuti ndi mambo!’ Pilato abvundza Yezu: “Kodi iwe ndiwe Mambo wa Ayuda?” Yezu atawira: “Umambo wanga nkhabe kucita khundu ya dziko.”

Nakuti Pilato nee aona cinthu cakuipa kuna Yezu, iye antumiza kuna Herodhi, ntongi wa ku Galileya. Mbwenye Herodhi nee aonambo cinthu cakuipa kuna Yezu, na thangwi ineyi am’bweza pontho kuna Pilato. Pilato apanga mbumba: ‘Ine na Herodhi nee tagumana mulando kuna munthu uyu, ndinansiya aende pyace.’ Mbumba yakhuwa: ‘M’pheni! M’pheni!’ Natenepa anyankhondo akwata ntcamu mbamenya Yezu, am’phulira mata, pontho am’menya mbama. Buluka penepo, iwo amuikha nthimba ya minga mu nsolo mwace, ansingirira mbalonga: “Muli tani imwe Mambo wa Ayuda.” Pilato apanga pontho mbumba: ‘Nee ndagumana cinthu cakuipa kuna munthu uyu.’ Mbwenye iwo akhuwa: “Mbamanikwe pamuti!” Natenepa, Pilato apereka Yezu toera aphiwe.

Mbumba yakwata Yezu mbaenda naye ku mbuto inacemerwa Golgota. Kweneko iwo an’khomera pamuti. Yezu aphembera: “Baba, alekerereni pyawo, thangwi iwo nkhabe dziwa pinacita iwo.” Mbumba ikhapitiriza kusingirira Yezu, mbilonga: ‘Khala iwe ndiwe Mwana wa Mulungu, tcita pamuti, pulumusika wekha.’

M’bodzi wa mapanga akhadakhomerwa dhuzi na Yezu alonga: ‘Ndikumbukirenimbo mungapita mu Umambo wanu.’ Yezu antawira: “Unadzakhala na ine m’Paraizu.” Mwakukhonda dikhira, mu dziko ineyi yonsene kwaoneka cidima cakuti camala maora matatu. Mariya, mai wa Yezu na anyakupfundza anango a Yezu akhali dhuzi na muti udakhomerwa Yezu. Natenepa Yezu aphemba Juwau toera atsalakane Mariya ninga mai wace.

Pakumalisa Yezu alonga: “Pyonsene pyakwanirisika!” Penepo iye akotamisa nsolo wace, mbafa. Pa ndzidzi unoyu, pacitika citeketeke camphambvu. Nguwo ya mu templo ikhagawa Mbuto Yakucena na Yakucena Kakamwe yapanduka pakati-nakati. Natenepa nkulu wa anyankhondo adaona pyenepi alonga: “Mwandimomwene, munthu uyu akhali Mwana wa Mulungu.”